Pambuak tal bruk khuah chung cu mini di quan Thanh Xuân, ban Ha Noi, page ini, Thu tuong Phạm Minh Chính mbaoh tangin tame Công điện payua tal Akok Mentri Kong an saong Akok UB bhap bini dom tỉnh, ban di T.Ư ndem cambaic laic: Bruk khuah sang bhap bini ( sang glong 9 tal, sa sang pacang angaok tabung) di ban Khương Hạ, quận Thanh Xuân, ban Hà Nội melam 12-9 lac bala khang, ngak rilo urang urang metai saong njauk rambuac. Lambaok Rajaei, Thu tuong Rajaei payua panuac tangi sua, klak rabha dom pandik harao haong gauk gar, baoh sang urang gaok bala apui khuah di ban Khương Hạ. Thu tuong tacei ba Ban Ha Noi peih bruk nao rivang, pachreih ba, daong pandap panda ka baoh sang urang gaok bala; pambuak bruk tani tanat haong Mentri Kong an tacei ba dom gah pataom tame pasiam bruk hadei bala, samar duah thau bruk ba tal khuah.

Kapul urang praong thun TP.HCM bahrau pok mayaom 37 urang praong thun hu angan je ngak mbang naih joi tukvak 2018-2023. Dalam ban urak ini hu labaih 16.300 urang praong thun (rilo meng lac meng umo 60 tal 70 thun) daok hu mbaok tame ngak mbang, pablei salih, dịch vụ. Dom urang ini lac po trang trại, po doanh nghiệp, ba bruk ngak yaok harei, hu jien mek tame tani tanat ka labaih 124 ribau urang ngak. Mban lambaok Kapul urang praong thun TP.HCM jeng ieu kakei Gilang paraik kanja pato tacei dom gilang dhar pablei salih njauk pasang iek brei ka urang umo meng 60 tal 70 thun, hu prein yava siam, hu jalan ngak lagaih lac hu masaiy jien piah peih praong bruk ngak mbang, pablei salih.

Sang iek ruak Quân y 175 pambuak haong Sang iek ruak Đa khoa tỉnh Bình Phước caga peih bruk dut iek ruak, tacei pato, blaic raic meta oh abih jien ka dom urang dalam sarak, urang bangsa takik hu raidiuk kan kandah di tỉnh Bình Phước. Ngan haong kadha “ Hadah hadai meta Viet”, tui kuhria mboh dahlau brei blaic raic meta meng ky thuat  Phaco oh abih jien ka 60 urang lac dalam sarak karja, bol bhap bangsa takik  hu raidiuk kan kandah. Danak nan piah  daong ka urang ruak đục thủy tinh thể meda hadah meta, trun naong trak jien iek ruak dalam tuk bruk ngak mbang duah jien kan kandah.  

Anak bruk njom mbak jit ruak tangin takai cambuai daok tagok, Akaok UBND tỉnh Ninh Thuận hu ieu kakei dom sở, dom gah pambuak tal saong kanja dom palei paglaong dom jalan pacang caga jit ruak, patakik bruk njom mbak ruak; abih di nyu nan lac oh caik rahtabiak dom bruk metai lahik. Dalam tuk nan, dom bhum palei njauk caga dahlau pambuak haong gah y tế peih dom bruk pacang caga jit ruak dalam rahra, yau ye Danak dak hacih saat alam môi trường, pametai anek ruak, caga dahlau jalan pacang caga jit ruak tangin takai cambuai”, “danak dak daong sabon ka dom baoh sang kan kandah piah pacang caga jit ruak tangin takai cambuai”. Kuhria tal harei 5/9, dalam tinh hu 394 urang njauk ruak tangin takai cambuai, oh hu urang halei metai.

Haduh hatai, sahaneng huac nan lac bruk di yaok rituh baoh sang bhap bini di kaoh pulao Long Trị, tỉnh Trà Vinh anak bruk glut jaleih  daok rah tabiak jhak. Ia tagok glong, glut jaleih taneh atah labaih 90m. Hu dom jalan glut jaleih lih tame dalam taneh meng 20 -30 m. Kaoh pulao Long Trị hu labaih 400 baoh sang daok jaik nan, gam haong nan rilo sang bac  saong dom danak dak duh ka bhap bini. Mikva caong khin, glut jaleih taneh samar hu ngak pasiam veik piah raidiuk di kaoh pulao oh daok  huac tuk ia tagok glong, ia nduac khang.

Triều Tiên bahrau cuh sa tên lửa đạn đạo ka oh thau cambaih lac janih hagait meng labik takai tasik gah Timun negar ini. Bruk cuh tên lửa hu peih tabiak dalam tuk Akaok negar Triều Tiên Kim Jong Un daok hu mbang nao rivang camriep abih tal Nga hadei di 4 thun. Tui urang pan akaok negar Triều Tiên, mbang rivang lac bruk brei mboh ka makna praong di talei pambuak bruk di Triều Tiên saong Nga.

Tapa bruk duah thau hatai sahaneng manuac sia kayua Reuters peih ngak, brei mboh lac menuac pachreih tui Tổng thống Mỹ Joe Biden tagok 42% nan lac glong abih kuhria meng bilan 3 thun 2023. Labaih 80% urang taduan lac “ urang đảng Dân chủ’ brei mboh njauk hatai haong bruk ngak di Tổng thống Biden kuhria meng tuk ong tagok pan kaok di bilan 1 thun 2021. Bruk duah thau jeng brei mboh bruk kinh te jeng daok lac bruk caik hatai dang akaok di urang Mỹ, tuk 23% urang hu tangi sua brei thau ini lac “bruk praong abih bo taneh ia Mỹ daok dang anak urak ini”.

Minti Pato magru Trung Quốc tabiak panuac lac dom labik pato langiu maong oh hu harak adat meda njauk phat tal 100.000 nhân dân tệ (samu labaih 331 triệu đồng). Jalan ngak ini piah pasiam veik gah pato magru, daong patrun trak damak bruk bac taa ka anek saih. Thun 2021, Trung Quốc hu ba tabiak dom adat biak catang piah pasang iek veik gah pato langiu maong eng drei peih daok tamuh tabiak, hu yaom tal 120 tỷ USD. Bruk ngak ini piah patrun trak damak ka ranaih, gam jhul patagok bruk menek di taneh ia tapa bruk trun jien cai pandar dalam sang./.