Patagok bruk klauk jru ka uranaih meng 5 thun tal mala 12 thun

Anak bruk Việt Nam hu dom biến thể bahrau BA.4 song BA.5 song jit ruak dok mbuan si rah tamuh tabiak veik, Thủ tướng rajaei hu harak pandar mintri Y tế khik ramik, song pabak, parabha ginup, lagaih, samar drah vaccine pacang COVID-19 tui cong khin di dom tỉnh ban, oh vcaik ka bruk kurang vaccine. Mintri Y tế pambuak bruk song mintri pato megru patagok bruk klauk jru ka uranaih meng 5 thun tal mala 12 thun, piah khik ramik song ngak salah bloh dalam bilan 8 ni; ngak salah bloh samar di abih bruk klauk mbang 3, mbang 4 ka bhap bini meng umo 18 thun tagok. Gam song nan, hu panuac khan ka dom biến thể bahrau di Omicron song tacei pato ka bhap bini iek glang pren yava hadei di tuk njom COVID-19.

Di tuk pahadar 75 thun harei TBLS (27-7-1947 - 27-7-2022), rilo tỉnh, ban hu peih ngak dom bruk pahadar, thau dhar phor, iek glang urang buh prein ka CM. Dalam harei 25/7, 2 tỉnh An Giang, Kiên Giang hu peih ngak dalam praong prang bruk ba nao dar 88 talang liệt sĩ urang lin halan hatian saong chuyên gia Việt Nam metai lahik di Campuchia. Di tỉnh Sóc Trăng, Bộ Tư lệnh Quân khu 9, Bộ Chỉ huy quân sự tỉnh bahrau jao sang anit ranam brei ka amuk Lê Thị Cúc, lac anek di liệt sĩ kan kandah ka sang daok di xã Hòa Tú 1, huyện Mỹ Xuyên.

Meng harei ni, jalan nduac samar TP.HCM – Long Thành – Dầu Giây ba bruk mek jien phí tui jalan điện tử tự động oh padeih (ETC) tame ngak bruk. Ni lac , jalan nduac samar prong di gah merong, jalan prong dong pambuak pagam bruk nao mai , ngak mbang pablei salih di TP.HCM song dom tỉnh Đông Nam bộ, Tây Nguyên. Bruk ba hệ thống mek jien phí ETC di jalan nduac samar TP.HCM– Long Thành– Dầu Giây tame pandar hu patrun bruk gar jalan di dom bilac thu phí; pambuan, palagaih rilo di abih ka urang peih radaih.

Melam 25/7, di Nhà hát Cao Văn Lầu (phường 1, ban Bạc Liêu), tỉnh Bạc Liêu pambuak bruk haong tỉnh Hậu Giang peih ngak danak dak “Anit lo Miền Tây” mbang ka 2 ngan saong kadha “Mai Bạc Liêu pang ragu Hoài Lang”. Danak dak hu peih tabiak piah rik daong khik ramik saong cakrok yaom glaong ilamu Đờn ca tài tử Nam Bộ, yaih khan dom gheih mekre di bhum taneh saong anek menuac miền Tây jeng yau Bạc Liêu tal bhap bini dalam taneh ia. Abih di nyu nan lac ngak brei medeih tagok hatai caong saong abih drei ka 1 bhum taneran kraong Cưu Long gheih mekre, kaya meda.

Di huyện Cái Nước, tỉnh Cà Mau bahrau rah tabiak bruk 3 urang metai, hadei di tuk, menyum alak gam 2 harei. Dahlau di nan, harei 20/7, muk M.T.M peih bruk menyum lak di sang meng 19tuk tal 23tuk. Var menyum lak hu 6 urang, dalam nan hu 3 urang njauk bala nan song 3 urang karei. Harei hadei di nan, dom urang ni gam gam menyum lak di sang muk M.T.M meng 9tuk tal 13tuk. Tal mon 21tuk harei 22/7, 3 urang nan mboh taglaoh ta aok, ka suah yava, yau nan ye, urang dalam sang ba tame sang iek ruak đa khoa Cà Mau cấp cứu. Min, 3 urang metai hadei di nan. Dom urang gaok bala hu pasang iek njauk jru mek di lak, medhi njauk jru mek methanol (cồn dalam gah ngak cong).

Mintri Y tế Indonesia brei peih hệ thống pasang iek di taong abih dom pabah mbang negar piah pacang cakak ruak đậu mùa khỉ njom tame saong pambak tabiak. Rajaei Indonesia jeng daok brei pasang iek dom kapul mbuan njauk ruak đậu mùa khỉ, haong bruk pambuak gauk meng dom kapul saong nyaom langiu rajaei. Langiu di nan, Mintri Y tế Indonesia daok hu tacei tabiak 1 bilik duk iek piah daong pasang iek dom urang njaom mbak virus ba tal ruak đậu mùa khỉ di yaok tỉnh dalam taneh ia.   

Labaih 800 bác sĩ Thái Lan hu puac ieu rajaei padeih hukum hợp pháp hóa cần sa tuk cang ngak salah bloh dom jalan pasang iek lagaih, piah khik ramik thanh thiếu niên. Tui dom bác sĩ, bruk hợp pháp hóa cần sa dalam tuk oh ka hu dom jalan song sarak pasang iek ka nyu lagaih ba tal bruk urang ranaih pandar cần sa piah ma-in, dalam tuk gah ilamu khoa học mboh lac cần sa oh siam ka rup pabhap song glaow akaok di urang ranaih umo.

Ấn Độ daok caga ba tabiak tổ hợp tên lửa phòng không S-400 ka 2 blei di Nga, tal labik taphia negar gah brak jaik Trung Quốc. Janih vũ khí biak bahrau ini meda pandar hu dalam 2- 3 bilan tal, daong ka Ấn Độ pasiam biak rilo prein duah mboh saong cuk laik dom kapal haok tiêm kích, kapal haok plaik mbom, tên lửa saong kapal haok oh hu menuac peih meng atah. Dalam 2 thun tapa, Trung Quốc jeng ba tabiak 2 khẩu đội tên lửa S-400 di Nga saong dom hệ thống phòng không karei jaik jalan tapen negar piah pacang veik bruk không kích halei di Ấn Độ./.

Urang lang: Hani Pha & M. Phương – 26/07