Harei tame thun bac birau thun 2025-2026 gam haong pahadar 80 thun Harei padang Mentri Pato megru, yau nan ye harei tame thun bac birau hu peih ngak di mon 8 tuk page harei 5/9/2025 di Pasak Nyaom biai Pakat negar (Ha Noi). Danak dak hu peih tapak angaok riyak kenh VTV1 di Rayo papar binguk Viet Nam saong angaok online tal dom labik sang bac dalam negar. Mentri Pato megru caong khin UBND dom tinh, ban tacei ba dom sang bac peih ngak Harei tame thun bac birau 2025-2026 gam haong Harei pahadar rah tabiak di Pasak Nyaom biai Pakat negar.

Rayo sap ndem Viet Nam birau peih bruk padang ngak saong padang talaoh tabiak Kenh VOV Giao thong Duyen hai. Danak dak Kenh VOV Giao thong Duyen hai ar khan ka dom bruk dom kadha ka raidiuk di bhum tathik hu padang tabiak piah pabak ginup khaw tin di bhum tathik, ilamo bhum tasik, dom jalan ngak haong tathik, ginum biai khaw tin pablei salih, jutvu bruk ngak di tathik, njauk ndem tal bruk salamat jalan mbak angaok tathik saong rik tame khik caga bruk ngak po tathik…

Meng akaok thun mbiah tal ini, TPHCM hu jaik 17.000 mbang urang ruak pandiak tabiak darah, patagok 168% dut saong thun dahlau, dalam nan hu 10 urang metai. Anak bruk nan gah y te ban raya samar peih ngak praong bruk pametai anek raoh, puh ramik hacih labik daok saong ar khan ka bruk pacang caga ruak. Dom balai y te phuong jak ba pambuak bruk haong dom mban, dom gah, kapol nyaom piah bruk nan hu bhian peih ngak.

Hadei sa tukvak suai lavik kandi kandang, urak ini po bein di Bhum taneran karaong Cuu Long ramik pasiam veik bein phun cacao, kayua asar cacao palei hu mbuan lagaih, hu yaom glong. Di tukvak ini, baoh cacao that hu yaom meng 15 tal 17 ribau đồng sa kilo, yaom cacao thu labaih 230 ribau dong sa kilo, tagok glong meng 2 tal 3 mbang dut saong 2 thun dahlau. Mboh cacao pablei hu jien, jien buh tame pala biar, mbuan pala yau nan ye urang ngak nong di Bhum taneran kraong Cuu Long daok buh jien tame peih praong bein pala kayau pala pablak haong dom janih phun kayau mbang baoh atau pala sa janih.

Kong an xã Thạnh Phú, tỉnh Vĩnh Long birau jao bayar 2 uranaih umo 15 thun klak bac klak sang nao. Tui duah thau camereip, kayua klak bac suai saong alah metah daok di sang, harei 9 bilan 8, 2 urang ini klak sang nao duah bruk ngak. Urang sang di dua uranaih ini hu nao duah saong khan ka Kong an min oh duah mboh. Tapa bruk nan, Kong an Vĩnh Long kakei urang ngak amaik ame caik hatai sangka kuhria tal anek bik rilo jang, pambuak bruk, klak rabha, thau hatai sahaneng saong iek veik anek bik bhian ma-in haong thei.  

Bruk kurang urang ngak yau urak ini di Thai Lan hu langyah dalam dua bilan, peih praong jalan brei ka urang negar langiu tame ngak bruk mai meng 4 taneh ia, nan lac Indonesia, Philippines, Nepal saong Sri Lanka. Tui Mentri Lao dong Thai Lan, labaih 100.000 urang negar Campuchia hu gilac veik mai negar, dalam nan tok hu labaih 30.000 urang hu harak gal ngak bruk njauk hukum. Bruk nan ngak ndua naong trak ka dom labik ngak mbang pablei salih, njauk ndem tal dom gah ngak tabiak ndap nda saong jitvu.

Dalam tuk jit ruak Chikungunya di Trung Quốc daok pambak praong, rilo bhum palei langiu Quảng Đông hu ba tame  nyaom njom ruak glong, jabat y te brei kakei dahlau saong pacang caga. Dom urang ilamo y te Trung Quoc kakei karja saong bhap bini di dom bhum palei di nyaom urang mbuan njom ruak brei ngak dom jalan pacang caga jamoh kaik, dut iek jit ruak, gam haong paglong jalan sahaneng ka bhap bini rahra piah samar duah thau saong jru ruak.

Sa danak dak pasang iek pametai labaih 11.800 drei pabui glai daok hu Karja gah Pei Australia peih tabiak piah pacang jit ruak saong ngak khat lahik ka alam moi truong. Dom urang ilamo kuhria mboh labaih 45% taneh riya di Australia gaok kan kandah kayua pabui glai palai pajua njam patam. Pabui glai lac sa dalam dom bruk ba tal bhum gah Pei Australia jeng labik hu jit ruak ralo dalam negar ini./.