Sang bac Pho thong Năng khiếu (Ndai hoc Quoc gia TP.HCM) birau brei thau, hu labaih 3.000 anek saih tut angan tame pakacah thun ini, tagok labaih 800 hồ sơ dut saong thun blaoh dalam tuk bruk palih ruah tok jaik 600 anek saih. Tui nan, mon chuyen sap Anh hu anek saih tut angan ralo abih saong mon nan jeng lac mon meriak gauk glong abih (1 dalam 9 urang) ngan haong 1.200 anek saih, patui di nan lac mon Toán ngan haong 864 anek saih. Thun ini, sang bac Pho thong Năng khiếu palih ruah 595 anek saih tame bac tal 10.

Dua danak dak jalan cao tốc Phan Thiết - Vĩnh Hảo saong Nha Trang - Cam Lâm hu ngak salah dom bruk puac abih dahlau di tuk brei radaih nduac tapa di harei paguh (19-5). Tuk 2 jalan ini hu brei radaih peih, nduac, tukvak nao meng jalan radaih meng TPHCM tabiak Khánh Hòa hu dui katut panak biak rilo. Danak dak jalan cao tốc Vĩnh Hảo - Phan Thiết atah labaih 100 km, hu peih tabiak ngak di bilan 9-2020, abih tih phun jien tuh tame ngak lac 11.500 tỷ đồng (Mintri GTVT ngak po đầu tư), patui jalan cao tốc Dầu Giây - Phan Thiết, nao tapa dom huyện Hàm Thuận Nam, Hàm Thuận Bắc, Bắc Bình saong Tuy Phong, tỉnh Bình Thuận.

Kayua kaya ikan tamo piah ngak dalam negar hu takik,  nan ye urak ini dom doanh nghiep ngak pandap pablei tabiak negar langiu di Bà Rịa-VũngTàu brei blei kaya ikan meng negar langiu tame piah ngak pandap pablei tabiak, pabak sumu dom harak pambuak bruk hu mbaoh tangin  blaoh.  Bà Rịa - Vũng Tàu urak ini hu 42 sang may ngak pandap kaya ikan tui tanut chuan HACCP ngan haong dom janih yau ye: surimi, muc, hadang, ikan, ariang, jantak…Tui dom D.N ngak pandap kaya ikan  pablei tabiak negar langiu, bhum tasik taong chap ikan daok takik nao, yaom xang menyek tagok, gam haong bruk khik iek catang bruk peih ngak dom adat hukum piah lang talaih thẻ vàng di Uỷ ban Châu Âu (EC), ba tal rilo gilai taong chap ikan  oh khang hatai tabiak tasik, ba tal kurang kaya ikan tasik.

Hadei di tuk Thanh tra Rajaei tabiak harak Tamat bruk thanh tra ka 1739 tacei tabiak rilo danak dak dalam tỉnh Đồng Nai hu UBND tỉnh tabiak yaom taneh oh ka lagaih haong bruk biak di nyu saong oh ka njauk haong adat ba tabiak, bahrau ini, UBND tỉnh Đồng Nai hu ieu dom gah chức năng di tỉnh samar tame bruk piah tacei tabiak veik yaom taneh. Dalam dom danak dak njauk tabiak veik yaom taneh, danak dak labik dân cư phường Thống Nhất kayua Cty Cổ phần patagok đô thị Công nghiệp D2D ngak po đầu tư hu labik lac hu yaom di abih, daok dalam labik pasak TP. Biên Hoà. Danak dak ini praong 34 ha, abih tih yaom jien buh tame ngak lac labaih 850 tỷ đồng.        

Sở Ngak nong saong Patagok palei pala tỉnh Cà Mau birau pambuak haong Ban trị sự Giáo hội Phật giáo Việt Nam tỉnh ini palao labaih 5 trieu drei pajaih yau ariang saong hadang sú tasik trun tasik  di xã Khánh Bình Tây, huyện Trần Văn Thời. Mbang palao pajaih  pabak veik halau kaya ikan mbang ini, Cà Mau palih ruah dom drei pajaih siam, khang kadang saong diuk lagaih haong bhum tasik  pak ini. Meng akaok thun tal ini, jabat chức năng  di tỉnh  hu rilo mbang  palao pajaih trun kraong, tasik. Langiu di nan, dom jabat  pambak tal daok jhul pakhang  bruk pathau khan, paglong jalan sahaneng ka bhap bini dalam bruk khik caga, taong chap halau kaya ikan, palaik njiak bruk taong chap abih mbong.

Đảng Tự hào Thái (Bumjaithai) bahrau ndom lac oh pok ngak Thủ tướng ka sa urang pachreih tui bruk pasiam veik hukum pacang iek lap patao.  Đảng Tự hào Thái brei thau lac tui jalan oh pambuak gauk padang Rajaei haong đảng halei hu sarak ramik veik atau klaak nao paka 112 di Hukum hình sự, daok hu thau tal lac Hukum pacang iek lap patao. Tui paka di hukum ini, urang halei ndom jhak atau đe dọa dom urang dalam Hoàng gia atau quan nhiếp chính meda njauk mek caik guk meng 3 tal 15 thun. Sarak tranh cử di đảng Tiến bước hu ba tabiak bruk ramik veik paka 112 kayua mboh lac paka ini bhian hu pandar oh njauk.

Thống đốc bang Montana, Mỹ harei kabroi (18/5) mbaoh tangin harak adat pakauk ứng dụng video katut TikTok di bang ini. Montana hu jeng tiểu bang  akaok meti di Mỹ pakauk pandar video katut mboh ralo nan. Hukum birau pakauk dom cửa hàng ứng dụng di động pabak TikTok dalam tieu bang. Thống đốc bang Montana, Mỹ lac brei ngak dahlau dom sarak lac khik caga bhap bini Montana. TikTok dahlau diah  oh taduan bruk klak rabha dữ liệu  haong rajaei  Trung Quốc saong khan lac kong ty  meda oh ngak yau nan meyah hu pndar ngak. Rajaei bang Montana brei thau TikTok meda taong phạt meyah ngak suan adat pakauk hu ba tame ngak tui meng akok thun hadei.

Hadei di labaih 20 harei pakacah, Nyaom roya Thể thao Đông Nam Á (SEA Games) mbang ka 32 hu tamat di melam bloh 17/5. Taneh ia po sang SEA Games 32 hu jao hala dok thể thao Đông Nam Á ka Thái Lan – taneh ia dang tabiak peih SEA Games 33 thun 2025.  Hadei dom harei pakacah di 37 janih thể thao haong 581 asal di labaih 12.400 urang di dom kapul thể thao, Campuchia hadah mbaok meta lac mbang camereip abih peih ngak sa bruk praong lac SEA Games hadei di 64 thun hu jak jeng jang hatai caong. Daok kapul thể thao Việt Nam, ini lac mbang ka 3 dalam sajarah dom mbang SEA Games bo Việt Nam dang akaok dom kapul./.