Thun 2025 hu palih ruah kadha “Thun Padaok radiuk” ngan haong bruk praong lac  ngak brei abih baoh sang oh daok taik tahak dalam negar. Thu tuong Rajaei Phạm Minh Chính hu ba tabiak kadha cati catang: mbiah tal  bilan 10 thun 2025, hu ngak salah danak dak ini. Ini lac “ pandap alin” hu makna praong di Đảng, Karja brei ka urang kathaot, urang mbuan gaok kan kandah, bhap bini urang bhum atah bayah, urang bangsa takik, tui jalan daong “ sahanang hatai  ngak mbang tani tanat raidiuk”. Dom mentri, dom gah, bhum palei samar tame ngak bruk, brei mboh hatai kham merat biak ralo. Rilo bhum palei hu ngak salah atau jhul pasamar  tukvak ngak bruk, tui jalan “ ngak harei oh blaoh, ramik ngak melam”. Sahaneng iek praong bruk ngak saong klaak rabha ngak jeng bruk chreih chrai, kham merat ngak hu siam bruk tani tanat raidiuk  hu makna biak praong.

Harei kabroi, lac harei akok meti peih bruk brei salih veik harak adat peih radaih di 22 phuong, xa di TPHCM, bhap bini brei mboh bruk kham merat chreih chrai kayua patak pataom hu ralo tukvak dut saong bruk nao mai atah yau dahlau diah. Tui Jabat Canh sat jalan mbak, Kong an TPHCM, meng akaok bilan 3 mbiah tal in, don vi taduan jaik 7.000 ho so brei salih, ngak veik harak adat peih radaih tapak saong labaih 2.500 ho so  tut angan tapa jitvu blah web di karja. Hadei  tuk pabak hu 22 kadha birau, TPHCM hu taong abih tih 25 labik brei salih, ngak veik harak adat peih radaih.

Di tinh Ninh Thuan, dom urang hu angan je bac harak mbao duah thau ralo kadha, daong ngak bruk pathau khan dahwak saong padang bruk jum pataom bangsa. Ong Mai Liên, urang hu ngan je daok pak xa Phước Trung, huyện Bác Ái klak rabha khaw tin  ka dom sarak karja birau di Đảng saong Karja, yau bruk ramik veik ba tame  dom mentri, dom gah hu jeng So Bangsa saong Agama, hu mikva thau ralo tapa harak mbao. Ong Mai Liên bhian bac mbao online “ Bangsa saong Patagok” piah khan veik   dom kadha dom bruk di dom mbang pataom bhap bini, piah pambak praong ilamo tal mikva urang bangsa Raglai.

Tui rilo gah jak ba rik daong tame, meng akaok thun mbiah tal ini tinh Vĩnh Long kham merat  peih ngak danak dak ngak abih baoh sang oh daok taik tahak ka urang kathaot tui sarak di Thu tuong Rajaei. Kham merat tal puac bilan 4 anak tal, Vĩnh Long kham merat ngak brei abih sang oh daok taik tahak dalam tỉnh piah pahadar 50 thun harei peih paha gah Meraong negar, yasa taneh ia. Mbiah tal ini, taong abih 1.059 baoh sang taik tahak di tinh Vĩnh Long hu padang ngak, dom baoh sang hu ngak salah blaoh, dom baoh sang daok veik jeng ngak hu meng 50 tal 80% jaik si blaoh.

Lac 1 dalam 3 xã hu rilo urang Cam di huyen Bac Binh, tinh Binh Thuan min tal puac thun 2024, xã Phan Thanh ngak brei abih baoh sang hu tapa truh kathaot saong daok pamong tal bruk padang ngak palei pala birau paglong. Tapa nan dom danak danak pakat negar  patrun kathaot khang kajap, kuhria tui raidiuk yaok baoh sang, prein ngak mbang di urang kathaot, jaik kathaot piah karja saong dom kapol nyaom tacei pato jalan ngak mbang, jalan raong glang, pala ka lagaih. Meng nan, dom baoh sang nan hu taduan phun jien, pajaih athur raong piah pandar njauk bruk saong duah hu jien laba tame.  

Dom ban dalam negar Trung Quốc hu ba tabiak rilo sarak daong iek sangka uranaih biak glong ka yaok anek kuman, gam dom sarak daong brei karei ka dom baoh sang ndik tapui anek ka 3 tagok. Birau ini, hu ban Hohhot, bhum taneh praong di Labik tự trị Nội Mông, barak negar Trung Quốc. Tui sarak birau ba tabiak nan, dom baoh sang hu takik lac sa urang amaik atau ame hu harak gal daok di Hohhot meda hu taduan  100.000 nhan dan te sumu 13.800 USD tuk ndik tapui anek ka klau tagok hadei harei 1 bilan 3. Paok jien daong  hu brei yaok thun 10.000 nhan dan te,  raong tal uranaih umo 10 thun.

Sa bruk biak takik mboh birau ini ngak ka gah harak mbao dunya sangka caik hatai, nan lac hu sa urang nao ngak mbang di tasik Peru hu diuk veik yau hu po chrong daong hadei 95  harei theik ndon angaok tasik Thái Bình Dương. Ong Maximo Napa, umo 61 thun, mai meng ban sit tapen tasik Marcona, Peru, di harei 7 bilan 12 thun dahlau nao tabiak tasik taong mek ikan. Sa ribuk tuh mai katuah  ngak khut gilai di ong, ba theik tame bhum tasik Ecuador. Suai suai tal harei 12 bilan 3 meng blaoh, sa kapal gilai  taong chap ikan  hu duah mboh ong  atah di tapen tathik  labaih 1.000 km dalam rup lahik rilo ia saong abih prein yawa. Ong Napa hu dut iek prein yawa dahlau tuk ba mai veik Peru.

Sa tieu bang di bhum Trung Tây saong gah Meraong negar Mỹ puac adit tapa gaok rubuk saong hangin biak khang, ba tal takik abih 40 urang metai, yaok pluh urang njauk rambuac. Rilo bang brei khan samar chip saong eiw bhap bini caga bruk langik jhak. Bhap bini di dom labik mbuan gaok bala hu tacei pato duah labik daok brei salamat. Labaih 230.000 baoh sang lahik ndien dalam harei kabroi.