Di Nyaom biai peih ngak Danak dak “Patagok khang kajap sa trieu hecta pala padai asar siam saong takik tathuak nerak pambuak haong bruk patagok hijao bhum ĐBSCL tal thun 2030” hu mbaok di rajakar pakat negar, dom gah saong 12 tỉnh di ĐBSCL, Thủ tướng Phạm Minh Chính caong khin, jhul pasamar, pakhang pasamar jang piah sumu 1 trieu ha padai asar siam saong tathuak nerak biar dak harei dak siam, suai abih tal thun 2030 brei ngak bahu min khin kham merat ngak hu aval jang. Thủ tướng iew brei pakhang bruk pambuak doanh nghiep haong bhum palei, HTX, labik ngak mbang pablei salih piah patagok, pablei dom padai brah…

Tỉnh Cà Mau urak ini hu 34 bhum taneh, labik saong baoh sang dulich bhap bini. Tukvak tapa, meng hu bruk patagok janih yulit sinh thai saong dulich bhap bini yau nan ye tuai damuai  mai Cà Mau saong jien mek tame meng dulich patagok yaok thun. 9 bilan tapa, tỉnh taduan raok labaih 1.6 trieu tuai damuai, jien mek tame labaih 2.310 tỷ đồng, tagok 6,5% dut saong tukvak ini thun dahlau. Meng nan, rik tame biak ralo ka doanh nghiep, baoh sang ngak dulich, duah bruk ngak ka rilo urang  dalam palei.

Meng harei ini 16/10 mbiah tal harei 22/10, tỉnh Bạc Liêu brei ba jalan brong ia gah Meraong Jalan raya 1A jalan ar tasik bien Đông tame ngak bruk, piah pacang ia ndik, pacang ia dauk ka ban Bạc Liêu saong dom labik tapen tasik; tui nan tathuak ia  caga dauk, duh ka mikva  trun pajaih hamu padai bilan Thu Đông. Tui kuhria mboh dahlau  dalam dom harei anak tal bhum tapen tasik meda hu ia ndik birau, ia ndik glong abih  meda tal tanut pakat 3 labaih meng 15-20 cm. Ia ndik kuhria mboh  glong, ngak kan kandah tal bruk pala drak saong bruk daok dang di bhap bini.

Bhap bini sang daok rah tui jalan Thuận Giao 7, TP. Thuận An, Bình Dương, rambah rambeip kayua ia dauk dui atah 4 thun. Bruk ia dauk bhian rah tabiak, dui atah rilo harei. Yaom lac birau hu sa mbang hajan, jalan dauk dalam ia, ba tal rilo baoh sang gaok kan kandah kayua ia tame sang, gam hareik harom, gluh baok. Mikva pak ini duah jalan piah ramik pasiam veik meng mac njuk pruh ia tabiak. Yau nan min, hadei tukvak pandar, hareik harom ngak khut mac njuk pruh ia saong abih rilo jien pasiam  mac yau nan ye oh lagaih. Mikva caong khin, phường samar  hu jalan langyah piah urang oh daok dalam bruk 6 bilan hajan saong 6 bilan ia dauk.

Kong an huyen Bình Chánh, TP.HCM daok pasang iek bruk patuh lo kahon di sa labik ngak gilau tram huong di labik ini ngak rilo baoh sang jaleih danieng saong sa uranaih kumei njauk rambuac. Dahlau di nan biar harei 15/10, bhap bini daok jaik labik ngak gilau di Puk 7, xã Vĩnh Lộc A mboh labik ngak gilau praong 100m2 patuh. Diuk pasang po ngak gilau patuah tabiak hu. Tui duah thau, bruk patuh kayua ging kahon meng menyek ngak apui khuah mbang talei điện.

Lien hop quoc mboh Dải Gaza, bhum taneh kalin kan njauk tayak, daok dang anak dom bruk biak kurang kan daong meng tuk rah tabiak mesruh Israel - Hamas atah di ini sa thun, abih di nyu ngak trak damah tal bruk uranaih. Brei panuac di Kadung jien Uranaih LHQ (UNICEF) khan lac “Yaok thun tapa, bruk uranaih dak harei dak rambah jang dahlau”.

Tapa roh duah di dom urang ilamo di Mỹ saong Singapore brei mboh, tuk langik pandiak tagok ngak mbuan jeng ribuk jaik tapen tasik biển Đông Nam Á jang. Yau nan ye, di bhum Đông Nam Á meda hu hajan khang dalam dom bilan anak tal, meda ngak kan kandah tal bruk pala drak, yulit saong pandap gah kong nghiep di dom labik daok gaok kan kandah kayua ribuk dahlau dalam thun. Urak ini langik tasik yau nan ngak ia pandik tagok di chau A saong Australia saong caga veik bruk El Nino ngak thu lagu jang.

Harei ini, talang atau khủng long praong abih bhian hu ba tabiak to yaom hu pablei di Prang. Talang atau khủng long angan Vulcain di khung long mbang phun pala, atah 25 mét hu meng 145 triệu thun. Talang nan hu duah mboh dalam thun 2018. Yaom pablei tagok meng 10 trieu tal 15 trieu ơ-rô (sumu jaik 11 triệu tal  16 triệu dola). Dahlau di nan, talang khủng long hu pablei di bilan 7 meng blaoh yaom jaik 41 trieu ơ rô sumu 44,6 trieu dola di sa mbang to yaom di Mỹ./.