Mintri Pato magru (GD-ĐT) brei thau, thun bac 2022 - 2023 dalam taneh ia bahrau pilih ruah hu labaih 17 ribau gru pato, bahrau pabak hu 61% dut saong jalan ba tabiak. Langiu di nan, dalam taneh ia hu 74.172 biên chế gru pato hu jao meng dom thun dahlau min ka oh pilih ruah hu. Piah langyah bruk kurang gru pato, Mintri Pato magru pambuak haong Mintri Nội vụ likau jao pabak biên chế. Di jalan ba tabiak, meng urak ini tal 2026, Mintri Chính trị meda pabak jaik 66 ribau biên chế gru pato. Di suai lavik, Mintri Pato magru meda caong hu dom jalan langyah piah pabak, pasiam veik alam môi trường, kein lagaih piah ngak bruk, tani tanat raidiuk ka gru pato.

Thành đoàn - Hội đồng Đội TP.Cần Thơ bahrau peih bruk mek panuac brei thau di uranaih hu mbaok tame “Mbang nyaom QH uranaih” mbang ka I thun 2023. Hu mbaok tame, hu 80 uranaih lambaok ka jaik 150 rabau uranaih dalam ban. Danak dak ngak dreih yau dom mbang nyaom di dom urang QH haong cử tri dahlau di mbang nyaom QH. Pak ini, dom adei hu duah thau ka labik dang, ka bruk ngak di QH negar CHXHCN Việt Nam saong dom ilamu brei hu tuk jeng urang QH. Dom adei hu dang ngak iek urang QH saong brei thau dom hatai sahneng pambuak tal 2 kadha lac: khik caga uranaih hu siam mekre khang kadang di mangaok mạng saong pacang caga bala taong paoh, ngak pap uranaih.

Piah daong ka dom adei anek saih bangsa takik di dom huyện Lộc Ninh, Bù Đốp, Bù Gia Mập, Bù Đăng saong Hớn Quản gaok kan kandah hu bac magru siam jang, Kapul bol lin dahlau deih saong Kapul Doanh nhân bol lin dahlau deih tỉnh Bình Phước hu jao alin 292.000 blah tapuk, hu yaom 1,250 tỷ đồng. Tapa danak dak dui pachreih, daong ba danak dak bac magru di anek saih bhum mikva bangsa takik, bhum atah biyar, bhum tapen negar.

Tuk langik siam lagaih, urang ngak  nong dalam tỉnh Trà Vinh hu pataom tame peih praong taneh pala phun njam patam labaih 1.000 ha, patagok abih tih taneh pala njam patam dalam tỉnh labaih 23.800 ha, rilo jang tukvak ini thun blaoh labaih 1.500 ha. Bruk urang ngak nong peih praong taneh pala phun njam patam lac meng akaok thun tal ini yaom njam patam tuk halei jeng daok di tanut glaong. Sở Ngak nong saong patagok palei tỉnh kakei urang nong khang hatai salih taneh ngak padai, pala tabau tapa pala njam patam. Ini lac bruk ngak hu kein laba saong siam mekre salamat dalam tuk langik tasik oh lagaih yau urak ini.

Ong Huỳnh Văn Tèo- Akaok UBND ban sit Phước Long, huyện Phước Long, tỉnh Bạc Liêu brei thau, pak ini hu pacang mek hu ikan baja bo dahlau di nan hu manuac mboh kadon di mangaok kênh Quản Lộ- Phụng Hiệp gah nao tapa ban sit. Dahlau di nan di bier harei 29/8 tuk mboh drei ikan baja ndong tagok di akaok kênh 30/4, dom kapul hu pambuak gauk pasang iek, tal maong 8 melam meng cap mek hu drei ikan baja trak 14kg ini. Di harei 2/4/2023 rahra daok di puk Cái Tràm A1, xã Long Thạnh, huyện Vĩnh Lợi jeng duah mboh saong cap mek hu sa drei ikan baja trak labaih 20kg, atah labaih 1,6m.

Melam blaoh tui mon Việt Nam, menuac sia di dunya hu mboh “Ia bulan hijao” praong abih saong hadah abih dalam thun ini. Bruk nan oh lac takik hu, kayua nyu bhian rah tabiak 3-4 mbang dalam thun. Min ia bulan hijao tok hu 1 dalam 33 mbang hadah yau nan. Di mbang ini, Ia bulan hu gaok tal labik jaik baoh taneh abih di mangaok quỹ đạo, atah di kol drei labaih 363.711 km. Ia bulan meda mboh praong jang saong hadah jang jaik 7% duk haong ia bulan bhian mboh. Brei cang tal thun 2037, menuac takre thiên văn meng meda mboh hu ia bulan hadah yau nan.

Bol lin Hàn Quốc brei thau lac, Triều Tiên bahrau cuh sa tên lửa đạn đạo oh thau cambaih di gah bhum tasik di gah Timun negar ini, min oh ndem cambaih. Bruk cuh tên lửa di Triều Tiên hu peih tabiak dalam tuk Hàn Quốc saong Mỹ hu peih bruk pasram mesuh gam haong gauk yaok thun ba angan Lá chắn tự do Ulchi meng harei 22/8. Triều Tiên rilo mbang chỉ trích mbang pasram mesuh ini lac bruk ngak khiêu khích quân sự. Hàn Quốc saong Mỹ dalam adit ini jeng peih dom mbang pasram mesuh di mangaok langik pambuak gauk, ngan haong bruk hu mbaok di takik di nyu sa sruh kapar haok jalan ngak B-1B di Mỹ.

Uan harei negar (31/8/1957-31/8/2023), Thủ tướng Malaysia Anwar Ibrahim hu kadha ndom puac camereip abih dalam angan thủ tướng. Kadha nan ndom tal yaom glaong di bruk jum pataom dalam khik caga độc lập di taneh ia pamaong tal bruk ba Malaysia jeng sa taneh ia khang kadang. Ong Anwar Ibrahim ndom lac bruk ini meda ngak hu kayua Malaysia hu menuac ngak rilo, hu ilamu công nghệ khang, meda meriak gauk haong dom taneh ia karei di dunya. Gam haong nan, ndom lac pato megru la drap ar praong angaok jalan dak padang taneh ia khang kajap./.