Harei 17/11, Thủ tướng Rajaei Phạm Minh Chính saong Kapol urang Quoc hoi Ban Cần Thơ hu taom gaok cử tri 3 quận, huyện Ninh Kiều, Phong Điền saong Cái Răng, hadei di mbang nyaom ka 4, QH mbang XV. Di var taom gaok rilo cử tri  Cần Thơ hu pok panuac tagok Thủ tướng ka bruk sang daok xã hội ka urang ngak jien duah tame takik. Brei panuac jalei cử tri, Thủ tướng Phạm Minh Chính brei thau, meng blaoh Rajaei hu ginum biai kadha nan saong daok padang takik abih 1 trieu baoh sang ka urang jian duah tame biar, daok ramik pasiam dom kadha hukum ka taneh riya, padang ngak piah langyah dom tavak taviay. Langiu di nan, bruk ngak hukum, hu sarak apah, blei saong papah blei sang daok xã hội brei ka urang ngak hu jien mek tame takik.

 Dahlau di tuk pahadar 100 thun Harei menek aruah Thủ tướng Võ Văn Kiệt (23.11.1922 - 23.11.2022), UBND tỉnh Vĩnh Long hu peih bruk taduan mek Bằng xếp hạng inem krung pakat negar ka labik pahadar Thủ tướng Võ Văn Kiệt haong Đình Bình Phụng di huyện Vũng Liêm, tỉnh Vĩnh Long. Dua labik pahadar ini, lac “labik bhong meriah” hu rilo yaom glaong sajarah, hu rilo makna, njauk pok angan piah khik ramik yaom glaong sajarah - ilamu piah pato pakai hatai anit taneh ia ka dom rai rah harei ini saong harei hadei.

Tui Tổng Liên đoàn Lao động Việt Nam, mbiah tal ini hu 25 tỉnh, ban, đơn vị khan brei thau hu urang ngak njauk gaok kan kandah dalam dom bruk ngak nan lac: ngak pandap meng kayau, jhik menyim, kalik takhaoh; điện tử, pandap mbang, dịch vụ, dulich...Dom D.N, urang ngak gaok kan kandah lac 441 D.N, ralo pataom tame gah meraong Negar. Hu 31.370 urang ngak brei padeih pambuak sarak ngak bruk saong labaih 31.000 urang ngak padeih bruk oh hu jien bilan, padeih ngak tui sarak pambuak bruk. Abih di nyu, hu tal jaik 90.000 urang ngak  tavak sre BHXH, BHYT saong BH lahik bruk ngak ngan haong yaom  jien labaih 2.000 tỷ đồng.

24 janih pandap mai meng 4 labik dalam tỉnh Hậu Giang bahrau hu pok brei angan lac OCOP pakat tỉnh. Yau nan, tal harei ini, Hậu Giang hu 150 janih pandap hu brei angan lac OCOP pakat tỉnh. Tui ong Trương Cảnh Tuyên, Phó Chủ tịch Thường trực UBND tỉnh Hậu Giang, jaik abih dom menuac ngak dom pandap nan, jeng hu hatai sangka dalam bruk ngak tabiak pandap OCOP ka labik di drei, meng nan chất lượng saong mẫu mã di pandap pabak hu bruk ba tabiak. Abih di nyu nan lac, pok meyaom rilo menuac ngak tabiak pandap OCOP bharau ka puk palei yau: Sabon raco kaok dược liệu N22, bimao pong tame pa-op, tamekai oh hu asar Bình Kỳ...

Công an tỉnh Đồng Nai pambuak saong Chi cục Thú y tỉnh duah mboh labik blei, sơ chế labaih 2,2 tấn manuk metai mbau bruk daok caga ba tabiak pablei di darak pasar. Labik nan kayua muk  Trần Thị Ngọc Thương (daok di quận Bình Tân, TPHCM) ngak po. Muk Thương brei thau dom manuk metai nan blei di dom var raong manuk di huyen Định Quán, yaom 4.000 đồng sa kilo. Hadei di nan, pajeng ba mai ngak hacih bilau, blaoh palih tabiak ba nao pablei dalam Đồng Nai saong Ban raya, ralo pablei ka dom labik ngak giò, chả.

Yaom lac hu dom cảnh báo di Mỹ, min Triều Tiên jeng daok cuh iek tên lửa đạn đạo jalan katut tabiak bhum tasik gah Timur. Bol lin Hàn Quốc samar hu panuac brei mboh hatai suh sah ka bruk cuh tên lửa bahrau abih ini di Triều Tiên, mboh lac bruk ini nyu ngak brei srau kadau bhum taneh ini. Gam haong nan brei thau lac, daok caga mesruh abih gah saong tui iek catang dom bruk ngak di Triều Tiên. Dalam tuk nan, Mintri Ngoại giao Mỹ tabiak panuac brei thau veik bruk sanya di Mỹ ngan saong an ninh di Hàn Quốc.

 Labaih 500.000 anek saih Hàn Quốc tame pakacah palih ruah đại học Quốc gia, mbang pakacah hu makna praong abih dalam thun di Hàn Quốc. Rajaei Hàn Quốc hu peih ngak rilo jalan đặc biệt piah khik ka anek saih  oh gaok kan kandah dalam tuk ngak bài pakacah. Dom baoh sang pablei salih  jaik labik pakacah brei kareih pabah mbang. Oh brei kapal haok  par tagok atau par trun dalam tuk ngak bai pakacah pang sap Anh, dalam tuk dom kapal haok  daok par njauk par chế độ cang,  glong takik di nyu 3km.

Liên minh châu Âu (EU) brei thau lac caik tabiak labaih 1 tỷ USD daong ka bruk khí hậu piah daong dom taneh ia di châu Phi patagok prein pacang anak bruk kan kandah dak harei dak tagok meng bruk pandiak tagok di dunya. Bruk ini hu ba tabiak di dom mbang ginum biai dalam Nyaom biai mbang ka 27 dom gah hu mbaok tame Công ước khung của Liên hợp quốc ka biến đổi khí hậu (COP27) daok rah tabiak di Ai Cập./.