Bier harei kabroi (19/4), Thủ tướng Phạm Minh Chính taduan raok Akaok Mintri ngak nong Hoa Kỳ Thomas Vilsack daok hu mbang rivang saong ngak bruk di Việt Nam. Di pak ini, Thủ tướng ieu kakei gah Hoa Kỳ patagok bruk pambuak gauk, daong brei dalam tuk Việt Nam daok jhul samar gah ngak nong cak rok patagok samar drah, bahrau, mbeik drei tame dunya. Dua taneh ia paglaong bruk pambuak gauk jang piah yaok gah parilo janih pandap panda, chuỗi cung ứng; Hoa Kỳ peih pabah mbang darak pasa jang veik ka pandap panda kaya nong di Việt Nam; ngak salah dom harak adat peih pabang gilac veik ka darak pasa kaya nong di Việt Nam yau ye li-u, kruac tuan. Daong ramik pandap panda truac xạ di gah barak di Việt Nam piah ba kein lagaih pablei tabiak negar langiu ka baoh vải, pa-aok, kruac bung saong thanh long; patakik pandar dom pandap panda, jalan pacang ilamo oh lagaih dalam bruk pablei salih kaya nong ngan haong Việt Nam.

Anak bruk urang njaom COVID-19 dak harei dak tagok rilo,  Sở Pato Megru TP.HCM hu harak payua samar drah tal Phòng Pato Megru dom quận, huyện saong TP. Thủ Đức, dom labik pato megru ka bruk patagok peih ngak dom jalan pacang caga jit COVID-19, dalam nan hu bruk ieu cuk pataih pacang mbaok saong khử khuẩn.  Tui nan, Sở ieu dom jabat, dom labik ba tabiak dom jalan ngak piah pacang caga jit COVID-19, oh brei iek lap. Brei peih ngak dom bruk pacang caga jit ruak dalam dom labik pato megru tui njauk tacei pato di gah y tế saong khan brei jabat y tế puk palei thau chip tuk hu menuac ruak.

UBND tỉnh Vĩnh Long pambuak haong Cục khik caga phun pala (Mintri ngak nong saong patagok palei pala) bahrau peih bruk brei thau ka mbang pablei bei java tui jalan chính ngạch camriep abih tapa Trung Quốc trak 84 tấn.  Di tỉnh Vĩnh Long, yaok ratuh mblang taneh pala bei praong meng 12.000 - 14.000 ha.  Tukvak tapa, Vĩnh Long hu pathau khan jak ba urang nong pasiam veik ilamo ngak tabiak saong paik baoh, pabak hu dom tanut chuan di dunya. Tal urak ini, Vĩnh Long mek hu 27 mã số bhum pala saong 3 labik papaok kadung bei hu pabak mã số pablei tapa darak pasa Trung Quốc.       

Harei kabroi (19/4), UBND xã Mã Đà, huyện Vĩnh Cửu pambuak bruk haong Labik khik ramik langik tasik, ilamu Đồng Nai haong Cty Thủy điện Trị An peih bruk cưỡng chế dom labik padang ngak dom danak dak du lịch sinh thái eng drei padang ngak tui hatai di labik ini. Tui UBND xã Mã Đà, labik danao Trị An urak ini hu 30 labik du lịch sinh thái tamuh eng. Meng bilan 3/2023 tal urak ini, karja xã pathau khan, jak ba saong hu 15 labik hu yah klaak. Anak tal, karja palei daok brei langyah dom labik padang ngak suan hukum, oh ka yah klaak. Dom danak dak duh ka bruk  du lịch tamuh eng jeng hu padang ngak suan hukum, lih tame dalam danao Trị An. Hadei di sa tukvak jak ba, pathau khan, rilo po oh yah klaak nan ye karja cưỡng chế.

Công ty cổ phần Mblang radaih miền Tây bahrau brei thau, kuhria tal urak ini, rilo doanh nghiệp pajeng ba daok peih ngak dalam mblang radaih ka oh hu jalan tagok yaom dalam tuk lễ 30-4. Daok urang lambaok di Mblang radaih miền Đông klak brei thau lac, hu 17/74 doanh nghiệp pathau khan tagok yaom harak vé. Tui kuhria, dom tuai nao mai di dom tỉnh miền Tây Nam bộ dalam tuk lễ meda tagok 140% dut saong yaok harei; dom sruh radaih tagok labaih 70%.Dalam tuk nan, mblang radaih miền Đông bahrau kuhria lac tuai nao mai di tukvak lễ lac labaih 8.200 urang sa harei ngan haong labaih 342 radaih. Taeng di dom gah nao tỉnh Đồng Nai, Bà Rịa - Vũng Tàu tagok oh tapa 20% dut saong yaok harei, dom gah daok veik tagok oh tapa 40% dut saong yaok harei.

Dalam kham merat piah ngak hu bruk ba phát thải ròng mai veik tanut zero di thun 2050, Australia bahrau brei thau jalan ngak piah patagok radaih ô-tô điện. Jalan patagok radaih điện di Australia hu 3 kadha praong. Dalam asal kadha ini, dom bang di Australia meda ba tabiak dom jalan ngak ka bruk pandar radaih ô-tô điện. Tui nan, bang Queensland brei thau lac tal thun 2030, 50% radaih bahrau   hu pablei ka bhap bini di bang ini meda lac dom radaih hu tanut phát thải ròng samu zero saong bruk ini meda tagok 100% di thun 2036.   

Akaok Mintri Y tế Malaysia Zaliha Mustafa brei thau lac, dom urang njauk ruak Covid-19 di taneh ia ini jeng daok dalam tanut pasang iek hu saong ieu kakei rahra oh hu hagait piah haduh hatai. Mintri Y tế Malaysia brei thau lac, dom biến thể phụ XBB 1.5, XBB 1.16 saong XBB 1.9.1 hu brei thau di taneh ia ini jeng daok dalam biến thể Omicron, gam tui di nan jeng kakei rahra njauk cuh pataik pacang mbaok tuk mboh dalam rup njauk hagait. Tui pathau khan bahrau di abih di Mintri Y tế negar ini, dom urang metai kayua Covid-19 dalam 2 adit tapa di Malaysia lac 16 urang, min dom urang pandar manieng ka urang ruak lac tagok labaih 70%. Malaysia hu mboh labaih 800 urang dương tính haong Covid-19, tagok 35-40% dut saong tukvak di bilan 1.  

Tuai dunya nao tal Japon me-in dalam bilan 3 tagok tal tanut glaong abih meng hadei di jit praong COVID-19 kayua taneh ia ini tame bilan tabung glaong du lịch dalam bilan bingu anh đào raak. Gah Du lịch negar Japon brei thau, dom tuai negar langiu mai ravang me-in taneh ia ini piah maong iek bingu hu 1 triệu 820 rabau menuac, tagok meng 1 triệu 480 rabau menuac dalam bilan 2.  Min dom tuai jeng daok trun 34% duk haong bilan 3 thun 2019, dahlau di tuk Japon brei patakik veik menuac tame negar kayua jit praong Covid tamuh tabiak. Dom tuai ravang me-in tal negar ini hu tagok veik meng di tuk taneh ia ini peih ngak veik bruk miễn thị thực ka rilo taneh ia.