Page ini (5/9), bruk peih mbaok tame thun bac birau 2023 -2024 hu peih ngak sumu gauk di dom sang bac dalam taneh ia dalam chreih chrai bui sambai, hala dok mereik, bingu hala hadah hadai. Meng ban sit tal palei pala, meng bhum ceik, kaoh pulao, anek saih dom pakat bac dalam negar  bui sambai mai sang bac akaok thun  bac birau. Akok thun bac birau, Akok negar Võ Văn Thưởng hu payua harak thư ka gah Pato megru. Dalam harak thư, Akok negar Võ Văn Thưởng kakei dom adei yaom lac umo thun halei, pakat bac halei; di bhum ceik atau bhum taneran, kaoh pulao atau bhum tapen negar; tuk halei jeng thau lac: bac megru  lac bruk hu makna praong dalam raidiuk. Akok negar mboh lac, Đảng saong Karja tuk halei jeng thau lac: pato megru lac bruk dang akaok dalam sarak negar, lac bruk di taong abih sang bac - baoh sang saong xã hội. Akok negar  caong khin  dom anai gru, cei gru: brei kham yam tapa kan kandah, tuk halei  jeng khik kajap bruk ngak, abih hatai haong bruk ngak.

Dom harei tapa, rilo sang bac dalam bhum ĐBSCL hu caga blaoh blai dom bruk ka thun bac bahrau. Di tỉnh Vĩnh Long, piah caga ka thun bac bahrau, dom sang bac kham merat rami ramik labik bac, parabha bruk, pato pasram dom gru pato, puh ramik hacih sa-at sang bac, labik bac, khik kajap salamat tuk taduan raok anek saih. Piah daong ka anek saih kan kathaot hu nao  bac, meng 1 bilan dahlau, gah pato megru hu jak ba dom doanh nghiệp, dom urang ngak pahla rik daong pandap bac ta-a, jien padai, abih tih lac labaih 10 tỷ đồng piah blei pandap bac ta-a ka yaok pluh rabau anek saih.

Dalam 4 harei padei le Harei negar tuai damuai rivang iek di dom labik rivang ma-in, bui sambai di Ban raya HCM kuhria mboh labaih 960.000 mbang, tagok 4,3% dut saong tukvak ini thun dahlau. Gah dulich mek jien tame tui kuhria hu labaih 2.890 tỷ đồng dalam 4 harei padeih le. Piah patui dom bruk ngak pachreih tuai damuai  dulich, gah dulich  ban raya daok pataom tame caga bruk piah taduan raok dom kapol tuai negar langiu  mai meng rilo taneh ia dalam tuk Nyaom darak pasar Dulich Dunya TPHCM peih ngak meng harei 7-9/9. Patui di nan, peih bruk taduan raok tuai rivang iek labik ngak bruk di HĐND – UBND TP.HCM di dom harei Sanecar, harei Adit di adit puac yaok bilan.

Cục Cảnh sát jalan mbak (C08, Mintri Công an) brei thau, tapa 4 harei padeih lễ, dalam taneh ia rah tabiak 127 bala angaok jalan, ngak brei 76 urang metai, 95 urang njauk rambus. Dalam nan, jalan radaih rah tabiak 125 mbang bala, ngak brei 73 urang metai, 95 urang njauk rambus. Jalan pasei hu 2 bala, ngak brei 3 urang metai. Di TPHCM saong dom labik langiu ban, dalam mbang padeih lễ, angaok jalan cao tốc TPHCM - Long Thành - Dầu Giây saong TPHCM - Trung Lương - Mỹ Thuận; jalan nao miền Đông, jalan roya 1, labik tatua Rạch Miễu (dalam 2 tỉnh Tiền Giang saong Bến Tre), radaih nao mai biak rilo, nduac suia, oh rah tabiak bruk gar jalan.

Tui Cục Thủy lợi, Mentri Ngak nong saong Patagok palei pala, dom harei tapa, bhum gah akok halau ia kraong Cửu Long tame akok bilan ia sua. Yau nan min, ia tuh mai suai  saong takik jang ia kuhria yaok thun. Tui kuhria mboh dahlau, bruk ini daok dui atah tal bilan 11 thun ini. Ong Lương Văn Anh, Phaok kok Cục Thủy lợi, Mentri Ngak nong saong Patagok palei pala ndom lac, kayua ia ndik mai suai nan ye bruk njom ia mbak di Bhum taneran kraong Cuu Long meda mai aval saong khang jang dut saong thun dahlau. Kayua yau nan ye, dom bhum palei brei hu dom jalan pacang caga, pandiak bhang saong njom mbak.

Mintri Ngoại giao Trung Quốc brei thau lac daok daong ka pulao kaoh Solomon gah an ninh hadei di tuk Australia khan lac brei rilo cảnh sát jang tal taneh ia pulao kaoh Thái Bình Dương ini. Mintri Ngoại giao Trung Quốc ndom lac, daok iek tui bruk caong khin di pulao kaoh Solomon piah pabak bruk daong tui prein di drei, piah daong ka pulao kaoh Solomon mek hu bruk tani tanat suai lavik. Thun blaoh, pulao kaoh Solomon hu mbaoh tangin tame sa harak pambuak bruk an ninh haong Trung Quốc, bruk nan ngak suh sah Australia saong Mỹ ka bruk meda patagok gah lin tasik di Bắc Kinh.

 Pak urang phi hành gia di Balai Vũ trũ Dunya (ISS) hu gilac veik mai Baoh taneh salamat, tamat bruk roh duah dui atah 6 bilan di balai ini. Kapal haok vũ trụ ini di kong ty  roh duah khong gian SpaceX peih ngak rilo bruk  piah tame quỹ đạo hoi quyen saong par trun meng pasar dù di bhum tasik bang Florida di Mỹ. Brei panuac dahlau tuk tabiak truh ISS, dom urang ndik vũ trụ lac, urang sumu menei ia pandiak, khin menyum dom cavan caphe pandiak saong iek tasik đại dương. Mbang par gilac veik mai di dom urang nan njauk kadun  veik sa harei kayua langik di Florida jhak.

Yaok ratuh sang bac di Mỹ hu langyah bruk kurang gru pato jeng yau paglaong siam mekre raidiuk ka anek saih saong gru pato meng sa bruk salih bahrau praong, bac 4 harei dalam sa adit. Bruk bac 4 harei dalam sa adit lac sa jalan ngak piah pacang dom bruk pato megru tamuh tabiak dalam tuk jit praong, dalam nan hu bruk khik takai gru pato saong anek saih padeih oh mai bac. Thống đốc di rilo bang di Mỹ hu sahneng duah dom jalan ngak bahrau piah langyah bruk kurang gru pato, dalam nan hu gam bruk pilih ruah dom gru pato meng dom bang karei atau da-a dom gru pato dahlau daih mai pato dom tal bac./.