Hu mbaok di tuk tabiak bruk ba tabiak negar langiu dom container di akaok thun anek sak tapai 2023 di pabah lamnge Tân Cảng Cát Lái, di Tổng công ty Tân Cảng Sài Gòn, Quân chủng Hải quân, di bier harei 29/1, Thủ tướng Phạm Minh Chính ndom lac: Kol drei mboh dom container pajeng pandap pablei tabiak negar langiu di akaok thun sak tapai 2023, ba tui dom hatai caong, jia tame sa thun ngak bruk, pablei salih biak tani tanat, jak jeng, ngan haong kim ngạch tagok khang. Thủ tướng brei thau lac, rajaei, Thủ tướng Rajaei daok patui jalan klah rabha, caik hatai tui pang, samar drah ngak bahrau dom jalan ngak, sarak, pasiam bruk buh jien tame pablei salih saong hu jalan daong samar drah piah lang talaih dom kan kandah, ba kein lagaih ka doanh nghiệp cak rok patagok.

Tui Mintri LĐTB&XH, bruk kurang urang ngak dalam Quý 1 haong Quý 2 thun ini rilo meng mboh di dom bruk ngak yau ye: jhik menyim, takhaok klik, kadung bak saong dom bruk gah ngak pandap pablei tabiak negar langiu, rilo meng lac di doanh nghiệp FDI. Daok doanh nghiệp dân doanh saong gah Karja meda oh kurang urang ngak. Akaok Mintri LĐTB&XH Đào Ngọc Dung brei thau: Kurang urang ngak rilo meng mboh di dom tỉnh gah Meraong, abih di yu lac di ban raya HCM, Bình Dương, Đồng Nai, Tây Ninh… Kayua yau nan ye, anak tal, brei kuhria mboh dahlau ka nyu cambaih bruk caong hu urang ngak, rami ramik darak pasar; labik ngak kong saong dom janih doanh nghiệp.

Dalam quý I/2023, dom doanh nghiệp dalam tỉnh Bình Dương caong  pilih ruah labaih 10.000 urang ngak piah khik tani tanat bruk ngak. Piah pabak samu ka caong khin pilih ruah urang ngak ka dom doanh nghiệp di pak ini, Sở Lao động, Thương binh saong Xã hội pato tacei Pasak Dịch vụ bruk ngak tỉnh paglaong dom bruk ngak gah khau tin darak pasa urang ngak. Gam tui di nan, Sở Lao động-Thương binh saong Xã hội meda patui veik pato tacei doanh nghiệp peih ngak siam dom sarak jien bilan, jien thuong, dom chế độ phúc lợi ka urang ngak piah khik takai urang ngak pambuak haong doanh nghiệp, gam tui di nan jeng piah dui pachreih hu urang ngak daok caong pilih ruah.

Dalam tuk Tết Nguyên đán 2023, TP.HCM dui pachreih hu labaih 2 triệu mbang tuai dunya saong tuai dalam taneh ia, daong ka gah du lịch mek tame hu yaok rabau tỷ đồng. Dalam nan, tuai dunya mai tal TP.HCM tui kuhria hu jaik 65.000 mbang. Tuai di dom labik ravang iek, labik me-in sambai saong dịch vụ… hu jaik 1 triệu 700 rabau mbang. Jien mek tame hu jaik 6.300 tỷ đồng.

 Tui Mintri Y tế, hu jaik 3.500 urang njauk tame sang iek ruak kayua taong paoh gauk dalam tuk Tết nguyên đán. Yaom lac trun hasit dut saong thun dahlau, min hu 11 urang metai. Langiu di nan, dom urang tame cấp cứu kayua gaok bala jalan mbak di dalam taneh ia lac jaik 30.000 urang, tagok dut saong thun dahlau lac 10%. Dalam nan meng bingun 5, 6 rahra mai gilac dom ban praong tagok glaong, nan ye dom urang tame cấp cứu kayua gaok bala jalan mbak jeng tagok tui.

Mintri jalan mbak Prang brei thau, bruk nao mai di taneh ia ini meda klaih klaoh khang di harei 31/1 kayua dom bruk đình công dalam negar oh njuak hatai haong bruk rajaei brei salih karei bruk jien bilan padeih hưu. Dahlau di nan, harei 19/1 meng blaoh, labaih 1 triệu urang Prang hu mbaok tame sa bruk trun jalan, padeih ngak bruk piah phản đối mbang camereip, ngak brei dom radaih pajeng tuai di rilo ban praong di Prang oh peih nduac, dom sang mac halang menyek njauk pacang veik.

Mintri pato magru Đại học di kanja Taliban hu payua pathau khan tal dom sang bac đại học, dalam nan ieu kakei dom anek saih kumei oh tut angan hu mbaok tame pacacah đại học tui kuhria hu peih tabiak di bilan anak tal. dahlau di nan, urang par akaok kanja Afghanistan hu ba tabiak harak pakauk urang kumei ngak bruk dalam dom kapul langiu di rajaei. Meng di tuk 15/8/2021, kanja Taliban hu pakauk uranaih kumei bac trung học, patakik quyền tự do nao mai di urang kumei saong ranaih kumei, yah klaak urang kumei tabiak truh gah kinh te saong pakauk urang kumei nao tal công viên, bilik pahat rup saong sang manei pataom rilo manuac.

Takik di abih 41 urang metai hadei di tuk sa sruh radaih pajeng tuai laik trun tatua di tỉnh Balochistan, Tây Nam Pakistan. Makna tuk camereip mboh lac kayua urang peih radaih nduac samar jang. Gah chức năng brei thau, bruk daong menuac njauk bala daok rah tabiak dalam samar drah. Tuk radiah laik trun, mangaok radaih hu jaik 50 urang. Urak ini, 3 urang daok diuk hu duah mboh./.