Di Mbang nyaom ka 14 hu peih tabiak di dah page ini (26/9), HĐ bhap bini tỉnh Ninh Thuận mbang XI, tukvak 2021-2026 hu brei tapa Sarak brei ngak jalan buh jien tame ngak dom danak dak hạ tầng njauk ngak di dalam xã Phước Dinh, huyện Thuận Nam saong xã Vĩnh Hải, huyện Ninh Hải ngan haong yaom jien buh tame abih tih tui kuhria lac jaik 300 tỷ đồng. Bruk buh jien tame piah ngak pasiam dom kan kandah, tani tanat bruk ngak mbang, pablei salih saong dak harei dak paglaong raidiuk di rahra dalam bhum dahlau deih hu quy hoạch piah peih ngak danak dak sang mac điện hạt nhân; ba mbuan lagaih piah dui pachreih urang buh jien tame ngak mbang cak rok patagok kinh tế, daong jhul khang patagok kinh tế - xã hội di tỉnh Ninh Thuận.

Bộ Chỉ huy Bộ đội Biên phòng tỉnh An Giang pambuak bruk haong Sở Nội vụ saong Sang bac Bangsa gam bac gam daok - Trung học phổ thông tỉnh An Giang bahrau peih tal 4 ilamu sap Khmer ka urang jakar dalam đơn vị. Tame bac mbang ini hu 30 sĩ quan, urang lin chuyên nghiệp daok ngak bruk di Tiểu đoàn Huấn luyện - Cơ động saong dom Đồn Biên phòng. Tui kuhria, tal 4 ilamu sap Khmer (pang, menyai, cih vak) dui atah dalam labaih 4 bilan. Tal bac kayua dom gru di Sang bac Bangsa gam bac gam daok - Trung học phổ thông tỉnh An Giang dang pato.

Bộ Chỉ huy bol lin Biên phòng (BĐBP) tỉnh Cà Mau pambuak haong Kapul urang kumei tỉnh Cà Mau bahrau peih bruk alin pandap Tết Trung thu ka dom adei anek saih gaok kan kandah di xã Tam Giang Tây, huyện Ngọc Hiển. Mbang ini hu labaih 500 anek saih di xã Tam Giang hu taduan pandap, yaom labaih 50 triệu đồng, yaok paok pandap hu gom Trung thu, ahar saong kẹo. Dalam nan Bộ Chỉ huy bol lin BP tỉnh jak ba dom urang ngak pahla, dom urang rik daong tame alin 200 paok pandap, hu yaom 20 triệu đồng, dom paok daok gilac kayua Kapul urang kumei tỉnh jak ba.

Uan harei sân khấu Việt Nam (12/8 saka ia bulan), dom sân khấu praong, sit di TP.HCM jeng hu peih ngak pathi tổ Sân khấu thun 2023 saong pok kakuh tổ nghiệp, dalam praong prang saong bak hatai anit ranam. Harei ngak pathi biak hu yaom, lac tuk caik ka dom văn nghệ sĩ pok kakuh tổ nghề jeng yau hadar tal dom rai nghệ sỹ nao dahlau, dhar phor urang maong iek hu nao gam haong nghệ thuật sân khấu. Ini daok lac tuk caik ka dom nghệ sĩ maong iek veik sa thun ngak bruk, meng nan, kham merat patagok saong rik daong rilo jang ka urang maong iek, ka bol bhap rahra

Tui Sở Y tế tỉnh Bình Dương, prein yava di urang njauk ruak đậu mùa khỉ camriep di Bình Dương hu tani tanat. Urang ruak lac saai N.K.L, umo 22 thun, daok tro di xã Tân Bình, huyện Bắc Tân Uyên. Urang ini lac ayut saabat di urang ruak đậu mùa khỉ camriep di tỉnh Đồng Nai. Urak ini, urang ruak daok hu brei daok karei, tui iek, taong ruak di Bilik njom mbak ruak di Pasak Y tế ban Tân Uyên. Tapa pasang iek mboh hu 3 urang hu taom gaok jaik haong urang ruak lac amaik, anai saong adei sa tian. Taong abih klau urang ini jeng hu brei daok karei tui iek saong hu dut iek. Sở Y tế tỉnh Bình Dương hu harak payua tal dom kapul trực thuộc piah pathau khan, pacang caga dahlau ruak đậu mùa khỉ.

Jabat thông tin Quốc vụ viện Trung Quốc bahrau patabiak Tapuk mbong angan lac “Menuac sia dunya kayua harei hadei haong gauk: Jalan ba tabiak saong bruk ngak di Trung Quốc”. Tapuk mbong patih ba tabiak meta maong ka sa dunya harei hadei haong gauk, ba tabiak jalan taom gaok bahrau dalam talei pambuak bruk dunya, dom jalan ngak bahrau ka khik ramik dunya saong peih tabiak dom siam mekre bahrau ka pambuak bruk dunya. Tapuk mbong patih brei thau lac Trung Quốc hu ba tabiak 5 paka piah dak padang sa dunya hu harei hadei haong gauk dalam dom gah pambuak bruk, sron mbon, cakrok, klah rabha nao mai dom nền văn minh saong hệ sinh thái.

Tổng thống Hàn Quốc Yoon Suk-yeol bahrau hu panuac kakei, mayah Triều Tiên pandar phao ndao hạt nhân, negar ini meda gaok dom bruk biak catang di liên minh Mỹ-Hàn Quốc, meda lac “tamat abih chế độ” di urang pan akaok negar Triều Tiên Kim Jong-un. Tui Tổng thống Hàn Quốc, Triều Tiên daok paglaong prein hạt nhân saong tên lửa saong daok caong pandar phao ndao hạt nhân. Bruk ini ngak tabiak dom kanjak jhak anak mata ngan haong rahra Hàn Quốc saong lac sa cuang kandah biak trak ngan haong bruk saron mbon di dunya.

Mintri Y tế Nhật Bản hu brei adat ngak saong pablei jru Lecanemab taong ruak Alzheimer. Jru ini taong dom makna kandauk dalam ba tal ruak Alzheimer, saong ngak brei suai veik bruk tamuh tagok dom triệu chứng di ruak. Tui kuhria, jru  hu ba tame pandar aval di abih lac jhung thun ini. Dom urang khik ramik Mỹ hu brei adat pandar jru Lecanemab meng bilan 7. Yaom jru di Mỹ lac 26.500 USD/năm (lac jaik 650 triệu jien VN). Yaom jru di Japon jeng lac di tanut glaong./.