Thu tuong Rajaei jao ka dom mentri lac: Mentri Ngak nong saong Patagok palei, Mentri Tai nguyen saong Moi truong, Mentri Jalan mbak pajeng ba pambuak haong dom gah pambuak tal, ngak brei cambaic laic bruk padai metai di Hậu Giang. Tui panuac khan di mikva daok di palei 9, xã Vị Thắng, huyện Vị Thủy diukrai meng bruk ngak padai. Yau nan min, meng bilan padai đông xuân 2023 – 2024 saong bilan padai he thu, padai metai oh ka bhian mboh, abih di nyu  lac padai pala jaik jalan peih drah samar Bắc - Nam.  Kayua yau nan ye, mikva caong khin gah pambuak tal brei daong bhap bini njauk khat lahik kayua padai metai. Tui UB bhap bini huyen Vị Thủy, padai njom ia mbak, meda lac meng cuah ngak jalan peih drah samar. Yau nan min, gah padang ngak javap lac, cuah ngak jalan  cao toc lac cuah di kraong yau nan ye oh hu bruk njom ia mbak ngak metai padai.  

Pasang iek bruk caga ka mbang pakacah tamat THPT thun ini di tỉnh Hậu Giang, Akaok Mintri Pato magru Nguyễn Kim Sơn kakei tinh peih ngak catang adat pakacah, khik kajap siam makre, salamat saong khik kandauk bruk pakacah, abih di nyu nan lac caik hatai tal bruk kuhria caga dahlau, daong ka anek saih saong gru pato dalam tuk pakacah. Mbang pakacah tamat THPT thun ini, tỉnh Hậu Giang hu labaih 7.300 anek saihi tut angan tame pakacah. Tinh hu rami ramik 20 labik pakacah ngan haong 320 bilik pakacah di dom bhum palei saong labaih 1.000 urang jakar, gru pato, urang ngak bruk khik iek pakacah.

Jabat LHQ ka bruk Likei kumei sumu gauk saong Jao quyen ka urang kumei (UN Women) pambuak hoang Kapol urang kumei TPHCM, Kapol urang kumei tỉnh Tiền Giang gam haong bruk daong di Đại sứ quán Australia kuhria iek Danak dak piah klak rabha bruk ngak hu, tapa ilamu meng bruk daong ka 3.591 urang kumei hu raidiuk kan kandah di bhum palei pasiam veik, patagok bruk ngak mbang, patrun bruk taong paoh hadei di kan kandah kayua jit Covid-19. Akok lambaok UN Women di Viet Nam khan lac, dom bruk ngak hu harei ini lac brei mboh bruk khang hatai, kham merat ngak brei salih raidiuk di urang kumei di TPHCM saong Tiền Giang, dom urang kham merat yam tapa kan kandah di Covid-19 , patagok mbang ngui di baoh sang saong bhap bini.

Urak ini yaom blei katak cao su pak tỉnh Bình Phước tagok khang meng 80-120 đồng/độ katak ia dut saong thun blaoh. Di huyện tapen negar Bù Gia Mập, yaom  blei katak meng 390-405 đồng/độ. Dalam dom thun jaik di ini, yaom katak cao su bhian daok di tanut bier, min, akaok vu kuac mek katak ini, yaom tagok glaong nan ye urang pala cao su biak chreih chrai. Kuhria tal puac thun 2023, Bình Phước hu labaih 244.000 ha cao su. Phun cao su jeng daok lac janih phun pala lavik thun ba jien tame tani tanat ka rahra, meblah labaih mateh mblang taneh pala phun lavik thun di tỉnh. 

Thun 2020, HTX Ngak nong Jit vu tong hop Phuoc Chinh, huyen Bác Ái, tỉnh Ninh Thuận peih bruk daong urang bangsa takik paglong bruk ngak tabiak rilo padai saong asar brah siam meng bruk pambuak haong 30 baoh sang ngak labiah 20 ha pajaih padai Đài Thơm 8 tui tanut chuan VietGAP. Tui nan, HTX daong pajaih padai birau, khak drak, saong tacei pato ilamu pala, ngak. Urak ini, bruk nan hu daong paglaong padai yuak hu, asar brah siam bo daok ngak brei salih jalan sahneng di bhap bini. Tal urak ini, dom sang pambuak gauk ngak tagok hu jaik 90 baoh, pala drak jaik 70ha sa vụ, brah hacih pablei tabiak darak pasar labaih 50 tấn sa vụ, daong ka bhap bini paglaong jien mek tame.

Bol lin Hàn Quốc hu panuac lac 20 urang lin Triều Tiên nao tapa jalan tapen negar 2 taneh ia dalam sa tukvak katut ngak ka bol lin Hàn Quốc brei cuh phao cảnh cáo. Urak ini Triều Tiên ka oh ndem hagait ka bruk ini. Bruk rahtabiak dalam tuk kaoh pulao Triều Tiên daok catang tagok dalam tukvak tapa. Dalam dom adit mai ini, Hàn Quốc ndom lac Triều Tiên ngak sarau tín hiệu GPS. Langiu di nan, Triều Tiên jeng palao yaok tấn nerak meng baoh blung par tapa Hàn Quốc piah cagar veik dom bruk ngak di gah Hàn Quốc palao truyen đơn ndom jhak Triều Tiên tapa jalan tapen negar di dua taneh ia.

Jabat Tổng thống saong Rajaei Malawi khan lac, kapal haok pajeng Phó tổng thống taneh ia ini Saulos Klaus Chilima, umo 51 thun, saong 9 urang karei lahik. Dahlau di nan, sruh kapal haok quan su par tabiak meng ban ine Lilongwe mon 9 harei 10/6 tui tukvak pak nan saong tui kuhria lac par trun mblang kapal haok ban Mzuzu, gah Barah Malawi, mon 10h02 harei nan. Yau nan min, kapal haok nan lahik oh mboh di radar dahlau di tuk par trun. Urak ini, bruk duah saong daong urang gaok bala daok hu peih ngak, gam haong nan, taneh ia ini hu pambuak haong dom taneh ia jaik taphia saong Mỹ, Anh, Na Uy, Israel piah daong duah.

Sa sruh gilai pajeng 260 urang di cu karam di langiu tasik pak tỉnh Shabwa, Yemen di harei 10/6 meng blaoh. Hu takik di nyu 38 urang, jaik abih lac urang kumei matai, 150 urang karei jeng daok lahik, 72 urang tame ar hu salamat. Tui Gah Di cư Dunya (IOM), dom urang di cu châu Phi tal Yemen yaok thun jeng tagok glaong, dalam thun blaoh, hu labaih 90.000 urang, yaom lac hu bruk mesuh gauk di Yemen saong dom mbang taong di gah Houthi pamaong tame dom sruh gilai di tasik Biển Đỏ.