Ong Lương Văn Pho, Phó akaok Mban Bangsa saong agama tỉnh Bạc Liêu brei thau lac, dom prein khang daong ba hu daong ngak brei salih bahrau mbaok mata dom puk palei hu rilo mikva bangsa Khmer daok, raidiuk, mbang ngui, daok dang di mikva hu glaong tagok. Urak ini dom bhum palei hu rilo urang bangsa Khmer jeng hu jalan nao tal dom palei, dom xa, bilai y tế saong hu sang bac biak khang kajap. 

Di tỉnh Tiền Giang, jit ruak pandiak tabiak darah jeng daok tagok. Meng akaok thun tal ini, dalam tỉnh hu labaih 1.800 mbang urang njauk ruak pandiak tabiak darah, rilo abih lac di dom huyện Cái Bè, Cai Lậy saong Gò Công. Dalam nan, hu 1 uranaih ruak metai. Gah y tế tỉnh hu kakei lac, yaok sang njauk pacang jamaok gaok ia pandar meng bruk pacang sre pandap padang ia bo jamaok oh par tapa hu, pandar jru piah pametai anek jamaok, pataom mek nerak oh caik brei ia kandaong jeng labik ka anek lăng quăng daok. Abih di nyu lac tuk mboh yau njauk ruak pandiak tabiak darah ye brei samar drah nao tal labik iek ruak piah hu taong ruak.

Rilo sang urang nong raong ikan padoc di tỉnh Trà Vinh daok hu laba glaong meng yaom ikan tagok glaong. Meng akaok thun tal ini, yaom ikan padoc pablei tuk halei jeng tani tanat 50.000 đồng/kg. Tui yaom ini, urang raong ikan laba hu labaih 50 triệu đồng/ha/vụ. Tui Sở Ngak nong saong patagok palei pala Trà Vinh, tal akaok bilan 9, urang raong cap mek jaik 40.000 tấn ikan padoc pablei, tagok labaih 2.540 tấn dut saong tukvak ini thun dahlau. Urak ini, urang nong dalam tỉnh jeng hu palao ikan padaoc pajaih piah raong gilac veik hu 177 triệu drei di labik raong praong jaik 380ha.

Melam blaoh 10/9, abih 9 huyện, ban di tỉnh Bình Dương ba gauk peih ngak iek bruk pacang khuah padam khuah saong daong duah urang gaok bala. Yaok labik pilih ruah sa Tổ liên gia pacang khuah padam khuah piah pasram ngak iek. Dom bruk ngak iek lac khuah sang, khuah tiem pablei pandap, khuah sang ngak pandap, pablei salih... Dom bruk khuah jeng hu menuac gar gah dalam. Meng hu caga dahlau tani tanat, nan ye bruk pasram rah tabiak siam mekre, daong pabak ka dom menuac urang dalam dom tổ liên gia ilamu pacang khuah padam khuah saong daong urang gaok bala, patrun patakik metai lahik saong khut khat drap ar kayua khuah, patuh.

Dah page ini 11/9, apui khuah khang di sa baoh sang angaok jalan Thống Nhất, Phường 10, quận Gò Vấp, TPHCM, ngak ka dua urang metai. Tui khau tin tuk camriep, maong 2 kreh melam, diuk pasang po sang hu tabiak truh sang piah nao darak praong Bình Điền, dahlau di tuk nao hu kareik pabang gah langiu piah ka 2 urang anek ndih gah dalam. Tal maong 3, urang daok jaik sang hu mboh apui khuah biak khang di dalam sang, meng preo tagok ieu yaok urang gam haong kapul di pak nan duah jalan padam apui min oh jeng. Taduan hu panuac khan, Công an quận Gò Vấp hu ba kapul mai tal labik khuah piah padam. Hadei di tuk padam khuah, kapul chức năng duah mboh dua ranaih umo 6 thun saong umo 10 thun lac anek di po sang metai. Makna daok hu pasang iek, ngak cambaih laih.

Bang New York - Mỹ tabiak bruk lac harei Tết Âm lịch (daok ieu lac Tết Nguyên đán) lac harei padeih ka taong abih dom sang bac công lập di bang New York. Tui nan, dom sang bac công lập di bang ini hu padeih sa harei di harei Tết Âm lịch. Amuk Kathy Hochul, Thống đốc bang New York brei thau, bruk brei adat ka dom sang bac hu padeih sa harei dalam harei Tết Âm lịch lac jalan peih tabiak piah công nhận urang  Mỹ asal Á saong bruk parilo bangsa. Gam haong nan jia lac, Tết Âm lịch daok peih tabiak jalan ka dom dam dara duah thau saong pok paglaong ilamu meng kan di bangsa drei atau dom bangsa karei.

Hu 44 urang metai saong 46 urang karei jeng daok lahik hadei di mbang ribuk nhiệt đới tuh mai di gah maraong negar Brazil di adit blaoh. Mbang ribuk ngak brei hajan khang, ia sua saong glut jaleih taneh di rilo labik ngan haong hangin khang 110 km/h. Ribuk  ngak ka 224 urang njauk rambuac saong  labaih 14.000 urang hu panduan ba nao daok di bang Rio Grande do Sul. Rajaei negar ini hu tabiak bruk daong, tui nan yaok rahra njauk kan kandah kayua ribuk hu 160 USD. Bilan 6 meng blaoh, bang Rio Grande do Sul jeng gaok sa mbang ribuk ngak ka 13 urang metai, yaok ribau urang nao daok di labik karei atau lahik sang danaok.

Di tuk kreih melam 13/9 tui mon Hà Nội, di jabat Apple Park daok di California, Apple meda tabiak mbaok phiên bản bahrau abih di phone tangin iPhone 15 saong sa bản cập nhật bahrau ka phần mềm điều hành. iPhone rai bahrau meda hu dom salih karei njauk caik hatai, dalam nan hu bruk salih meng cổng sạc Lightning độc quyền di Cty tapa cổng USB-C piah tui adat sạc haong gauk di Liên minh Châu Âu. Tui kuhria mboh dahlau di dom chuyên gia, iPhone 15 jeng daok hu thaik thaok yau dahlau min salih hasit di labik jhih tuk hu mbeik kavong hasit. Bản Pro hu salih tapa pandar khung sườn meng ti-tan, daong ka phone nyu hanjuan jang. IPhone 15 hu tabiak mbaok haong 5 sambo màu lac xanh lam, san hô, kanyik katam, jhuk saong mbong patih./.