Danak dak hu jao alin 200 paok pandap ka dom sang lac mikva bangsa, sang jaik kathaot, sang gaok kan kandah daok pak phường 1, phường 2, phường Ninh Thạnh saong dom xã Bình Minh, Tân Bình, Thạnh Tân. Yaok paok pandap hu yaom 400.000 đồng, hu brah saong dom pandap pandar yaok harei. Abih tih yaom dom paok pandap hu alin mbang ini lac 80 triệu đồng kayua paha Phổ Ninh jak ba, hu dom urang phat tu daong tame.

Bộ Tư lệnh Binh đoàn 15 bahrau peih bruk pok meyaom 104 taha palei, akaok puk, urang hu angan je, halau janeng agama hu angan dalam bruk pambuak gauk ngak bruk jak ba, saong 24 gu baoh sang urang ngak lac urang Kinh saong urang bangsa takik di 2 tỉnh Gia Lai saong Kon Tum hu angan dalam 2 thun tapa. Dalam 2 thun tapa, Binh đoàn 15 hu ba bruk ngak tani tanat ka 9.000 urang ngak lac urang bangsa takik, peih bruk brei ka labaih 4.200 gu baoh sang urang ngak lac urang Kinh haong urang bangsa takik pambuak gauk, daong gauk patagok bruk ngak mbang kinh tế. 

Công an tỉnh Long An brei thau, dom bruk ngak “urang peih radaih salamat saong pacang caga kol tội phạm,” “Khik ramik, cảm hóa, pato pakai daong urang njil ma túy saong jhul kadun likuk ma túy dalam rahra”, “Khik kajap salamat jalan mbak anak pabah mbang sang bac”… daok hu peih ngak lagaih hu peih praong, daong khik kajap siam mekre, salamat jalan mbak. Di xã Phước Lý, huyện Cần Giuộc urak ini jak ba hu dom baoh sang caik 3.257 camera an ninh. Yaok thun, abih tih labik rahra, jabat, labik pato magru di xa mek hu tanut chuan “salamat ka bruk siam makre, saron mbon dalam rahra”.

Tỉnh Tiền Giang mboh hu 31 labik mỏ cuah angaok kraong Tiền hu ba tame kuac mek cuah piah pabak jaik 16 triệu m3 cuah ka 5 danak dak jalan mbak pakat negar. Anak mata, UBND tỉnh Tiền Giang brei jhul samar adat kuac mek cuah  tui adat di 3 mỏ cuah angaok kraong Tiền dalam huyện Cái Bè, khik kajap bruk pabak 6,6 triệu m3 cuah ka danak dak jalan Vành đai 3 TP Hồ Chí Minh. UBND tỉnh Tiền Giang jeng hu tacei pato dom pakat, daom gah chức năng samar roh duah, peih ngak samar bruk brei harak adat mek cuah di dom labik mỏ cuah hu adat brei kuac mek, piah khik kajap bruk pabak cuah ka danak dak jalan mbak praong pakat negar. 

Sở padang ngak TP Hồ Chí Minh hu ba tabiak asal kadha bahrau ka bruk khik ramik brei pah sang trọ piah khik tani tanat salamat pacang caga khuah patuh saong siam makre, saron mboh di rahra, dalam nan yaok bilik trọ  praong takik abih lac 5 m2 sàn sa urang; jalan praong takik abih lac 4 m; labik sang trọ njauk daok atah jalan oh tapa 100 m. Di dalam TP Hồ Chí Minh urak ini hu labaih 60.500 labik brei pah sang trọ saong bilik pacang brei pah. Mayah pandar asal kadha bahrau tui danak dak, ye jaik 13 ribau labik sang tro mbuan njauk kareik pabah mbang.

Tui khua tin meng Trung Quốc, takik abih 2 menuac matai kayua mebuk pandiak dalam mbang pandiak khang daok rah tabiak di bhum gah Pai taneh ia ini. Dalam 8 harei tapa, dom dịch vụ samar drah di Thâm Quyến, tỉnh Quảng Đông taduan hu 88 mbang ieu cấp cứu di sang kayua dom bruk prein yava pambuak tal pandiak. Ban Hàng Châu, langik pandiak khang di abih, tagok tal jaik 42 độ C dalam harei 3/8. Langik pandiak di dom labik dalam dom tỉnh An Huy, Giang Tô saong Chiết Giang yam tapa 40 độ C.

Rilo labik di negar Italia brei tabiak bruk samar drah tuk mbang langik pandiak biak khang daok rahtabiak, ngak kan kandah biak trak damak tal raidiuk di rahra saong bruk ngak mbang, kinh te di negar ini. Nhiet do di dom bhum yam tapa 40°C, ngak brei kanja njauk ba tabiak dom jalan langyah samar drah piah khik caga ka rahra, abih di nyu nan lac urang taha saong uranaih. Gam tui di nan jeng ieu kakei rahra patakik tabiak gah langiu saong paglaong pabak ia hacih di dom labik hu rilo manuac. Tui Mintri Y tế Italia, dom ban daok dalam tanut kakei “kanjik katam” atau “bhong” meda hu rilo jang.

Ủy ban chuyên trách di Liên hợp quốc (LHQ), hu lambaok dom taneh ia di LHQ hu brei tapa dự thảo Công ước LHQ ka pacang caga tội phạm mạng. Dự thảo Công ước ba tabiak jalan adat abih gah ka dom taneh ia peih bruk pambuak gauk pakat dunya dalam pacang caga, duah thau, truy tố, langyah bruk ngak suan angaok mạng, dalam nan hu rilo janih duas urak ini daok ngak pandik hatai yau ye bruk taong tame hệ thống máy tính, bleik pachot online, ba tabiak suan hukum thaot binguk oh lagaih, lih tame anek naih, rao jien./.