Palei Làng Nủ hu 95 urang matai saong lahik kayua ia sua. Thủ tướng ieu brei pataom tame duah dom menuac daok lahik, rami ramik haci hacih pacang caga jit ruak, pasiam veik jalan nao mai. Rami ramik sang bac brei dom anek saih samar hu nao bac. Thủ tướng brei bruk ka tỉnh Lào Cai, pasang iek, duah labik salamat piah padang labik daok bahrau siam mekre salamat ka bhap bini daok pak ini, suai di abih lac tal harei 31/12.

Tập đoàn Vingroup saong dom công ty dalam hệ sinh thái tabiak panuac daong 250 tỷ đồng ka bhap bini daok njauk khat lahik kayua rabuk ka 3 saong hajan ia sua dui atah. Pok jien ini hu brei tapak ka bruk daong samar drah yau ye: padang veik 2.000 baoh sang glut jaleih, daong meng 150 - 300 triệu ka dom sang hu menuac matai, daong padang pasiam veik jalan mbak jeng yau dom danak dak dân sinh…, daong ka bhap bini samar tani tanat raidiuk  hadei di bala meng langik tasik. 

Pandap panda kaya mbang daong ngak pahla yaom 3 triệu đô la Australia hu mai tal Việt Nam piah daong pasiam dom khut tayah, khat lahik meng rabuk ka 3. Ngoại trưởng Australia ndom lac, Australia brei rik tame dom kham merat di rajaei Việt Nam saong dom kaya pandap ngak pahla ini, hu parabha tui bruk anak mata di dom tinh ban, dom puk palei. Urak ini, rilo taneh ia angaok dunya jeng daok daong jien saong pandap panda, kaya mbang tal Việt Nam.

Kapul daong uranaih jaoh jo Việt Nam pambuak bruk haong Ủy ban Mat tran negar Việt Nam TP. Cần Thơ peih ngak danak dak "Truac hadah hatai jia ka adei" mbang ka 9. Danak dak piah jak ba alin hadiah pandap, jien bac, daong blac raih, jalan ngak mbang duah jien ka 15.000 uranaih jaoh jo dalam taneh ia, dalam nan hu 1.300 uranaih jaoh jo sang kan kandah kham merat yam tagok di bhum ĐBSCL. Anak mata, dalam 1.300 pok pandap brei ka bhum ĐBSCL, TP. Cần Thơ hu 130 pok, 12 tỉnh daok veik yaok tỉnh hu 100 pok.. Yaok pok yaom takik abih lac 1 triệu đồng jien mbak saong saong dom pandap pandar yaok harei. Dak hu yaom jang tuk dom kaya pandap ini nao tal dom adei di tuk tame thun bac bahrau saong tuk Tết Trung thu.

UBND TP. Phan Thiết, tỉnh Bình Thuận kuhria peih bruk salam uan  Trung thu di harei 14/9 (lac harei 12/8 saka ia bulan) di jalan roya Nguyễn Tất Thành. Min dalam dom harei tapa, rabuk ka 3 ngak khut tayah, khat lahik biak khang ka dom tỉnh gah brak. Nan ye mBan peih bruk salam uan Trung thu tabiak panuac brei padeih ngak bruk bui sambai raok Trung thu di TP. Phan Thiết thun 2024. Ini lac bruk ngak bhian hu pok brei angan kỷ lục ka raok gom trung thu praong abih Việt Nam. Jien peih ngak bruk salam uan Trung thu thun 2024 hu tỉnh payua daong bhap bini gah brak.

Labaih 67 triệu urang Mỹ hu tui iek bruk ndom biai nao mai bahrau rah tabiak di Phó Tổng thống Kamala Harris di đảng Dân chủ saong Tổng thống dahlau daih lac ong Donald Trump di đảng Cộng hòa. Tui hãng tin CNN, 63% menuac sia mboh lac amuk Harris ngak siam jang, dalam tuk menuac pachreih tui ong Trump tok hu 37%. Dom bruk ndom biai nao mai di Tổng thống atau phó Tổng thống di Mỹ bhian oh pambak tal bruk pilih ruah di dom cử tri hu sanya blaoh min nyu pambak tal dom cử tri oh ka pilih ruah cambaih laih, lac dom menuac meda ba tal kết quả bruk pilih ruah thun ini. 

Anak bruk đình công oh ngak bruk dui atah di dom bác sỹ nội trú, rajaei Hàn Quốc saong đảng Quyền lực Quốc dân pan quyền njauk gauk brei daong jien padai piah pachreih jaik 8.000 sang iek ruak saong  bilai iek ruak taduan urang ruak mai iek ruak dalam luac tukvak padeih Tết Trung thu. Bruk oh ngak bruk dui atah di dom bác sĩ dalam tukvak tapa ngak brei urang duh hatai ka bruk klaih klaoh dịch vụ y tế dalam mbang padeih Trung thu jaik tal.

Karja Malaysia hu daong ka labaih 400 uranaih medil lac njauk lạm dụng tình dục di dom labik ngak pahla kayua sa kapul pablei salih dane angan pan akaok. Cảnh sát hu cap mek 171 urang, dalam nan hu dom gru pato hukum Islam, tapa dom mbang pambuak bruk haong 20 labik dalam 2 tiểu bang di Malaysia. Dom urang hu daong nan, lac 201 uranaih likei saong 201 uranaih kamei, umo meng 1 - 17, hadei di tuk urang jakar taduan hu panuac khan dalam bilan ini, ka dom bruk rapeik rapai, quấy rối tình dục di rilo labik ngak pahla./.