Meng di tuk nao tal ban San Francisco, bang California, Hoa Kỳ piah hu mbaok tame Adit pakat glaong Mbang 78 Đại Hội đồng Liên hợp quốc saong dom bruk ngak di dua gah pak Hoa Kỳ, Thủ tướng Rajaei Phạm Minh Chính hu taom gaok biak bui sambai saong lambaok urang Việt Nam daok di Hoa Kỳ. Thủ tướng brei thau, rahra drei daok di negar langiu dak harei dak tagok rilo manuac saong peih praong labik daok ngan haong labaih 6 triệu menuac di labaih 130 taneh ia saong bhum taneh, dalam nan hu 600 ribau urang lac chuyên gia, urang roh duah ilamo. Bruk ngak, labik dang saong angan je di urang Việt Nam daok di negar langiu dalam pak labik drei daok nan, daok hu pakhang saong patagok. Di mbang taom gaok, lambaok urang Việt daok di Hoa Kỳ brei mboh hatai bui sambai hadei di tuk Việt Nam saong Hoa Kỳ jeng dua taneh ia pambuak taong abih gah di gauk.

Mesup ini (18/9), Pasak urang kumei saong Patagok, di Kapul urang kumei Việt Nam pakat negar, pambuak bruk haong Kapul urang kumei tỉnh Bình Phước peih harei pataom “Pambuak gauk pandap panda – Patagok kaya pandap bhum palei”. Ini lac bruk ngak dalam dom danak dak 8 “peih ngak bruk likei kumei samu gauk saong langyah samar drah dom bruk brei hu di urang kumei saong uranaih” di danak dak bruk ngak negar cakrok KTXH bhum bangsa takik saong bhum ceik. Dom bruk ngak ini hu peih tabiak dalam 2 harei, hu mbaok di 38 kapul nyaom, doanh nghiệp, sang pablei salih di urang kumei piah yaih khan dom bruk daong patagok bruk ngak mbang duah jien, ba drei tame haong puk palei saong jao giải bruk pakacah urang kumei padang mbang ngui thun 2023.  

Tỉnh Bạc Liêu hu labaih 20.700 baoh sang urang bangsa takik, meblah 9,2% rahra dalam tỉnh. Tui Sở Lao động - Thương binh saong Xã hội Bạc Liêu, dalam 6 bilan akaok thun, tỉnh hu ba bruk ngak ka 9.800 urang. Piah mek hu dom jak jeng nan, Sở Lao động - Thương binh saong Xã hội Bạc Liêu hu peih ngak rilo danak dak pathau khan piah tacei jalan, pato bruk ngak, bac bruk ngak, yaih khan bruk ngak ka urang ngak, abih di nyu nan lac urang bangsa takik. Akaok thun ini, tỉnh hu peih 3 mbang ravang iek tacei jalan bruk ngak, pambuak doanh nghiệp haong anek saih, sinh viên dalam dom labik pato bruk ngak, di doanh nghiệp saong urang ngak. 

UBND tỉnh Gia Lai bahrau tabiak jalan kuhria peih ngak Festival kong chiêng thun 2023 ngan saong kadha “Gia Lai - dom ilamu gheih mekre", tui kuhria hu peih tabiak dalam 2 harei lac harei 11 saong harei 12/11 tal, di ban Pleiku. Bruk bahrau di Fetival mbang ini, lac tỉnh Gia Lai ieu pataom yaok huyện sa kapul nghệ nhân hu mbaok tame. Dom kapul nghệ nhân hu padang ngak saong brei mboh veik dom bruk yau ye: taih kong chiêng; ramik chiêng, sarak rup kayau, menyim khan bai, pak yot saong dom bruk ngak meng tangin takai di saman dahlau… Abih di nyu lac dalam Festival thun ini, kalup kapul kong chiêng kumei palei Leng, xã Tơ Tung, huyện Kbang hu labaih 50 menuac hu parang me-in dom kadha chiêng biak gheih. 

Pachreih tui bruk “Abih gauk dalam taneh ia ba tangin tame daong urang kan kathaot – oh caik thei daok veik gah likuk”, Mban Thường trực Ủy ban MT negar Việt Nam huyện huyện Đăk Tô, tỉnh Kon Tum saong mBan jak ba Kadung jien “kayua urang kan kathaot” di huyện, bahrau peih Mbang jao alin 10 gu limo manek ka 14 baoh sang di 9 xã, ban sit dalam huyện. Ini lac paok pandap kayua Dhar Xăng dầu Kon Tum daong brei, haong yaom jien abih tih lac labaih 200 triệu đồng. Yaom jien ini hu rik daong oh sit haong kanja, MT negar Việt Nam dom pakat huyện Đăk Tô piah daong ka dom baoh sang daok gaok rilo kan kandah dalam raidiuk.  

Karja Campuchia brei thau, labik khảo cổ Koh Ker  di taneh ia ini hu ba tame harak angan inem krung dunya di UNESCO, tui nan, dom inem krung ilamu vật thể di Campuchia dalam harak angan hu tagok jeng 4. Bruk pok brei angan nan ka Koh Ker, brei mboh takai yam khang brei mboh panuac sanya di Rajaei Campuchia ka bruk khik ramik inem krung ilamu, saong lac tukvak njauk hadar kanal dalam bruk pok brei angan ka inem krung di Campuchia anaok dunya. Daok di quận Cu-lem gah tây bắc tỉnh Preah Vihear, atah di Xiêm-riệp 140km nao gah Timur, Koh Ker hu dom inem mek khảo cổ, dalam nan hu dom baoh kandhi hu padang ngak biak gheih, labik khik ramik Xi-va-lin-gát biak mekre, jeng yau dom danak dak duh ka raidiuk bhap bini yau ye bingun, danao, binek padang ia. 

Thụy Điển hu taong yaom lac sa taneh ia dang ka 1 ka chất lượng raidiuk, saong lac taneh ia siam abih di dunya ka yaom jien sahui pandar cai mbiah, lagaih. Tapa pasang iek mboh lac, yaom jien sahui pandar cai di Thụy Điển biar jang labaih 20,9% dut saong di Mỹ, dalam tuk nan, yaom pah sang daok bier jang 57,5%. Thụy Điển jeng hu angan ka bruk sangka prein yava saong ba c ta-a đại học oh abih jien saong hadah mbaok mata lac sa dalam dom labik hu umo thun glaong di abih, umo thun tui kuhria lac 82,8. Dang ka dua lac Na Uy, taneh ia ini ba akaok nao dahlau dalam bruk samu gauk di urang likei saong kumei. Canada dang dhi ka klau taneh ia hu chất lượng raidiuk siam di abih.

Tapon nyaom bol pan phao kraong Philippine harei kabroi brei thau, langiu di Japon saong Australia, hu rilo taneh ia karei lac Đức, Canada saong Prang jeng daok caga hu mbaok tame khik iek bruk pajeng ba jalan tasik haong gauk haong Phi-líp-pin saong Mỹ di Biển Đông. Dom bruk khik iek nan piah ba gauk jhul patagok adat hukum dunya saong khik kajap sron mbon di bhum Ấn Độ Dương - Thái Bình Dương. Philippines hu brei adat ka Mỹ pandar 4 căn cứ di dom labik hu makna praong di taneh ia ini di akaok thun ini, tui nan, abih tih dom căn cứ Mỹ hu brei pandar tagok tal 9 labik quân sự tui harak sanya pambuak bruk quốc phòng patagok thun 2014. 4 căn cứ bahrau jeng daok di labik hu makna biak praong./.