Tinh Long An sanya brei buh labaih 10.000 ti dong piah peih ngak danak dak Jalan Vành đai 4 TP.HCM tapa tinh ini. Danak dak Jalan Vành đai 4 TP.HCM atah abih tih labaih jaik 160km, nao tapa TPHCM saong dom tinh Ba Ria – Vung Tau, Dong Nai saong Long An. Tui bruk ba tabiak, danak dak Jalan Vanh dai 4 Ban raya HCM meda ngak salah blaoh, ba tame pandar  dahlau thun 2030. Danak ini brei rik tame  pambuak dom pasak kinh te, labik kinh te, KCN praong , dom do thi ve tinh di Ban raya HCM saong Bhum Kinh te praong gah Meraong negar hu patagok siam abih dom lagaih di dom tinh.

Tinh Soc Trang kham merat ngak brei salah Danak dak ngak brei oh daok baih sang taik tahak ka urang bangsa takik dahlau Tet Chol Chnam Thmay saong ngak salah bruk daong sang daok ka urang hu buh prein yawa dahlau harei 30/4 anak. Piah danak ngak salah bruk njauk tukvak ba tabiak, Mban tacei ba peih bruk ngak brei oh daok baoh sang taik tahak tinh Soc Trang caong khin dom pakat uy, karja saong dom gah chinh tri - xa hoi brei ngak sami samar, tui iek tani tanat saong lang talaih dom kan kandah, tavak tavaiy dom bruk karei mblo tabiak.

Pandiak bhang pandiak, dom tinh gah Meraong negar pablei baoh la-u, yaom lac yaom tagok glong min dom po labik pablei bhian oh blei hu la-u tame. Tui  Hiệp hội la-u Việt Nam, yaom la-u that tagok 110% dut saong tukvak ini thun  dahlau, dalam tuk la-u thu tagok 150%. Dom urang blei la-u meng Trung Quốc, Malaysia, Thái Lan daok kham blei hu la-u Viet Nam, ba tal meriak gauk blei. Anak bruk nan, di tinh Ben Tre, taneh pala la-u xiem hijao daok hu peih praong, pamong tal bruk padang ngak pambuak gauk piah la-u hu yaom glong khang kajap.

So Ilamo, The thao saong Yulit tinh Bình Thuận khan lac, Le mit tinh pahadar 50 thun Harei peih paha tỉnh Bình Thuận (19/4/1975 - 19/4/2025) meda peih tabiak di harei 19/4 di labik Sang daoh saong Parang iek ilamo nghe thuat tinh saong hadei di nan lac danak dak nghe thuat. Di var pahadar nan, tinh Binh Thuan hu peih bruk cuh phao bingu. Parang iek thaot binguk, yaih khan  pandap pablei salih -yulit ngan haong kadha “ Bình Thuận – 50 thun dak padang, salih birau saong patagok” saong dom bruk ngak padhih the thao jeng hu peih ngak.

Tinh Binh Duong veik sa urang metai kayua ruak soi. Nan lac anek kamei umo 8 bilan, daok di huyen Bàu Bàng. Anek meng dahlau hu njauk hoi chung srau kadau gen di truyen kan si gaok mboh. Urang metai kayua ruak soi ini lac bruk oh ka klauk jru vaccine hu janih soi. Urak ini Binh Duong daok gam gam peih bruk klauk jru labaih 10.000 jru vaccine pacang, caga jit ruak soi, kuhria tamat dalam harei 31/3 anak tal.

Jabat y te di Gaza khan lac hu takik abih di nyu lac 830 urang metai saong jaik 1.800 urang karei njauk rambuac di Gaza meng 10 harei tapa, tuk bol lin Israel patui veik dom bruk taong tame grauk labik di bhum taneh ini. Dalam panuac di video payua tal bhap bini Gaza, Akok Mentri Quoc phong Israel khan lac, Bol lin khik caga taneh ia ini samar ngak catang bruk di dom labik karei di Gaza, bhap bini  brei ramik tabiak truh dom labik mesruh metak piah khik hu salamat ka drei.

Rilo bhum palei di Japon daok rah tabiak langik pandiak oh bhian mboh tuk pandiak labaih 30°C, samu haong tanut pandiak dalam bilan pandiak. Njauk caik hatai sangka, ini jeng lac mbang akaok meti kuhria meng thun 1999 – lac hadei 26 thun, Japon hu rah tabiak bruk sa harei hu tanut pandiak samu haong bilan pandiak dalam bilan 3. Jabat Kuhria Langik Japon kakei dahlau ka pandiak di rilo labik meda patui veik tagok glaong jang dut haong tanut kuhria rah tapa labaih 10°C. Kayua nan, rahra brei caga dom jalan langyah pacang pandiak saong caga mebuk pandiak.

Sa roh duah birau ini brei mboh, urang Philippines dang kaok bhum taneh Đông Nam Á saong dak angan dhi 4 di dunya ka bruk urang kurang ndih. Tui yaok kuhria dalam 10 urang Philippines ye hu jaik 6 urang ndih takik jang 7 mon yaok harei nan lac kurang ndik tui panuac ba tabiak di dom urang gah y te. Bruk kurang ndih dui atah oh lac ngak jalan sahaneng takik hadah, takik kanal hadar, bo daok ba tal mbuan pandiak hatai sahanak saong having akaok.