Kuhria tal biar harei sup kabroi 9/9, ribuk saong hajan hadei di rabuk ka 3 ngak brei 68 urang matai saong lahik, jaik 250 urang njauk rambus. Piah samar tani tanat raidiuk saong bruk ngak mbang di bhap bini, Thủ tướng hu công điện ieu dom mintri, dom tinh ban pambuak tal, samar pajeng ba pandap panda kaya mbang, ia menum, ia hacih… brei ka bhap bini bhum daok njauk pacang cakak, bhap bini daok kurang pandap mbang, ia menyum … dalam tukvak samar drah di abih. Pasang iek, samar ramik pasiam veik dom bilai y tế khut tayah piah samar daong ka dom urang njuak rambus saong iek glang prein yava di bhap bini. Dahlau di nan, Thủ tướng jeng brei daong samar drah 100 tỷ đồng ka 5 palei piah pasiam dom khut tayah, tani tanat raidiuk bhap bini, lac: Nam Định 20 tỷ đồng, Thái Bình 30 tỷ đồng, Hải Dương 20 tỷ đồng, Yên Bái 20 tỷ đồng, Hưng Yên 10 tỷ đồng. 

Urak ini hu 100 urang halan hatian di tỉnh Thừa Thiên Huế tut anagn nao tal ban Hải Phòng saong Quảng Ninh – dom labik njauk khat lahik trak, piah daong ka mikva pasiam dom khut tayah kayua rabuk ka 3. Dahlau di nan, kapul nao duah thau dahlau di tỉnh Thừa Thiên Huế hu nao tal Hải Phòngpiah pasang iek jalan pambuak gauk haong palei. Kapul jeng hu ba tui dom jamriak piah daong halang ia, puh ramik haci hacih.  Dom gah di tỉnh Thừa Thiên Huế jeng hu mbaok di dom tỉnh gah brak piah daong bruk hadei di bala meng langik tasik. 

Piah jhul khang bruk ba ứng dụng công nghệ số tame raidiuk, urang pan akaok tỉnh Đồng Tháp ieu dom gah, dom pakat sangka daong, pachreih dom Kapul Công nghệ số patui jalan abih drei ka bruk dak padang “công dân số” di tỉnh. Urak ini, Đồng Tháp hu labaih 760 Kapul Công nghệ số bhap bini daok di puk, palei, xã, phường, haong rilo bruk ngak kein lagaih. Piah ka bruk salih số hu pambak tabiak praong dalam tal bhap bini, Kapul Công nghệ số bhap bini hu nao tal yaok jalan, yaok sang piah tacei pato bhap bini pandar dịch vụ công online, bayar jien min oh pandar jien mbaok.

UBND quận Bình Thạnh, TP.HCM bahrau tabiak harak brei padeih bruk ngak di cơ sở daong bruk xã hội iek glang uranaih Chúc Từ, hadei di tuk rahra brei thau bruk taong uraniah sraiy darah cambuai, labik ini taduan iek uranaih oh ka hu harak khai sinh. Dom gah chức năng quận Bình Thạnh hu pasang iek 2 mbang labik ini saong mboh lac oh khik kajap bruk ngak tui adat; oh pabak hu harak gar pambuak tal bruk taduan saong khik ramik, ba pandar jien, pandap urang ngak pahal daong brei, oh hu labik tahanek mbang karei… nan ye quận Bình Thạnh brei padeih bruk ngak di labik ini saong samar drah brei ba 22 uranaih nao Pasak raong pato uranaih Linh Xuân, TP Thủ Đức.  

Kayua hajan rabuk gam gam dalam tukvak tapa nan ye yaom tabau di tỉnh Hậu Giang trun khang. Tuk akaok vụ, tabau pablei yaom meng 1.900 - 2.200 đ/kg. Tui yaom nan, urang pala tabau hu jien mek tame meng 100 triệu đồng tal jaik 145 triệu đồng/ha. Min tuk ini, kayua hajan rabuk, yaom tabau trun khang, nan ye jien mek tame di mikva jeng trun tui. Bilan tabau thun 2023-2024, tỉnh Hậu Giang trun pajaih hu 3.200ha, tal tuk ini, urang pala tabau kaoh pablei hu jaik 1.000ha.  

Pandiak khang saong thu lagu ba tal khuah glai praong di grauk bhum gah pai taneh ia Mỹ, ngak brei yaok rabau menuac nduac nao daok labik karei. Di Nam California, sa mbang khuah tamuh tabiak di harei 5/9 tal harei ini jeng oh ka padam hu. Pui mbang abih 71 km2, karja brei panduan ba labaih 11.000 menuac. Di rilo labik karei, pui khuah sit jeng oh ka padam hu tuk langik pandiak thu gam haong ngin rabuk gam gam rah tabiak. Tui kuhria, nhiệt độ glaong 40-43 độ C jeng daok mboh di gah pai taneh ia Mỹ dalam dom harei tal. 

Pandiak bhang dui atah meng kreh thun 2023 saong hajan takik ngak brei ia kraong Amazon di Brazil trun samar, pacang jalan dom sà lan pajeng ngũ cốc piah pablei tapa negar langiu saong cakak klaoh dom labik pagam pambak tame bruk pajeng ba jalan kraong. Rilo labik di Brazil, bhap bini oh nao mai hu angaok jalan kraong dalam bhum Amazon. Karja rilo palei brei thau ka bruk samar drah gah alam môi trường saong ieu bruk daong di dom kapul langiu rajaei daong brei ia menyum.

Karja palei di Trung Quốc daok duah thau bruk sa urang likei praong thun metai 13 harei hadei di tuk buac 23 baoh tagei saong ngak 12 baoh tagei ja dalam sa harei nan. Anai Shu, urang anek kamei di ong nan hu ngak harak khiếu nại tagok Sở Y tế ban Vĩnh Khang, tỉnh Chiết Giang, ndom lac sa labik ngak tagei di palei ba tal bruk matai di ame di nai. Dahlau di nan, ame di anai jeng pandiak harao khang dalam luac 13 harei puac rai di drei, dahlau di tuk pandik baoh hatai saong metai di harei 28/8 meng blaoh./.