Tỉnh Bà Rịa- Vũng Tàu hu jaik 9.000 baoh sang ngan haong 25.700 urang di 38 bangsa takik, meblah 2,3% bhap bini dalam tỉnh. Bhap bini bangsa takik di tỉnh ralo lac dom bangsa takik: Hoa, Khmer, Tày, Nùng, Châu ro…Ndang bo, karja  tỉnh tuk halei jeng sangka iek glang, paglong raidiuk bhap bini, gam haong nan pamedeih tagok prein khang kham merat eng, jum pataom dom bangsa piah rik prein tame dak padang palei negar.

Yaok thun, Bà Rịa- Vũng Tàu buh tabiak 200 tỷ đồng piah peih ngak yaok rituh  danak dak pandar diukrai di bhum urang bangsa takik, yau: pakajap jalan mbak, padang ngak dom danak dak điện trung thế, hạ thế, kraong ribong: 25 tỷ đồng piah peih ngak dom sarak daong tapak ka urang bangsa takik kan kathaot.

Di huyện Cư Jút, tỉnh Đắk Nông, dom thun jaik di ini, rilo baoh sang yaom lac oh kaya meda min jeng halain hatain alin yaok ribau m2 taneh yaom yaok tỷ đồng piah ngak jalan nao mai. Dom sang taduan khat lahik ka drei, alin taneh saong drap ar piah padang ngak dom jalan tapa palei, xã, ngak jeng prein khang piah cak rok patagok kinh tế - xã hội, padang ngak puk palei bahrau. Tui ong Nguyễn Anh Tú, akaok UBND huyện Cư Jút, danak dak alin taneh, phun kayau, njam patam saong drap ar piah ngak jalan dom thun tapa hu rah tabiak di grauk dom xã, ban sit di dalam huyện, rik daong siam ka bruk mek hu angan huyện palei pala bharau ka huyện Cư Jút di thun 2025.

 Urak ini, dalam tỉnh Tiền Giang daok peih ngak biak ralo danak praong. Bruk khik kajap salamat di labik pandang ngak daok hu po pdang ngak , nhà thầu di tỉnh Tiền Giang pakhang, palong jalan sahaneng ka bruk ngak. Mban khik iek Danak dak padang ngak jalan mbak  Tiền Giang gam gam peih bruk brei kapaol urang nao pasang iek dom danka dak daok pandang ngak kayua đơn vị ngak po, duah mboh saong ramik dom bruk oh lagaih, kurang, suan hukum salamat dalam tuk ngak bruk. Dom danak dak padang ngak hu makna praong dalam tỉnh Tiền Giang brei ramik labik padang ngak piah adei sa-ai ngak kong  padeih piah raok Tet bangsa nasak Tapai.

Dom darak praong di TP.HCM oh lac pabak pandap panda ka darak pasa ban raya HCM bo daok lac labik pataom, pajeng pandap panda ka dom bhum. Dom harei jaik Tết ini, pandap panda hu ba mai dom darak praong piah pablei rilo jang meng 4-5 mbang duk haong yaok harei. Ini jeng lac tukvak mbuan hu rilo pandap oh siam, oh thau cambaih asal di nyu, ngak brei jhak tal prein yava di urang blei mbang. Tui amuk bà Phạm Khánh Phong Lan, akaok mban khik ramik salamat pandap mbang TP.HCM, urang blei njauk caik hatai pilih ruah dom labik angan je piah blei pandap, thau cambaih asal di nyu. Gah chức năng hu takik menuac, njauk pasang iek rilo labik, nan ye bhap bini jhuicaong abih tame dom kapul chức năng pasang iek taong abih dom labik ngak, kuhria gam dom labik pablei salih sit sot, pablei salih pandap eng drei ngak, pablei tapa mạng.

Yaom ariang di Cà Mau daok tagok glong. Kayua bruk blei tuk Tet tagok glong, langiu di nan, darak pasar Trung Quoc peih pabah mbang ngak brei yaom arieng chiat tagok. Meteh bilan dahlau, arieng hu blei di labik raong tok jaik 300.000 đồng/ kilo;  arieng janih ka 1 labaih 200.000 sa kilo. Urak ini arieng tagok yaom jang klau mbang duk haong dahlau daih; daok arieng jani ka 1 tagok dua mbang. Tui taong yaom di bhap bini saong urang blei, bruk khin blei arieng daok biak glong, arieng oh ginup pabak ka darak pasar. Yaom arieng Cà Mau daok tagok veik dalam dom harei anak tal. Yaom arieng Ca Mau glong abih  meda tapa 1,1 trieu dong di dom harei jaik Tet, glong jang thun dahlau.

Klau thun pandiak bhang ngak thu lagu dom ribaong caik ia di Tunisia, ngak kan kandah tal bruk yuak kuak, ngak ka rajaei njauk tagok yaom ia mac ngan haong dom baoh sang saong doanh nghiệp. Meng di bilan 9/2022, hajan di Tunisia tok hu labaih 1/5 tanut mbaih, ngak kan kandah tal bilan pala ngũ cốc saong  pandap mbang hu blaoh. Langik pandiak khang kayua biến đổi khí hậu, rilo binek thu lagu ngak kan kandah tal mblang pala ô liu saong lúa mì. Piah brei ngak dahlau di abih dom pandap ngũ cốc saong phun pala pablei tabiak negar langiu, rajaei Tunisia ieu kakei rahra padeih pruh dom mblang pala njam meng dom binek ia, gam tui di nan jeng patakik gah pabak ia ka dom trang trại piah tani tanat ginup ia manyum ka sang saong doanh nghiệp.

Rilo dich vu công cộng di Anh klaik klaoh tuk urang padeih bruk ndok tagok jien bilan, kuhria meng bilan hè thun 2022 daok rah tabiak. Lạm phát tagok glong ngak jien bilan biak takik di y tá, gru pato, urang ngak kong jaln pasei saong urang dom bruk ngak karei oh ginup mbang. Tui Công đoàn Dịch vụ Công saong Thương mại Anh, labaih 100.000 công chức padeih bruk di harei 1 bilan 2 anak tal, khin biai gauk veik ka jien bilan saong dom che do phuc loi. Liên minh Công nhân Đường sắt, Hàng hải saong Vận tải taneh ia jaik ini hu brei thau dahlau, dom mbang ndok padeih bruk “ meda daok rah tabiak” mbiah tal tuk halei karja brei langah ka jien bilan.

 Tapa mbang pasang iek hu Nghị viện Châu Âu brei thau, hu 45% urang hu sua tangi brei thau lac raidiuk di urang trun kayua bruk sarau kadhau tagok, dalam nan hu brei thau lac bruk mesuh gauk di Nga- Ucraina, bruk năng lượng, lạm phát tagok daok jeng sa bruk huac hana praong abih ngan haong rahra di Liên minh châu Âu. Tui nan, hu 39% dom urang hu sua tangi khan lac, raidiuk di drei meda trun dalam thun 2023. Dom taneh ia hu  raidiuk trun mboh cambaih abih lac Cộng hòa Síp ngan haong 70% dom urang hu sua tangi hu brei thau lac  radiuk di drei  trun, Hy Lạp (66%), France (62%) saong Bồ Đào Nha ( 57%) ./.