Harei ini, harei 10 bilan 3 saka ia bilan, rilo tinh, ban dalam taneh ia jeng peih ngak Adat pacit taa Po Hung ngan haong hatai biak iek glaong, thau dhar phol dom Patao Po Hung hu prein dak padang taneh ia. Di tỉnh Tiền Giang, Adat pacit daa Po Hung hu peih ngak praong prang di Miuyim Tiền Giang. Dalam tukvak ini, hu peih bruk parang iek thaot binguk "Mỹ Tho, Gò Công meng kan saong harei ini”, parang iek asal kadha “Ilamo panieng hala”, parang iek “pandap mesuh metak”, parang iek dom janih bingu hala saong phun kayau di gilai ba lá, dom kadha cih vak thư pháp; pakacah "papaok – tahanek saong parang iek ahar tapei bilik”. Harei ngak Adat pacit daa Po Hung hu tỉnh Tiền Giang khik tani tanat yaok thun, piah pok mayaom dom yaom glaong ilamo meng kan di bangsa; gam tui di nan jeng pato magru ilamo anit ranam taneh ia, ngak tui asal kadha “manyum ia hadar halau ia” ka rai hadei.

Sở Ilamu, Thể thao saong Du lịch tỉnh Cà Mau jeng hu peih bruk nao ravang, sirah saong cuh gilau, hadar dhar phor Đức Quốc Tổ Lạc Long Quân di kalan kakuh Lạc Long Quân (di labik du lịch Mũi Cà Mau, xã Đất Mũi, huyện Ngọc Hiển). Bruk nna hu peih ngak tui adat meng kan di palei, ndung bak ilamu hadah krah, ngak jeng labik pahadar biak ginreih, pamoang mai halau gha, brei mboh bruk ngak, labik dang saong makna praong glaong di Đức Quốc Tổ Lạc Long Quân. Tapa nan, mBan peih bruk brei jhul khang dom bruk pambuak gauk, yaih khan tal tuai damuai ka ilamu meng kan hadah krah di bhap bini Cà Mau. 

Công ty peih pandar metro ka 1 bahrau hu harak pathau khan haong Mban khik ramik jalan pasei đô thị TP.HCM ka bruk kuhria phun jien dalam tuk cty brei pandar peih nduac iek jalan metro ka 1 Bến Thành - Suối Tiên. Tui nan, piah tani tanat tui njauk jalan ba tame pandar dalam thun ini, cty hu caga dahlau bruk dak padang jalan ngak ba tame pandar nduac iek saong hu bruk khik ramik jien padai ngan haong dom phun jien tamuh tabiak. Dalam tuk nan, abih tih phun jien kuhria tamuh tabiak veik tuk ba tame nduac iek jalan metro ka 1 lac labaih 109 tỉ đồng.

Dom thun tapa, UBND ban sit Tịnh Biên, tỉnh An Giang hu peih ngak rilo bruk sangka kuhria ka raidiuk, bruk ngak mbang ngak huak di bhap bini bangsa Khmer. Dalam vaktu meng thun 2022 tal thun 2023, palei hu peih jaik 6 tỷ đồng piah daong ngak sang daok ka 34 baoh sang Khmer kan kathaot. Abih di nyu nan lac hu peih jaik 18 tỷ đồng piah ngak dom cơ sở hạ tầng praong, duh ka bruk pala drak, raidiuk bhum bangsa, ngak jeng bruk patagok samar drah dalam raidiuk bhap bini. Gam haong nan, daong ka bhap bini bnahsa takik cakrok bruk ngak tui jalan chuỗi giá trị; patagok bruk bac megru saong ba brei bruk ngak. 

Dalam tuk daok kurang ia taba pandar biak trak damak di rilo tinh, ban di Bhum taneran kraong Cửu Long, dom harei tapa, rilo gah saong manuac urang di Đồng Tháp hu peih rilo sruh radaih pajeng ia hacih mai tal bhum njom ia mbak di huyện Tân Phú Đông saong Gò Công Đông di tỉnh Tiền Giang. Kuhia tal urak ini, hu labaih 30 sruh radaih tải meng Đồng Tháp hu pajeng labaih 200 mét khối ia taba ngan haong rahra di tỉnh Tiền Giang. Tui kuhria lac bruk ngak ini meda patui veik hu peih ngak tal abih bilan 4 piah daong ka mikva bhum pandiak, njom ia mbak.

Dalam quý 1, lac 3 bilan akaok thun ini, Tập đoàn Jalan pasei negar Trung Quốc pajeng ba hu siam labaih 1 tỷ mbang tuai, rilo jang 28% duk haong tukvak ini thun blaoh. Dalam quý 2 ini, dom tuai nao mai di gah jalan pasei jeng daok hu tani tanat, dom mbang padeih lễ 1/5 saong hareiTết Đoan ngọ meda ngak jeng tuk tabung glaong tuai damuai nao mai. Nan ye gah jalan pasei Trung Quốc brei caik hatai ngak siam bruk duh tuai di dom nhà ga, peih praong bruk daong yaom harak vé, ba mai bruk njauk hatai ka tuai damuai. 

Mintri Y tế Indonesia hu ba tabiak panuac kakei aval lac ieu kakei tuai du lich dalam saong langiu taneh ia njauk caik hatai dalam tuk jit ruak pandiak tabiak darah daok tagok di kaoh pulao ma-in danei angan Bali. Panuac kakei hu ba tabiak hadei di tuk sa urang tuai negar Australia hu pasang iek brei thau lac ruak pandiak tabiak darah dalam tuk padeih 10 harei di Bali. Urak ini jabat y te bhum palei hu ieu kakei caga prein khang gah y te siam abih piah pacang caga tuk hu rilo urang gaok ruak.

Hajan praong nao tapa dom tiểu vương quốc Arab thống nhất (UAE), ngak brei dauk dalam di rilo labik praong. Hangin khang ngak klaih klaoh dom mbang par di mblang kapal haoh dunya Dubai, lac mblang kapal haoh chreih chrai abih di dunya ka bruk du lịch dunya. Dom sang bac di gruak labik dalam UAE njauk kreik pabah mbang, urang jakar brei ngak bruk meng atah. Rilo radaih metai jamriak dalam dom labik ia dauk dalam di angaok dom jalan praong. Dalam tuk nan, dom menuac matai dalam mbang ia dauk dui atah rilo harei tapa di taneh ia jaik taphia nan, lac Oman jeng tagok tal 18 urang./.