Rilo pandap hu ngak pasiam piah ba tame angan OCOP

Tui Mintri LĐTBXH, tal puac bilan 8, hu 22 tỉnh, ban peih jien brei ka taong abih hồ sơ di urang ngak payua mai, ngak salah bruk peih brei pok jien daong pah sang tui Sarak 08 di Thủ tướng Rajaei. Taphia di nan, Mintri LĐTBXH jeng pok meyaom bruk kham merat di dom tỉnh ban hu urang ngak rilo jeng jhul samar bruk peih brei jien yau ye  Đồng Nai peih hu 96,9%; Ban raya Hồ Chí Minh hu 62,01%; Bình Dương hu 60,99%.   

Tỉnh Sóc Trăng daok kham merat ba taong abih pandap OCOP meng 3 patuk tagok hu tagok sàn pablei salih điện tử postmart.vn haong voso.vn. Taong abih dom sang ngak nong tagok sàn pablei salih điện tử hu pato kỹ năng số, ilamu pablei salih… Piah ngak hu bruk ini, tỉnh peih bruk padang angan sang ngak nong saong dom kaya nong, pasang iek, yaok pataom, parabha janih sang ngak nong, thau cambaih laih tui bruk ngak praong atau sit saong dom janih kaya nong.

Urak ini menuac mai puac tapuk di Gilang tapuk tỉnh Tiền Giang dak harei dak takik nao. Piah pasiam veik bruk ini, Gilang tapuk Tiền Giang daok ba tabiak dom bruk “duah menuac puac tapuk” yau ye: ba tapuk mai puik palei tapa dom sruh radaih “tri thức”, radaih gilang tapuk nao mai tal dom xã bhum atah bayah, peih danak dak puac tapuk di dom sang bac; yaih khan tapuk mangaok rayo papar sap, papar binguk... Langiu di nan, Gilang tapuk Tiền Giang daok hu padang blah website hu rilo asal kadha piah duh ka urang puac tapuk online, tui nan, yaok bilan dui pacheih hu meng 1.700-1.900 mbang urang truy cập.

Tui pasak pasang iek ruak kik Đồng Nai, 2 type virus pandiak tabiak darah biak khang lac D1 saong D2 njaom mbak biak samar. Bruk hu haong gauk 2 type virus ini ngak ka jit pandiak tabiak darah di Đồng Nai gam trak, gam njaom mbak praong. Meng akaok thun tal ini, Đồng Nai hu labaih 19.200 mbang urang njauk ruak pandiak tabiak darah, tagok 280% duk haong tukvak ini thun 2021, dang ka 2 dalam taneh ia, hadei di ban raya HCM. Tal urak ini, hu 16 urang metai, dalam nan rilo meng lac urang praong.

Pagam pambak tame bruk urang ngak caong duah hu bruk ngak, jaik di ini, kol pachot nyu padang tabiak dom blah web yau: Bruk ngak Campuchia, Kapul urang Việt daok di Campuchia…pachot lac bruk ngak hanjul, jien bilan glaong, saong daok yar jien dahlau piah nao jalan tapa negar langiu, ngak brei rilo urang njauk lah pachot. Hadei di nan, kol nyu duah jalan ba urang ngak tapa Campuchia tame ngak bruk dalam dom labik kayua urang Trung Quốc ngak po, yaok harei ngak bruk meng 15-17 mon, min jien bilan meng 5 tal 7 triệu đồng sa bilan min. Nan ye Công an ban Đồng Xoài, tỉnh Bình Phước hu panuac kakei bhap bini paglaong hatai sangka anak panuac ieu da-a “tapa Campuchia ngak bruk hanjul, jien bilan glaong” angaok mạng xã hội. Meyah meda nao ye brei duah thau cambaih saong khan brei gauk gar thau ka labik ngak, bruk ngak dahlau di tuk nao.

Dom taneh ia châu Âu jeng daok caong hu khí đốt meng Nga. Jabat khik ramik năng lượng Đức ndom lac: Đức caong hu khí đốt meng taneh ia langiu saong oh hu labik pabak khí đốt ini, "oh hu hagait ngak bruk". Dalam tuk nan Hungary jeng daok ginum biai blei khí đốt meng Gazprom piah patagok bruk pabak yaok harei. Tui kuhria, dua gah meda ginum biai njuak gauk di bilan hadei.

Thủ tướng Australia brei thau, taneh ia ini meda brei tagok dom sarak daong palagaih ka urang ngak taneh ia langiu tame negar ini , pato pakai saong ngak bruk piah pacang veik bruk kurang urang ngak urak ini. Bruk ini hu maong lac takai yam nao patui di nan, hadei di danak dak Panduan salih menuac ngak Australia di Nam Thái Bình Dương, hu Australia peih tabiak ngak meng bilan 4 meng bloh piah langyah bruk kurang urang ngak dak harei dak rilo di taneh ia ini.

Meng thun 2018 tal urak ini, Mexico daong hu ka jaik 77.500 urang “di cư” lac menuac negar langiu, dom urang nan, lac menuac njauk bala di kol pablei salih menuac. Bhum taneh ini daok hu biak rilo menuac meng dom taneh ia di Trung saong Nam Mỹ tuh mai taneh ia Mỹ, brei mboh tapa dom kapul meng yaok ratuh urang oh huac kan kandah, glaih glar, nao takai yaok ratuh mbaik jalan meng gah meraong Mexico piah nao tal biên giới gah barak. Bahrau ini, di harei 28/8 meng bloh, sa kapul jaik 1.000 urang tabiak meng bang Chiapas jaik taphia Guatemala, dalam nan hu yaok pluh urang kumei saong uranaih./. 

Urang lang: Thu Thảo -Mousaphuong -3/9