Patui veik dom bruk ngak di Thủ tướng Rajaei Phạm Minh Chính di Hoa Kỳ. Dah page ini tui maong di Việt Nam, di San Francisco, Thủ tướng Phạm Minh Chính rok kapul dom urang chính trị dom ban, bhum Vịnh San Francisco, bang California kayua amuk Sheng Thao, akaok Ban Oakland ba akaok. Thủ tướng Phạm Minh Chính brei mboh hatai bui sambai anak dom bruk patagok dalam talei pambuak bruk di Việt Nam haong Hoa Kỳ, saong abih di nyu nan lac di dom labik bhum Vịnh San Francisco. Thủ tướng brei thau lac bruk paglaong talei pambuak gauk, klah rabha dom kein lagaih, gam haong gauk padang ngak saong cak rok patagok taneh ia lac jalan ngak hu siam lagaih, meda lac meng nan piah peih ngak dom bruk pambuak gauk di jalan ngak taong abih gah di Việt Nam - Hoa Kỳ saong rik tame biak praong piah ka dua taneh ia pasiam veik dom khut khat di mesuh metak.

Dalam mbang nyaom ka 11 tuk mesup ini, HĐND TP.HCM hu brei tapa Sarak ka bruk padang Sở Salamat pandap mbang TPHCM. Ini lac jabat chuyên môn hu tame bruk ngak meng di harei 1/1/2024, hu brei bruk tham mưu, daong ka UBND TP khik iek gah salamat pandap mbang. TP.HCM meda brei ba dom bruk gah khik ramik karja di Sở Y tế, Sở Ngak nong saong patagok palei pala, Sở Công thương yau bruk pasang iek, tui iek, langyah bruk ngak suan gah salamat pandap mbang, bruk pabak harak chứng nhận dut iek pandap athur tabiak truh TP brei ka Sở Salamat pandap mbang TP.HCM. Meng labik hu 13 triệu menuac (kuhria gam tuai mai ravang me-in), bruk padang Sở Salamat pandap mbang lac bruk njauk ngak di sa ban praong yau TP.HCM.

Dah page ini (19/9), UBMT negar VN ban Cần Thơ pambuak haong Sang bac đại học Cần Thơ, Học viện Chính trị bhum 4, Học viện phật giáo Nam tông Khmer peih mbang Nyaom biai ilamo ka “jalan khik caga, patagok dom yaom glaong ilamo”, “ba mbang ngui” khang kajap ka urang kan kathaot saong mikva bangsa Khmer bhum Taneran kraong Cửu Long". Dalam bhum urak ini hu labaih 220 xã di bhum mikva bangsa takik di 9/13 tỉnh, ban. Taeng di nan, mikva Khmer hu labaih 1,2 triệu urang, meblah 6,7% rahra, daok pataom gauk rilo meng lac di dom tỉnh Sóc Trăng, Trà Vinh, An Giang… Dom thun tapa, dom sarak bangsa hu dom tinh, ban sangka peih ngak, dak harei dak paglaong raidiuk di mikva bangsa takik, dalam nan hu mikva bangsa Khmer.

Phaoak akaok UBND TP. Hồ Chí Minh Bùi Xuân Cường bahrau mbaoh tangin tame harak samar drah payua dom sở, ngành, UBND ban Thủ Đức, dom quận - huyện ka bruk khik iek radaih di dom mblang bein công cộng dalam ban. Tui nan, TP Hồ Chí Minh daong palagaih ka dom labik khik iek mblang bein công cộng hu ginup bruk piah peih labik khik iek radaih saong dom bruk brei hu karei dalam mblang bein njauk tui adat. Dom urang pan akaok TP hu panuac ieu duah thau bruk caong payua radaih di bhap bini tuk nao tal dom mblang bein piah me-in sambai, pasram pahat…piah hu jalan peih labik khik radaih ka nyu lagaih haong yaok mblang bein. Urak ini ban raya hu jaik 400 mblang bein oh hu labik khik radaih kayua daok dalam dom khu dân cư, sit sot, oh lagaih piah peih labik khik radaih. 

Labaih 400 anek saih di Sang bac Tiểu học xã Suối Trầu hu ba mai bac taa di Sang bac bahrau pak labik tái định cư Lộc An - Bình Sơn, huyện Long Thành, tỉnh Đồng Nai. Ini lac sang bac tiểu học camriep hu ba tame ngak di labik tái định cư Danak dak mblang kapar haok Long Thành saong lac sa dalam 8 sang bac hu quy hoạch padang ngak di Labik tái định cư Lộc An - Bình Sơn piah peih ngak Danak dak mblang kapar haok praong abih di taneh ia. Ong Nguyễn Văn Toàn, Akaok Jabat pato magru huyện Long Thành brei thau, bruk ba sa sang bac tame pabak ka bruk pato saong bac di cei gru, anai gru, anek saih di pak ini lac bruk bui sambai biak praong di gah pato magru bhum palei. Kayua yau nan ye, anek saih hu nao bac lagaih jang dut saong dahlau deih.          

Gah pato megru, Khoa học saong ilamu Liên hợp quốc (UNESCO) hu pok angan rilo labik hu angan lac Inem krung dunya di mbang nyaom peih praong mbang ka 45 di UB inem krung dunya, peih harei kabroi di Saudi Arabia. Dom inem krung dunya hu UNESCO pok angak mbang ini jeng hu pambuak atah haong glai tea klak di Phổ Nhĩ, Tây Nam Trung Quốc saong labik 7 cụm lăng mộ Gaya Tumuli di Hàn Quốc saong rilo labik karei. Kuhria tal harei ini, UB inem krung UNESCO hu pok angan 1.200 labik di labaih 160 taneh ia saong bhum taneh lac Inem krung Dunya.

Australia daok tame dom harei bilan xuân pandiak tuk nhiệt độ rilo labik tagok tal labaih 30 độ C. Bruk ini kuhria ka bilan pandiak bhang jaik tal saong ngak kanjak jhak mbuan ba tal bruk khuah glai pambak praong. Rahra di ban Sydney di bang New South Wales daok rah tapa bilan 9 pandiak khang di abih dalam 23 thun gilac ini tuk nhiệt độ rilo labik hu tagok tal labaih 30 độ dalam dom harei tapa. Tui kuhria, mbang camriep di Sydney, dalam bilan 9 – bilan xuân bo nhiệt độ hu 5 harei gam nhiet do labaih 30 độ C. Langik pandiak dalam dom harei tapa daok ngak patagok prein khuah glai kayua bruk ngak di rahra saong ngak ka labaih 20 sang bac di bhum ar tasik gah maraong bang New South Wales njauk kareih pabang di harei ini.

Dalam tuk nan di Ấn Độ, hajan dalam dom harei tapa ngak brei dauk khang rilo labik di bang Gujarat gah pai Ấn Độ. Ban Bharuch lac sa dalam dom labik njauk khang di abih, ia dauk dalam di rilo labik ngak ka bruk nao mai biak kan kandah. Tui kuhria mboh dahlau, dalam harei ini, hajan praong tal biak praong daok hu di dom labik. Jabat khik ramik bala meng langik tasik di bang Gujarat saong gah pacang caga bala meng langik tasik pakat negar daok kham merat daong bhap bini tabiak truh dom labik gaok kan kandah kayua hajan ia sua./.