Tinh Dak Lak peih ngak ralo bruk ilimo, tamia adaoh hadah bar uan raok Tet Nguyen dan Ula Naih 2025. Malam tame thun barau, tinh barau peih ngak danak dak tamia adaoh saong cuh phao bingu biar di Mblang bein 10/3, ban Buon Ma Thuot. Limo huyen karei jang hu cuh phao bingu uan raok thun barau. Dom bruk ngak ilimo, padhih pahat yau harei ilimo dom bangsa, pakacah gilai, harei raya ilimo bhap bini, paoh kong chieng…hu peih ngak di dom bhum palei piah ka mikva saong tuai damuai hu uan raok thun barau bui sambai.

Danak dak “ Xuan Bien phong - Anit ranam mikva bhum palei” di tinh Gia Lai hu alin brei labaih 1.300 paok pandap, kuhria tui jien labaih 700 trieu dong tal dom baoh sang kathaot, anek saih sang rambah saong urang hu angan je. Dom bruk pataom ilamo, daoh tamia, padhih the thao jeng hu peih ngak dalam chreih chrai, ba mai yawa langik uan raok xuan siam mekre ka mikva. Dom urang lin bien phong daok kham merat daong mikva patagok bruk ngak mbang kinh te, patruh iek patrun kathaot, rik tame pakhang hatai jia di bhap bini dalam raidiuk, pambuak khang kajap bol lin bhap bini labik tapen negar.

Kapul pachreih bac tinh Soc Trang barau peih bruk Alin paok jien bac, pachreih urang bac naih joi Lương Định Của ka 391 anek saih hadah krah di tinh kuhria abih tih labaih 1 ty 2 ratuh trieu ndong. Thun blaoh dom pakat Kapul pachreih bac tinh Soc Trang hu jak ba dom urang padak padang alin brei 28 baoh sang Pachreih bac ka anek saih kham marat bac naih joi min daok rambah di sang daok, hu yaom yaok sa baoh sang 70 trieu ndong.

Harei ini 24/1 nan lac harei 25 bilan Mat, Mblang kapal haok dunya Tân Sơn Nhất , Ban raya HCM padang veik bruk ngak birau tuk duh pajeng tuai tal 1.002 mbang par saong taduan raok 150.000 tuai damuai, glong abih kuhria meng dahlau mai saong glong jang bruk kuhria caga dahlau di nan  lac 970 mbang par. Ralo tuai damuai hu labaih 96.000 tuai. Meng thau kuhria caga dahlau dom jalan ngak hu siam yau nan ye  yaom lac rilo tuai min bruk di mblang kapal haok khik hu tani tanat. Tui kuhria mboh dahlau tuk tabung di Tet thun ini, mblang kapal haok Tân Sơn Nhất duh ka 26.000 mbang kapal haok par, ngan haong labaih 4 trieu mbang tuai damuai.

Hadei sa bilan ba tame pandar oh mek jien, jalan metro ka 1 Ban raya HCM (Ben Thanh - Suoi Tien) barau mek jien harak ve. Dalam harei akaok mati mek jien harak ve, mayah tuai damuai gaok kan kandah hagait dalam bruk pablei harak ve tu dong njauk khut, nan pandar blei harak ve bi-ar tui jien mbaok. Tuai damuai takik jang dut haong dom harei dahlau, biar abih lac tame tukvak tabung glaong biar harei, dalam tuk page nao meng Ban Thu Duc tal pusak biak ralo. Yaok meng tukvak ba tame pandar, jalan metro 1 hu duh labaih 2 trieu 8 ratuh rabau mbang tuai damuai, glong jang tanut ba tabiak jaik 250%.

Lien Hop Quoc  harei kabroi khan lac Mỹ tabiak truh Gah Y te Dunya (WHO) di harei 22/1/2026, hadei tuk Tong thong Donald Trump khan brei thau khin tabiak truh WHO kayua jabat ini ngak suan bruk jit ruak COVID-19 saong dom bruk sraw kadau gah y te karei di dunya. Mỹ lac taneh ia daong ralo abih ka WHO, rik dang labaih 18% kuhria abih tih phun jien di jabat ini. Mỹ brei padeih ginum biai ka sarak hiep uoc jit ruak COVID-19 di WHO dalam tuk jaik tabiak truh gah nan. 

Rajaei Argentina barau khan lac tukvak ni patrun jien je ka dom pandap pablei tabiak nagar langiu dom janih ratak, piah patrun trak damak ka urang ngak nong. Tui Akaok Kinh te Argentina Luis Caputo - jien je pablei tabiak nagar langiu ratak ndau nanh ngan haong dom pandap karei, hu patrun yaok meng akaok adit anak tal saong katung atah tal abih bilan 6 thun ini. Argentina lac nagar pablei tabiak nagar langiu manyek ratak ndau nanh saong tapung ratak ndau nanh dang akaok dunya.

Harei kabroi, Mban peih bruk  Pataom flim Berlin, Đức khan brei thau dom phim pakacah thun ini, dalam nan njauk caik hatai hu phim birau di ndao dien  urang Mỹ Richard Linklater. Piah brei mboh jalan sahaneng pacang caga  parabha bangsa, Pataom flim thun ini meda hu peih ngak iek flim Shoah kayua  Claude Lanzmann padang ngak. Ini lac flim tai lieu mbang akok meti thun 1985, hu peih ngak dalam 12 thun ngan haong rilo mbang tangin sua ndem meyai nao mai di dunya.