Biar harei kabroi 14/3, Thủ tướng Rajaei Phạm Minh Chính, Akok Mban tacei jalan pakat negar ka pacang caga jit Covid-19 hu taom mbaok, dhar phol dom urang pambuak bruk di dunya hu daong ka Viet Nam pacang caga jit Covid-19. Di var taom mbaok, dom urang pambuak bruk di dunya taong yaom glong bruk kham merat pacang caga jit di Viet Nam. Tui muk RANA FLOWERS- Quyền Điều phối viên Liên Hợp Quốc di Viet Nam, dom kham merat pacang jit pakat negar di taneh ia dalam dua thun tapa  hu jeng sa tanut chuẩn ka dunya saong hu jeng sa dalam dom taneh ia hu manuac klauk jru caga ruak glong abih di dunya.

Dalam nyaom biai brei thau cambaih piah ngak njauk, peih tabiak ngak Sarak ka 58 di Mintri ka “Dom bruk khik caga chính trị dalam Đảng” kayua Mban Tổ chức Trung ương peih tabiak, amuk Trương Thị Mai - UV Mintri Chính trị, Bí thư Trung ương Đảng, Akaok mBan Tổ chức Trung ương ndom lac, khik caga chính trị dalam Đảng lac bruk biak praong, brei hu bruk ngak catang, tani tanat piah khik kajap bruk chính trị dalam Đảng, oh jauk lac ka Đảng saoh, bo daok lac “sinh mệnh chính trị” di urang jakar, urang đảng. Kayua yau nan ye, bruk khik caga chính trị dalam Đảng brei patui roh duah, brei thau cambaih piah ngak njauk, piah ngak brei yau gauk gah jalan sahneng mboh, cambaih gah jalan maong, jalan sahneng dahlau di tuk nao tame langyah dom bruk cambaih laih di anak meta.

Anak khaw tin lac urang njom Covid-19 (F0) hu tabiak truh sang, melam 14/3, Mentri Y tế hu harak văn bản brei thau cambaih: Urang njom Covid-19 (F0) brei takik di abih bruk tabiak truh duk bilik daok karei, min oh brei tabiak truh sang. Tuk tabiak truh bilik daok karei brei cuh khẩu trang, brei daok patah di urang karei dalam sang. Panuac tacei pato birau abih nan di Mentri Y tế  salih ka Sarak di Akok Mentri Y tế ka 261 harei 31/01/2022.

UBND tỉnh Ninh Thuận bahrau tabiak jalan ngak ka 890 ka bruk peih ngak Danak dak bruk ngak negar patrun kathaot khang kajap tukvak tal thun 2025 haong yaom jien abih tih jaik 730 tỷ đồng. Danak dak pataom tame daong jien ngak, patagok cơ sở hạ tầng di dom bhum kan kandah, xã hu dom sang kan kathaot rilo, dalam nan brei ngak dahlau bruk daong sang kan kathaot hu mbang tui dom bruk an sinh xã hội tui asal patrun kathaot rilo gah yau ye: y tế, pato pakai, sang daok, ia hacih, sa-at alam môi trường, pato bruk ngak... Ninh Thuận kham merat tal thun 2025 trun dom sang kan kathaot meng 1,5 – 2% sa thun, dom baoh sang kan kathaot bangsa takik trun labaih 3,0% sa thun.

Mban Thường vụ Tỉnh đoàn Bạc Liêu birau pambuak saong Kadung jien Baoh sang haniem phol peih ngak Danak dak jao brei jien ka uranaih metui medhar kayau jit ruak Covid-19 dalam tỉnh.  Hu 31 uranaih metui medhar kayua jit Covid-19 dalam tỉnh hu Danak dak alin brei yaok adei 5 trieu đồng. Urak ini, dalam tỉnh Bạc Liêu hu labaih 60 uranaih lahik ame, amaik atau metui abih amaik haong ame, daok hu ong muk, gauk gar raong ba. Tukvak tapa, Tỉnh đoàn pambuak saong rilo kapol nyaom, urang ngak pahala daong yaok bilan ka 20 uranaih kan kandah di abih.   

Ginum biai di Nga haong Ucraina daok patui veik dalam harei ini (15/3). Ini lac panuac khan di Tổng thống Ucraina Volodymyr Zelenskiy anak dom urang ngak báo di harei kabroi hadei di mbang ndom biai nao mai haong Thủ tướng Naftali Bennett, sa dalam dom taneh ia daok kham merat pambuak bruk ginum biai  Nga – Ucraina. Dahlau di nan, 3 mbang ginum biai di Nga haong Ucraina hu rah tabiak dalam dom harei 28/2, 3/3, saong 7/3. Tapa nan Nga haong Ucraina njauk gauk brei padang jalan ngak pahla ka bruk ba rahra tabiak truh labik mesruh.

Jit ruak Covid-19 tamuh  gilac veik, pambak tabiak 19 tỉnh, ban di Trung Quốc đại lục saong bruk kareik pabah mbang dom ban tuk camereip daok ngak kan kandah tal bruk ngak mbang, gam haong meda ngak trak damak ka gah kinh tế di taneh ia ini. Dom urang ilamu kinh tế Trung Quốc lac, mbang jit ruak birau ini meda ngak kan kandah biak rilo tagok bruk kinh tế dalam tukvak katut panak. Tui Gru Vu Xuân Hải - Viện Kinh tế Đại học Nhân dân Trung Quốc, hadei di mbang tamuh jit ruak mbang ini, dom urang jakar ngak praong di Trung Quốc meda samar brei pacadu dom jalan ngak catang pacang caga jit ruak, pasamar bruk ngak mbang saong buh jien tame ngak piah pacang veik bruk trak damak yau urak ini.  

Meng harei kabroi (14/3), rajaei Japon brei patagok rilo di abih dom menuac hu adat tame negar ini yaok harei meng 5 rabau menuac tagok 7 rabau menuac. Tui Mintri Pato pakai, Ilamu, Thể thao, Khoa học saong Công nghệ Japon Ma-tsư-nô hu jaik 110 rabau menuac caong khin bac megru di Japon saong hu ginup điều kiện piah pabak brei visa min oh ka tame hu taneh ia ini. Ong Ma-tsư-nô daok brei thau lac, dom gah pasang iek jit ruak di negar Japon daok caga piah pacang haong bruk dom menuac meng taneh ia langiu yaok harei yam tapa tanut brei adat lac 7 rabau urang. Hu thau, bruk pacang veik di tanut ini tui kuhria meda brei tagok 10 rabau di bilan 4./.

Urang lang: A.Nghiem&M.Phuong -15/3/2022