Dah page harei ini 7/8, di paha Vĩnh Tràng (ban Mỹ Tho, tỉnh Tiền Giang), Mban Trị sự Giáo hội Phật giáo (GHPG) Việt Nam tỉnh Tiền Giang peih pakah dalam praong prang Đại Giới đàn Huệ Đăng 2023. Đại Giới Đàn lac sa dalam dom harei roya praong di Phật Giáo piah ka dom Giới sư pilih ruah saong pato veik ka dom urang Giới tử piah ngak tui saong patagok jalan hoằng dương chánh pháp. Ngak tui jalan lac “siam ka dunya, mekre ka agama”, tukvak tapa,  Hội Phật giáo dom pakat dalam tỉnh Tiền Giang hu pambuak bruk haong Kanja, dom kapul peih ngak siam dom bruk  an sinh xã hội, daong ka dom urang gaok kan kandah daok atah jaik, ngan haong pok jien rik tame jaik 100 tỷ đồng sa thun.

Bạc Liêu daok caga yuak labaih 30.000 ha padai hè thu bilan pala praong. Anak bruk mehit lac yaom padai tagaok, mikva ngak padai bui sambai lô, Min urang blei brah mbang yaok harei daok biak duh hatai kayua brah tagok yaom. Di darak praong ban  Bạc Liêu saong tỉnh Sóc Trăng, dom janih brah mbang, brah piah ngak pacuk, ngak hủ tiếu... tagok khang meng 2.000 - 4.000 đồng sa kg. Ong Lưu Hoàng Ly, Yam ndok Sở Ngak nong saong patagok palei pala tỉnh Bạc Liêu mboh lac, bhum ĐBSCL oh kurang padai brah. Nan ye bhap bini jhui huac anak bruk mehit lac kurang brah piah jhul yaom tagok.

Hadei di labaih 10 harei, ia di kraong Đồng Nai jeng daok glaong ngak ka yaok ratuh ha phun pala di bhum dhaong tapen kraong jeng daok dauk dalam ia. Di huyện Định Quán hu 1.845 tấn ikan dom janih metai, labaih 195ha taneh pala padai, njam patam saong phun pala karei njauk ia dauk. Huyện Tân Phú hu labaih 565ha padai, njam patam, phun pala lavik thun njauk ia dauk; 35 baoh sang njauk ia dauk nềng sang. Ong Nguyễn Phước Huy, Yam ndok Jabat kuhria mboh dahlau bruk langik tasik Đồng Nai brei thau lac, makna rahtabiak bala ia sua bahrau blaoh lac kayua dom mbang hajan khang dui atah gam haong dom thủy điện di gah angaok kraong Đồng Nai tathuak ia ngak ka  ia di kraong Đồng Nai tagok glaong dui atah rilo harei jang dut saong yaok thun.

Mban tacei pato pacang caga bala meng langik tasik saong daong duah urang gaok bala tỉnh Bình Phước brei thau, 7 bilan di thun 2023, dalam tỉnh ini hu rilo bala meng langik tasik, ngak khut drap ar saong phun pala, kuhria tabiak yaom jien lac khat lahik labaih 18 tỷ đồng. Dom janih bala meng langik tasik rah tabiak di Bình Phước, lac: pandiak bhang, ia dauk, ia sua, ngin rabuk, glut jaleih. Bala ngak kan kandah tal raidiuk, bruk ngak mbang ngak huak, metai menuac, khut lahik drap ar, phun pala, athur raong, dom drap ar karei di karja saong di bhap bini. Piah patrun khut, lahik kayua bala meng langik tasik, bahrau ini, Mban tacei pato pacang caga bala meng langik tasik saong daong duah urang gaok bala tỉnh Bình Phước hu pok panuac tagok Mintri ngak nong saong patagok palei pala pathau khan Thủ tướng Rajaei daong jien ka tỉnh ngak pasiam veik dom danak dak thủy lợi khut, mbaih mbaoh di dalam tỉnh.

Dalam 7 bilan thun ini, tỉnh Sóc Trăng hu labaih 1.600 urang ruak pandiak tabiak darah, dalam nan hu rilo urang ruak trak njauk suak yava meng mac. Bác sĩ CKII. Chung Tấn Định, Yam ndok Sang iek ruak Chuyên khoa Sản - Nhi tỉnh Sóc Trăng, brei thau: yaom lac njauk kan kandah biak praong ka manuac ruak, min kapul y, bác sĩ di sang iek ruak jeng kham marat saong taong ruak jak jeng ka rilo urang ruak trak. Tapa nan, rik daong patrun trak damak  ka sang iek ruak praong, jang yau trun manieng dom phun jien taong ruak ka urang ruak.

Dom mbang hajan ia sua dalam dom harei tapa di Trung Quốc ngak brei takik di nyu 44 urang metai. Di tỉnh Hắc Long Giang urak ini jeng daok hu 24 baoh kraong mbiah saong sit hu ia glaong jang tanut cảnh báo, 33 danao ia tapa tanut di ia sua. Rilo labik daok brei padeih dom tal bac, padeih sản xuất saong padeih bruk nao mai angaok jalan meng harei 2/8. Anak bruk hajan ia sua biak khang, Phó Thủ tướng Trương Quốc Thanh hu nao tal Thiên Tân tacei karja labik ini ieu pataom prein khang, ngak siam bruk pakhang ar pacang, peih jalan tathuak ia sua, khang hatai mek hu jayah bruk mesruh pacang caga ia dauk ia sua saong daong ka urang gaok bala urak ini.

Ban New York di Mỹ caong khin jeng labik camriep pandar bruk mek jien phi gar jalan ngan haong radaih ô tô piah ngak pasiam veik chat luong alam langik tasik, jang yau trun manieng bruk gar jalan di dom jalan praong. Mek jien phi gar jalan meda hu pandar di dom labik pablei salih biak praong hu rilo manuac di Midtown saong phố Wall. Jabat jalan mbak pajeng ba đô thị New York tui kuhria meda mek jien phí labaih 23 đôla dalam tukvak tabung glaong saong 17 đôla dalam maong takik manuac. Jien mek tame meng phun jien kak gar jalan jeng piah ngak pasiam veik dom radaih pui dien daok khut biak trak. 

Rajaei Nam Phi khan lac meda ba tabiak adat pakauk taong cap ikan dalam 10 thun di dom labik daok jaik dom tapon cim cánh cụt piah khik caga janih athur ini anak bruk mbuan si lahik abih. Tui panuac khan di Mintri Môi trường, Lâm nghiệp saong Thủy sản Nam Phi, cim cánh cụt châu Phi – janih tok hu di Nam Phi saong Namibia – daok mbuan si lahik abih di thun 2035 meyah oh hu jalan ngak halei hu peih tabiak. Urak ini, dom drei cim cánh cụt châu Phi daok biak takik, tal urak ini, daok jaik 10.000 drei./.