Mentri Pato megru brei thau, thun 2023, oh ba tabiak quy chế palih ruah birau saong palih ruah đại học meda hu dom rami ramik veik ka lagaih saong bruk di anak meta. Mbang pakacah taong yaom prein bac kayua ĐH Quốc gia Ban raya HCM peih ngak thun 2023 parabha jeng dua mbang. Mbang ka sa di bilan 3 saong mbang ka 2 di puac bilan 5. Langiu 17 tỉnh ban  hu peih bruk pakacah thun 2022, sang bac ini meda praong veik labik pakacah di Bhum taneran kraong Cuu Long piah ba mbuan lagaih jang ka anek saih pakacah. Kadha birau lac ĐH Quốc gia Hà Nội saong ĐH Quốc gia Ban raya HCM brei mek bruk pakacah taong yaom prein bac di gauk piah anek saih klak di pakacah dua mbang.

Piah sangka urang đoàn, urang ngak dalam tuk Tết Nguyên đán thun sak tapai 2023, Tổng Liên đoàn Lao động Việt Nam kuhria peih meng 15 tal 25 danak dak “darak Tết Công đoàn” di dom tinh, ban hu rilo urang ngak, urang bangsa takik, bhum ceik, bhum tapen negar, piah pabak dom pandap  pandar yaok harei haong yaom lap; tacei jalan, iek ruak prein yava, brei jru, alin pandap ka dom urang ngak gaok kan kandah. Gam haong nan, brei radaih pajeng ba atau daong jien radaih , kapal ahaoh piah ba urang đoàn, urang ngak khin nao palei mbang Tết.

Sở Công Thương Ban raya HCM pok panuac tagok UB bhap bini ban raya padang kapol nyaom ngak bruk gah xăng menyek. Bruk ngak di Kapol lac khan ka UB bhap bini ban raya dom jalan langyah piah tacei ba bruk pablei salih xăng menyek ; ba tabiak dom jalan lang talaih kan kandah dalam bruk pablei salih, pabah xăng menyek dalam bruk ngak, thẩm quyền di ban raya. Tui nan, ba tabiak dom jalan  piah pasiam dom cuang kandah, tavak tavaiy,  ngak jhak tal bruk  pabak xăng menyek.

Urak ini urang nong di tỉnh Đồng Tháp trun pajaih hu labaih 57.000/191.500ha padai đông xuân 2022-2023. Min urang nong daok duh hatai kayua hajan khang gam haong ia tagok glaong ngak brei dauk mblang padai. Piah khik tani tanat bruk pala drak ka urang nong, Chi cục Pala drak saong khik caga phun pala kakei lac, dom mblang hamu hu yuak blaoh njauk ngak ka nyu hacih, kuac pon, khik tani tanat tukvak paatah di gauk lac 3 adit piah cakak klaoh ruak kik halak halin, pasiam taneh. Dom labik caga trun pajaih đông xuân njauk pasang iek catang ia tagok, halak halin tame gom saong njauk pataom gauk trun pajaih.

Bhap bini Khmer di tỉnh Sóc Trăng hu labaih 400 ribau urang, meblah jiak 31% bhap bini dalam tỉnh. Hu bruk sangka di Đảng saong Karja, urak ini baoh sang tapa truh kan kathaot yaok thun di bol bhap Khmer meng 3 tal 4%; 10/11 đơn vị pakat huyen hu padang Sang bac PT gam bac gam daok dom pakat. Dom labik iek ruak di bhum soc hu padang ngak praong laneng lanoi piah bhap bini nao iek ruak, taong ruak, takik nao tagok sang iek ruak atah pakat angaok. Abih di nyu lac, jalan mbak, điện, ia hu buh jien tame biak ralo piah ngak, daong ngak brei salih birau mbaok meta  bhum palei pala urang bangsa Khmer.

Nga hu panuac ieu Liên hợp quốc  daong palagaih ka taneh ia ini pablei tabiak negar langiu pandap mbang saong khak drak tui sanya. Dahlau di nan, Nga hu pambuak veik bruk hu mbaok tame sáng kiến Ngũ cốc tasik jhuk hadei di 4 harei brei padeih, piah trun trak damak  ka yaom pandap mbang saong patrun dom duh hatai ka sa bruk sarau kadhau pandap mbang di dunya. Sanya ini meda abih tukvak di harei 19/11 saong Nga hu panuac lac dom gah njauk ngak rilo jang piah khik kajap bruk pablei tabiak negar langiu dom pandap mbang saong khak drak biak praong di taneh ia ini, yaom lac daok hu dom adat taong phat di phương Tây.

Tui dom urang ilamo, di dom bhum ia kaoh hu nhiệt độ ôn hòa di Địa Trung Hải, dom glai san hô takaiy bhong saong ngu lac labik daok biak siam ka hệ sinh thái ini njauk mbong patih saong daok lamin lamuac, jeng dom mbaik talang thu lagu tuk nhiệt độ bilan pandiak tagok tal tanut glaong di abih. Langiu di san hô takaiy, bọt biển saong dom athur rup laman dua kanduh jeng njauk kan kandah. Dom mbang pandiak langiu tasik jeng ngak jhak tal dom labik raong trai mek ngọc, ngan haong 150 tấn trai pablei saong 1.000 tấn trai sit piah kuac mek di thun anak tal di Tây Ban Nha njauk lahik abih dalam bilan pandiak./.

 Urang lang: Thu Thảo & Bhumi