Dalam mbang nyaom di Thuong truc Rajaei ka dom asar kadha hu makna praong peih tabiak di biar harei kabroi, Thu tuong Phạm Minh Chính ndom lac, “brei ba bruk siam mekre salamat saong prein yava di bhap bini tagok dang kaok, dahlau di abih”, “oh caik ka thei eik lipa, la-ar, mehu ia, oh hu labik daok”, nan ye, hu iew dom mentri, dom gah, jabat, karja brei peih bruk khik iek luac harei melam piah khik caga, langayh  dom bruk samar drah. Thu tuong ieu  pataom tame daong urang gaok bala, urang daok lahik; daong dom urang njauk rambuac; kuhria ngak ndam ka urang metai; samar tani tanat raidiuk, duah yaok jalan, yaok mac moc radaih piah daong pandap pandar ka labik daok njauk pacang cakak, abih di nyu lac pandap mbang, ia menyum, jru tavao…  

Kapul Ngoại giao Hoa Kỳ daok di Việt Nam, tapa Jabat Patagok Dunya Hoa Kỳ (USAID) brei thau lac brei pabak 1 triệu đô la daong ngak pahla samar drah piah daong ka Việt Nam pasiam dom khut tayah praong kayua rabuk Yagi ba mai. Paok jien daong nan hu parabha tal dom gah pambuak bruk di Việt Nam pabak labik plaih bala, ia hacih, saong dom bruk daong karei langiu di pandap mbang piah daong tame dom kham merat pasiam veik dom khut tayah meng bala di langik tasik di Việt Nam; gam daong paglaong prein pacang biến đổi khí hậu saong patagok prein pacang bala meng langik tasik ka bhap bini dalam taneh ia. 

Ribuk ka 3 saong ia sua ngak kan kandah tal bruk pabak brei, pajeng ba pandap panda ka dom labik di dom tỉnh, ban gah Brak negar njauk klaik klaoh. Rilo doanh nghiệp pabak pandap mbang, pandap pandar yaok harei di TPHCM daok pabak rilo jang 3 mbang dut saong bilan harei ka dom tỉnh ban gah Brak negar. Lambaok Liên hiệp Hợp tác xã Thương mại TP.HCM (Saigon Co.op) hu patagok pandap pabakrilo jang 3 mbang dut saong  yaok harei. Kapol padai brah pandap mbang menyum TP.HCM hu jaik 2.000 doanh nghiep jeng daok patagok pandap panda saong radaih pajeng ba piah pabak sumu daong ka urang bhum ia sua. Dom doanh nghiep oh  brei tagok yaom pablei pandap.

UBND tỉnh Đồng Tháp bahrau peih bruk brei thau harak di Thủ tướng rajaei pok brei huyện Lấp Vò mek hu chuẩn palei pala bahrau. Tapa labaih 13 thun padang ngak palei pala bahrau, huyện mek hu taong abih 9 tiêu chí huyện palei pala bahrau tukvak 2021 - 2025, dalam nan hu rilo kadha ngak tapa bruk ba tabiak. Ong Phạm Thiện Nghĩa, Chủ tịch UBND tỉnh Đồng Tháp brei thau, thun ini, Đồng Tháp hu veik 3 huyện mek hu angan palei pala bahrau lac Châu Thành, Lấp Vò, Lai Vung, saong Đồng Tháp jeng lac sa dalam 21 tỉnh, ban dalam taneh ia hu taong abih dom xã mek hu angan palei pala bahrau.

Sở Ngak nong saong patagok palei tỉnh Long An brei thau, urak ini dom danak dak ar pacang glut jaleih daok tavak mbaok taneh, kayua oh ka hu jao brei taneh. Nan ye, So Ngak nong saong patagok palei tinh hu panuac lac meyah dom puk palei oh ngak salah bruk jao brei mbaok taneh, jao brei taneh piah ngak, sở meda pathau khan tagok UB bhap bini tỉnh Long An brei pasang iek piah kuhria bayar  phun jien. Gam haong nan, brei jao dom labik daok tavak veik ka UB bhap bini dom huyện pandar phun jien di palei piah peih ngak veik.

Ceik pui Kalaon angaok pulao Negros di Philipin nyu medeih veik dom harei tapa ngak brei karja palei brei kreik pabah mbang dom tal bac, brei padeih dom mbang par saong panduan ba rahra tabiak truh labik vil val nan. Yaok ratuh baoh sang daok jaik ceik pui Kalaon njauk tabiak truh sang danaok, daok tạm di dom lều bạt gah dalam dom sang bac tiểu học. Karja palei brei kreik pabah mbang yaok tal bac piah khik salamat ka gru pato saong anek saih. Gah tui iek bruk langik tasik di taneh ia ini khan lac dalam dom harei anak tal, meda hu 2 mbang rabuk khang bahrau hadei di rabuk khang Yagi.  

Dalam harak ndom puac hu makna praong ka jalan ngak bruk pakat negar tukvak anak tal, urang dang akaok Triều Tiên Kim Jong-un  ieu brei patagok taong abih gah kinh te saong pakhang pakajap quốc phòng, dalam nan hu bruk ngak brei siam prein khang gah hạt nhân. Ong Kim Jong-un ieu ngak brei siam prein khang gah hạt nhân di Triều Tiên piah khik salamat taneh ia, palei negar. Ong ndom lac, hu prein khang gah bol bala quan su lac khik hu salamat taong abih jeng yau patagok di taneh ia.

Indonesia pakauk oh brei padang hotel, biệt thự, hộp đêm di dom labik angaok pulao yu lit Bali piah langyah bruk cakrok tapa tanut ba tabiak. Adat pakauk ini lac sa dalam dom kham merat di rajaei piah salih bharau yu lit di Bali- lac sa dalam dom labik yu lit dui pachreih tuai di Indonesia. Gam haong nan, daong paglaong siam mekre saong bruk ngak di rahra dalam tuk daok khik hu ilamu pak nan di baoh pulao. Bali urak ini hu jaik 200.000 urang negar langiu daok diukrai, ba tal dom bruk yau ye kol duas, cakrok tapa tanut ba tabiak saong meriak gauk bruk ngak./.