Ngak bruk haong dua tỉnh Bạc Liêu, Cà Mau ka bruk glut jaleih  takai tasik, takai kraong, Phó Thủ tướng Trần Lưu Quang ieu dom bhum palei pambuak haong dom jabat chuc nang di Trung ương ngak siam bruk kuhria dahlau bruk glut jaleih. Tuk ngak siam bruk kuhria dahlau meda khik caga hu ka anek manuac saong drap ar di rahra, patak pataom hu rilo gah buh jien tame di Trung ương saong bhum palei. Phó Thủ tướng jeng caik hatai lac, bhum palei njauk khang hatai panduan ba rahra daok di dom labik mbuan gaok bala nao daok di labik salamat; caik hatai sangka tal bruk mbang ngak mbang duah jien ka mikva. Daok phun jien buh tame, ngak njauk tui asal kadha, dak padang tui labik daok, brei ngak dahlau dom danak dak njauk ngak samar drah.

Tỉnh Bến Tre bahrau peih bruk brei thau xã mek hu angan Palei pala bahrau ka xã An Bình Tây, huyện Ba Tri. Bruk ngak mbang di xã An Bình Tây rilo meng lac ngak nong, raong glang saong pablei salih sit. Abih tih jien padang ngak palei pala bahrau lac jaik 154 tỷ đồng, dalam nan kadung jien karja buh brei labaih 108 tỷ đồng. Tapa nan, jalan dhuan puk palei hu padang ngak samu gauk, hadah mekre jang. Jien buh tame ka thủy lợi hu sangka rilo jang, nan ye labaih 1.300ha taneh pala drak luac thun hu pruh ia ginup abih. Bruk siam mekre, sron mbon puk palei hu khik kajap.

Kapul Chữ thập đỏ tỉnh Bình Phước pambuak haong Kapul Chữ thập đỏ tỉnh Đồng Nai, Kapul Chữ thập đỏ huyện Long Thành, hu jak ba daong tame saong jao alin 200 paok pandap ka anek saih, sang kan kathaot, sang gaok kan kandah, mikva bangsa takik daok pak xã Phước Tân, huyện Phú Riềng, tỉnh Bình Phước. langiu di nan, kapul Chữ thập đỏ tỉnh Đồng Nai daok jao alin Kapul Chữ thập đỏ tỉnh Bình Phước jru prang yaom 30 triệu đồng. Công ty TNHH PICO TPHCM jeng alin 145 paok pandap tal 145 anek saih kathaot bac naih joi, anek saih bangsa takik gaok kan kandah di dalam xã.

Sở Y tế TP.HCM bahrau hu panuac ieu UBND TP tabiak panuac lac hu jit ruak sởi dalam tuk dom menuac njauk ruak sởi tagok samar saong hu 3 uraniah njauk ruak sởi metai dalam thun ini.  Tui pathau khan meng dom sang iek ruak di dalam TP.HCM, kuhria tal harei 4/8, hu 505 mbang urang pandiak tagok baoh ia medil lac njauk ruak sởi, dalam nan hu 262 menuac dut iek mboh dương tính; labaih 50% lac dom menuac ruak di dom tinh ban karei mai iek ruak, taong ruak di ban raya. Sởi lac ruak njaom mbak tapa jalan suak yava kayua vi rút sởi ba mai. Gah  y tế kakei dom amaik ame ba anek nao tal dom labik y tế klauk ginup 2 mbang sởi tui lịch klauk jru  piah ngak jeng bruk pacang ruak ka uraniah.

Labaih 3 bilan ini mai, yaom hadang ralaow di dom tỉnh Tiền Giang saong Bến Tre trun khang. Urak ini yaom hadang thẻ takai mbong raong tui kong nghe glaong janih 30 drei sa kg, trun labaih 30% dut saong 3 bilan dahlau. Di tỉnh Bến Tre, rilo danao raong hadang the takai mbong raong tui kong nghe glaong daok njauk njom ruak jalan tung pruac mbong oh taong ruak hu ba tal khat lahik praong. Mayah yau dahlau deih, urang raong hadang meda hu laba meng 50.000-70.000/kg, urak ini yaok kg hadang tok hu laba meng 20.000-40.000 đồng.

Hadei di labaih 2 adit pakacah, melam bloh, adat tamat Thế vận hội Olympic Paris 2024 ngan saong kadha "Dom Kỷ lục" hu rah tabiak dalam praong prang di mblang vận động Stade de France daok di gah langiu ban ine Paris. Hu thau, tamat pakacah, kapul thể thao Mỹ dang dhi 1, taneh ia po sang lac Prang dang dhi 5. Bruk njuak biai di adat tamat lac bruk hu mbaok di diễn viên dane angan urang Mỹ angan Tom Cruise haong bruk par trun meng tabung mblang vận động piah pan hala dok Olympic ndik radaih angaok jalan Paris, hadei di nan tagok kapal haok piah ba hala dok Olympic mai ban Los Angeles di Mỹ. 

Tỉnh Tứ Xuyên, Trung Quốc hu ba 80.000 rahra tabiak truh dom labik kan kandah, dalam tuk gaok hajan khang dalam dom harei tapa. Taphia di nan, kanja bhum palei jeng paglaong bruk pasang iek pak di labik, pasang iek saong pacang caga dahlau dom bala kayua hajan. Hajan khang jeng ngak khat lahik kinh te di Tứ Xuyên tui kuhria tagok tal 250 triệu nhân dân tệ (samu labaih 38 triệu USD).

Dalam sa bruk ngak khang bahrau piah pacang cakak bruk me-in mbia online, rajaei Indonesia bahrau payua thư cảnh báo tal 21 labik pabak bruk “thanh toán kỹ thuật số” di taneh ia ini. Dahlau di nan, taneh ia ini hu pacang jaik 3 triệu website pambuak tal bruk ma-in mbia online, ieu dom nền tảng kỹ thuật số taoh klaak bruk yaih khan ka ma-in mbia. Akaok Hạ viện Indonesia, hu panuac ieu rajaei samar drah langyah bruk  ma-in mbia online di urang daok ranaih umo thun./.