Mintri Ilamu Thể thao song  Du lịch bahrau patabiak bruk peih ngak  7 danak dak dong roh duah, ramik pasiam, khik ramik, patagok  ilamu phi vật thể dom bangsa takik  daok mbuan si lahik nao. Di  Yên Bái hu adat uan raok lisei bahrau di bangsa Tày song  nghệ thuật khèn bè di bangsa Thái; di  Phú Thọ hu tamia  chuông song tamia rùa di bangsa  Dao, tamia trống đu  di bangsa  Mường; di  Điện Biên hu adat puh ramik palei  di bangsa  Phù Lá song di Nghệ An hu bruk  pak yun di bangsa Thổ, ragu doh song ragam tamia di bangsa Ơ Đu. Yaok danak dak hu  70-75 nghệ nhân song  urang bac lac urang bangsa takik hu mbaok tame pasram megru.

Sở Ilamu Thể thao Du lịch tỉnh Bình Thuận brei thau, dalam 9 bilan akaok thun 2022 dalam tỉnh taduan raok hu 3.971.500 mbang tuai dalam saong langiu taneh ia, tagok 2,27 mbang duk haong tukvak ini thun bloh. Bruk du lịch di tỉnh daok hu siam veik hadei di jit praong COVID-19, gam haong bruk Bình Thuận dang tabiak peih dom giải pakacah thể thao pakat negar, chung kết Hoa hậu Du lịch Việt Nam pakat dunya, Lễ hội Nghinh Ông… nan ye dui pachreih hu rilo tuai, meda ba jien tame hu 9.200 tỷ đồng, rilo jang 2,3 mbang duk haong tukvak ini thun bloh.

Harei 24/9 hu peih bruk padang ngak danak dak  jalan 1A, labik Tân Vạn - Nhơn Trạch di jalan Vành đai 3-TP.HCM, ni lac dom khaw  tin meng mban khik ramik danak dak Mỹ Thuận (Mintri jalan mbak pajeng ba) di var ngak bruk song  UBND tỉnh Đồng Nai harei ni  (20/9). Danak dak jalan 1A atah labaih 8km, urak ni, jao hu  2,8km. Dalam nan,  TP.HCM jao  1,7km dalam abih tih 1,9km labik nao tapa ban; Đồng Nai jao hu labaih  1,1km dalam abih tih  6,3km labik nao tapa tỉnh. Piah peih ngak danak dak ni, Đồng Nai brei mek veik labaih  49ha taneh di  468 boh sang bhap bini.

Pasak khik ramik bruk pajeng ba nao mai công cộng (Sở jalan mbak pajeng ba ban raya HCM) brei thau lac daok brei thẻ nao radaih buýt oh mek jien ka dom urang praong thun daok dalam ban raya HCM piah pachreih bhap bini pandar radaih công cộng, daong patrun bruk gar jalan, patrun bala angaok jalan, khik caga môi trường, mỹ quan ban raya. Dahlau di nan, Pasak khik ramik bruk pajeng ba nao mai công cộng pambuak bruk haong UB bhap bini dom phường: Linh Tây, Linh Chiểu haong Bình Thọ (ban Thủ Đức) hu brei labaih 100 thẻ nao radaih buýt oh mek jien ka urang umo mangaok 70 thun.

Di pabah mbang negar Khánh Bình, huyện An Phú, tỉnh An Giang, Ủy ban MT negar Việt Nam song  Hội đồng pakat negar  Mặt trận Jum pataom patagok  negar  Campuchia hu jao  10 boh sang jum pataom song  300 pok pandap ka dom boh sang  Campuchia song  Việt Nam hu rai duik biak kan kandah di labik tapen negar 2 taneh ia . Ni lac bruk ngak di tuk uan Nyaom biai pakat  dunya padang ngak jalan tapen negar  Việt Nam-Campuchia siam mekre salamad, pambuak gauk patagok thun , 2022 peih ngak di An Giang. Dom thun tapa, dom asal pathau khan padang jalan tapen negar di 2 taneh ia hu peih ngak mek hu siam mekre. Bruk pambuak gauk di 2 taneh ia dak harei dak patagok, prong dalam song siam lagaih.

Harei ini, mbang nyaom Đại hội đồng Liên hiệp quốc khóa 77 yam tame adit ngak bruk praong di Mỹ, rah tabiak meng harei 20 tal harei 26/9, hu mbaok di dom urang pan akaok rajaei saong dom urang ngak praong dang akaok gah ngoại giao di dom taneh ia. Hadei di 2 thun klaih klaoh, ini lac mbang camereip abih mbang nyaom hu mbaok di rilo urang dang akaok dom taneh ia di dunya. Thủ tướng Anh Liz Truss mbang camereip abih taom gaok Tổng thống Mỹ Joe Biden di harei 21/9. Dua urang dang akaok dua taneh ia hu sa jalan ngak yau gauk dalam bruk ngak catang ngan saong Nga haong Trung Quốc.

Tui Đài KBS, mintri  Quốc phòng Hàn Quốc khan lac hu ngak salah bruk  brei taneh prong  labaih  400.000m², di labik tổ hợp tên lửa taong pacang mbiah, glaong ka bol bala Mỹ dok di Hàn Quốc di  huyện Si-ông-chu (Seongju-tỉnh Bắc Gi-ông-sang (Gyeongsang). Kuhria gam mbang jao dalam thun 2017, tong abih mblang taneh  brei ka bol bala  Mỹ lac  730.000m². Seoul dok jhul khang bruk pajeng ba binh lực song xăng  menyek tame căn cứ meng jalan radaih dalam harei 4/9.

Gah Y tế dunya brei mboh hatai suh sah ka bruk mbuan hu bala ka 2 di Pakistan, nan lac jit ruak saong metai lahik hadei di bala ia dauk ia sua. Ia hacih piah pandar daok pabak klaih klaoh meda ngak brei njaom mbak ruak aih craoh saong dom ruak gah jalan tung pruac. Ia kandaong veik lavik harei lagaih ka jamaok caih mebaoh, ba tal pandiak tabiak darah saong pandiak dom. Dalam tuk nan, jaik 2.000 labik y tế khut tayah abih atau khut tayah meneing kayua ia dauk ia sua. Urak ini dom urang ruak pandiak tabiak darah daok tagok rilo di rilo labik dalam taneh ia Pakistan./.

Urang lang: H.Pha & M.Phuong – 20/9/2022