Thứ trưởng Mintri Padang ngak ong Nguyễn Văn Sinh brei thau ka danak dak Hukum sang danaok pasiam veik meda hu ngak pacadu dom asal kadha ka bruk daok, jien mek tame, daong ka rahra mbuan pambuak haong sang daok xã hội. salih ka 3 asal kadha hu brei thau lac urang blei sang danaok xã hội lac labik daok, jien mek tame saong mblang taneh di sang daok ye danak dak pasiam veik di Hukum sang danaok meda klak tapa bruk labik daok. Asal ka jien mek tame jeng hu paglaong jang. Blang taneh sang danaok mayah dahlau deih hu brei adat lac tui kuhria lac mala 10 m2 sa urang, ye urak ini meda pasang iek patagok 15 m2 sa urang. Hukum jeng pataom tame nyaom sarak buh tame 20% kadung taneh dalam danak dak sang pablei salih jang yau mek taneh di danak dak dang sa drei piah cak rok patagok sang danaok xã hội.

Tỉnh Hậu Giang bahrau ba tabiak danak dak padang ngak 1.400 baoh sang jum pataom, yaom labaih 70 tỷ đồng. Di tuk ba tabiak danak dak, tỉnh Hậu Giang taduan hu labaih 33 tỷ đồng meng dom jabat, doanh nghiệp; gam haong nan, alin hadiah 20 baoh sang jum pataom brei ka dom sang bhap bini daok di ban Vị Thanh, yaok sang yaom 50 triệu đồng. Ong Đồng Văn Thanh, Chủ tịch UBND tỉnh Hậu Giang ieu dom puk palei kham merat ba tabiak ngak praong dalam bruk pakacah “Abih gauk dalam taneh ia ba tangin tame daong ka urang kan kanthaot, oh caik ka urang halei daok veik gah likuk”, sangka jang tal dom baoh sang sarak karja, urang buh prein ka CM, sang kan kathaot, sang kan kandah, sang urang DTTS, daong ka urang tani tanat raidiuk.

Mikva urang nong di tỉnh Tiền Giang daok tame bilan yuak padai Hè thu. Kayua yaom padai biak glaong, phun jien buh tame mbaih, nan ye urang nong laba glaong. Bilan padai Hè Thu ini, urang nong di tỉnh Tiền Giang pala drak labaih 40 ribau ha, năng suất mek tame tui kuhria labaih 6-7 tấn/ha saong padai hu yaom glaong abih dalam labaih 10 thun tapa. Meng yaom yau urak ini, hadei di tuk kaoh abih phun jien, urang pala padai hu laba labaih 40 triệu đồng/hecta, glaong jaik mateh dut saong mbang dahlau.

Mesup ini (22/9), Pasak brei thau ka bruk megei baoh taneh saong riyak sóng thần brei khan lac, mboh hu mbang megei baoh taneh khang 4,4 di labik huyện Kon Plông, tỉnh Kon Tum. Mbang megei baoh taneh rah tabiak tuk mon 7 -  45 minit, labik pasak megei daok dalam haluk jaik 8 km. Melam dahlau di nan, jeng di labik ini hu 2 mbang megei baoh taneh khang 2,7 saong 2,9, pasak megei di labik dalam 8,1 tal 10 km. Dom mbang megei baoh taneh nan oh ba tal bala hagait. 

​Jeng dalam dah page ini (22/9), di phường Bình Hòa, ban Thuận An, tỉnh Bình Dương rahtabiak bruk khuah praong mbang abih cửa hàng pablei radaih mac. Tui khau tin brei thau tuk camriep, labaih maong 6 dah page, rahra mboh apui saong thak jhuk par tagok meng Cửa hàng radaih mac Kim Nhật Phát di khu phố Bình Đáng, phường Bình Hòa ye kham marat jar pabang tame piah padam khuah min oh hu. Dom minit hadei, apui mbang abih cửa hàng radaih mac. Gah chức năng hu ba 8 sruh radaih padam khuan, gam haong yaok piluh urang jakar, urang lin mai tal labik piah padam apui. Tal labaih maong 7 page nan, apui meng hu padam abih. Bruk khuah nan oh hu menuac urang halei njauk hagait, min yaok pilih sruh radaih mac njauk apui mbang abih.

Dalam sa bruk pataom padang kadung jien di New York, Tổng thống Mỹ Biden brei thau, bruk pakacah tame Sang mbong thun 2024 puac abih meda jeng bruk pakacah di ong haong urang ngak Tổng thống dahlau daih lac Donald Trump. Dalam bruk pakacah gauk dalam đảng Cộng hòa, ong Donald Trump urak ini daok dang akaok haong 46% duk haong urang dang patui di nan lac Thống đốc bang Florida Ron DeSantis. Dalam sa harak payua tal dom urang pachreih tui ong di New York, Tổng thống Biden ndom lac yaok urang Hoa Kỳ takre dân chủ njauk ba gauk tame bruk pilih ruah anak tal piah daong ka ong mek hu mbang ngak Tong thong ka 2 saong daong ka nền dân chủ Hoa Kỳ.

Akaok Mintri Ngoại giao Trung Quốc harei kabroi (21/9) brei thau, Akaok negar Tập Cận Bình meda hu mbaok tuk peih mbaok Harei pataom pakacah thể thao châu Á mbang ka 19 di Hàng Châu, tỉnh Chiết Giang. Bruk peih mbaok meda lac bruk pambuak di công nghệ saong ilamo, gam tui di nan jeng pamblak tame ilamo meng kan siam gheih di negar Trung Quốc tapa dom hatai sahaneng ilamo yau ye blah thaot thủy mặc, athak ia kauan Giang Nam. Min, bruk cuh phao bingu meng kan biak gheih meda oh hu peih tabiak. Bruk peih mbaok Á vận hội hu peih ngak tuk melam paguh (23/9) di Mblang pahat rup Hoa Sen praong dalam Pasak thể thao Olympic Hàng Châu hu prein taduan 100.000 menuac.

Hải quan Prang harei kabroi khan lac cap mek hu sa bruk pablei salih glo athur praong abih meng châu  Phi, dalam nan hu rilo janih mbuan si lahik abih. Tui Hải quan Pháp, jhung thun blaoh, gah chức năng hu cap mek 728 pa-op glo athur di mblang kapal haoh Roissy di ban ine Paris. Dom pa-op glo  athur ini hu papaok sre dalam dom bưu phẩm payua meng châu Phi saong daok angaok jalan payua tal dom urang roh duah di Mỹ. Dalam dom pandap cap mek nan, labaih meteh lac di dom janih njauk hu khik caga tui harak Công ước dunya ka pablei salih dom janih athur saong athur glai daok mbuan si lahik abih./.