Anak bruk rah tabiak srau kadau di jit soi, gah y te tinh Dak Lak daok samar drah peih bruk klauk jru ka labaih 42.000 uranaih dalam tinh di dalam bilan 3 ini. Tui pasak Pasang iek ruak hakik tinh Dak Lak, meng akaok thun 2025 tal harei 19/3, dalam tinh hu taduan labaih 620 urang ruak pandiak ndaih baoh medil ka ruak soi, dalam nan 207 urang njauk virus ruak soi. Dom urang ruak pataom rilo meng lac pataom di dom huyen Buôn Đôn, Krông Pắk, Ea Súp saong M’Drắk, rilo meng lac oh ka hu klauk vaccine caga ruak soi. Kuhria peih bruk klauk jru ka labaih 7.800 uranaih umo meng 6 tal mala 9 bilan saong labaih 34.600 uranaih umo meng 1 tal 10 thun.

Ban sit Tịnh Biên, tinh An Giang  hu 21 km jalan jaik taphia negar Campuchia, labik ini hu ralo urang bangsa Khmer  diukrai. Bruk duah thau hukum tuk halei jeng lac bruk kan kandah ngan haong mikva, kayua rilo paga pacang kayua karei panuac ndem,  akhar vak, ilamo saong raidiuk mbang ngui. Kapol urang Kumei xa Vĩnh Trung hu peih dom mbang pathau khan paglong ilamo jalan sahaneng di bhap bini urang bangsa takik, daong ka urang salih jalan sahaneng njauk.  Lữ đoàn Tăng thiết giáp 416 (Quân khu 9) jeng iek praong bruk pathau khan dawak, pato pakai hukum, paglong jalan sahaneng ngak tui hukuk ka mikva bhap bini.

Huyen Krông Pa, tinh Gia Lai brei jien padai buh tame ngak dahlau patagok jalan mbak palei pala, abih di nyu nan lac bhum mikva bangsa takik, pabak samu hatai caong nao mai jeng yau piah patagok kinh te – xa hoi. Huyen hu pakajap, peih praong rilo jalan pambuak dom xa Ia Mláh, Phú Cần saong ban sit Phú Túc atah 8,3 km, phun jien buh tame 90 ty dong hu salah blaoh. Bruk buh jien tame jalan mbak hu daong huyen Krông Pa patakik baoh sang kathaot trun 3,5% saong paglaong jien mek tame kuhria tui akaok menuas.

Kapol Chu thap do tinh Vinh Long birau alin brei jaik 200 trieu dong daong ka baoh sang kamuan Thái Khánh Linh anek saih bac tal 5, Sang bac Tiểu học Nguyễn Du, TP Vĩnh Long mblung ia metai. Dalam nan, jien jak ba urang rik tapa App Thiện Nguyện lac 188 trieu dong. Kamuan Thái Khánh Linh mblung ia meta di harei 13/3 di ar pacang kraong Phường 1, Ban Vinh Long. Tuk kamuan daong ame puh ramik hareik di tapen kraong blaoh trun rao tangin  labuh trun kraong. Sang gait hu muk jeng amaik umo 90 thun saong ame ngak bruk puh ramik hareik, raidiuk biak kan kandah. 

Di tabung glaong pandiak  bhang, Bein pakat Negar Chư Mom Ray, tinh Kon Tum daok suhsah ka bruk caga apui khuah glai. Jaik abih glai dalam tinh jeng daok di tanut kan kandah mbuan khuah apui glaong abih (pakat 5). Bein pakat negar urak ini hu 18.000 ha glai daok mbuan rah tabiak apui khuah biak glaong. Kapul labaih 70 urang di bein daok pasang iek 24/24 di 14 kadai tuan, gam haong dom kapul co dong saong pathau khan. Dom bruk pasang iek urang tabiak tame glai saong srap gap radaih caga khuah, pataom tame caik dahlau abih ka bruk caga apui khuah glai.

Thun ini, Roya Eid al-Fitry di taneh ia Indonesia hu rilo urang Islam abih di dunya ini meng harei 31/3 tal harei 7/4 anak tal. Yau nan min, harei Roya ini oh dreih yau dom taneh ia hu urang Islam karei, bo brei iek tui ia bulan mblo tagok. Urang Islam  di dunya daok caga dalam chreih chrai uan raok Roya Eid al-Fitry hadei bilan iek Ramadan. Ini oh lac tukvak  urang dalam sang hu pataom mbaok atau  mbang dom pandap mbang biak bingi  di harei Eid al-Fitry bo daok ndung bak makna biak dalam di urang Islam tapa sa bilan eik rilo glaih glar dalam rup pabhap jeng yau akaok sahaneng.

Tinh Chiết Giang, bhum Timur Trung Quoc bahrau ini hu peih tabiak bruk hadah krah pato pakai tri tue nhan tao (AI) dui atah 4 bilan ka 300.000 urajakar di karja palei dalam tinh. Danak dak piah paglaong ilamo AI dalam dom rajakar palei saong srap gap ka dom urang nan dom ilamo piah dui ba dom salih kinh te – xa hoi saong bruk ngak kong sẩm drah, pamaong tal bruk pataom AI tame khik iek saong jhul tagok bruk khik iek hadah krah jang.

Akok Mentri Kinh te  Mexico Marcelo Ebrard khan lac, taneh ia ini daok peih ngak pasamar dom jalan khik caga dom doanh nghiep taneh ia ini klak di My mek kak jien je. Danak dak hu daong di dom kong ty Mexico pablei ndap nda tabiak negar langiu, meriak gauk saong salih birau. Langiu di nan, rajaei Mexico daok ngak bruk haong dom  urang ngak praong di dom gah piah caga cagar veik bruk khin taong jien je pambak praong di bilan 4 anak tal di Tong thong My Donald Trump.