Durian di Tiền Giang hu mbaok di rilo taneh ia di dunya 

Tui Mintri Lao động, Thương binh saong Xã hội, kuhria rah tapa,  jien mek tame di yaok urang ngak di dom bilan akaok thun ini lac 6,5 triệu đồng, tagok 5,3% dut saong tukvak ini di thun blaoh; di labik dalam ban lac 8 triệu đồng sa bilan. Labik bhum palei lac 5,6 triệu đồng sa bilan. Gah chất lượng saong bruk rami ramik urang ngak di dalam taneh ia oh ka pabak hu bruk di darak pasa urang ngak; ilamo di urang ngak jeng daok biar dut saong dom taneh ia di dunya. Meda ndem lac, ilamo ngak bruk di dom urang ngak di Việt Nam daok biar, abih di nyu nan lac daok kurang kỹ năng mềm.

UB bhap bini tỉnh Hậu Giang caga buh jien tame Danak dak paglong, peih praong vaktu 2 Jalan 61C (jalan pambuak Cần Thơ - Hậu Giang). Tui kuhria, abih tih jien buh tame ngak vaktu  ka 2 labaih 3.888 tỉ đồng, sumu labaih 168 trieu USD. Hadei di tuk padang ngak salah,  Jalan roya nan lac jalan praong pakat III bhum taneran, hu 4 jalan radaih praong saong 2 jalan radaih sit. Tui kuhria Hậu Giang brei mek veik labaih 63 ha taneh piah peih ngak Danak dak. Tukvak ka 1, Jalan roya 61 C hu ngak salah  saong ba tame pandar meng thun 2012 ngan haong 2 jalan  radaih tui tanut pakat III bhum taneran…

Sở Công Thương ban Cần Thơ pambuak haong VNPT Cần Thơ peih bruk tabiak mbaok ngak iek darak 4.0 – Biyar jien oh pandar jien mbaok di darak An Thới, quận Bình Thủy. Di darak 4.0 ini, urang pablei saong urang blei meda pablei salih meng jalan quét mã QR atau payua jien tapa laik phone biak samar drah, mbuan jang tapa ứng dụng VNPT Money di VNPT. Sở Công Thương ban Cần Thơ caong khin doanh nghiệp daok pambuak bruk nao gam saong peih bruk biyar jien oh pandar jien mbaok di 107 darak jang yau di dom siêu thị, pasak pablei salih di dalam ban.

Tỉnh Tiền Giang hu 3 mã số bhum pala saong 10 labik papaok durien hu adat brei ngak piah pablei tabiak negar langiu tui jalan pablei salih praong tame darak pasar Trung Quốc. Tui Chi cục Pala drak saong Khik caga phun pala tỉnh Tiền Giang, 3 mã số labik pala pabak dom bruk caong khin di Nghị định thư lac di xã Ngũ Hiệp, huyện Cai Lậy. Dom labik papaok pandap hu adat brei ngak piah pablei tapa darak negar Trung Quốc nan lac dom huyện Cai Lậy saong Cái Bè.

Anak bruk TPHCM abih 2 janih vaccine sởi saong bạch hầu, ho gà, uốn ván (DPT) dalam danak dak klauk jru peih praong oh mek jien ka uranaih, Sở Y tế ban hu harak  samar drah payua UBND TPHCM saong Mintri Y tế ka bruk pabak vaccine ini. Kuhria tal bilan 7/2022, tui jalan klauk jru peih praong di ban bahrau mek hu 76,6%, dalam tuk nan tui jalan ba tabiak njauk mek hu 95%. Taong abih 21 quận, huyện saong ban Thủ Đức jeng oh mek hu. Makna lac kayua ban raya daok kurang labik pabak vaccine sởi đơn saong DPT4, langiu di nan lac daok kayua bruk sarau kadhau manuac piah ngak bruk klauk jru. Gah y tế jeng brei thau lac, hadei di tuk jit ruak COVID-19 dui atah, rilo amaik ame ka oh sanka tal bruk klauk jru di uranaih.

Mentri Ngoại giao Hàn Quốc hu panuac lac meyah Triều Tiên pandar hạt nhân ye taneh ia ini meda dang anak bruk cagar veik khang di bol lin Hàn-Mỹ. Mentri Quốc phòng Hàn Quốc meda pambuak bruk khang kajap saong Mỹ, patagok jang prein cagar veik praong di bol lin dua taneh ia; pakhang prein kateik greih ka bruk hạt nhân di Triều Tiên. Dahlau di nan, Triều Tiên hu brei tapa sarak  prein khang di hạt nhân, hu dom asar kadha  yau prein khang di hạt nhân,  jalan ngak, jalan pandar vũ khí hạt nhân.

Mintri Ngoại giao Nga brei thau, Ngoại trưởng Sergey Lavrov haong dom urang ngoại giao di Nga hu brei thị thực tal Mỹ piah hu mbaok di mbang Nyaom ka 77 di Đại hội đồng Liên hợp quốc. Dahlau di nan, Mintri Ngoại giao Nga brei thau lac Mỹ  dui atah bruk brei thị thực ka dom urang ngoại giao Nga hu mbaok tame Mbang nyaom ka 77 di Đại hội đồng Liên hợp quốc oh njauk yaom lac Nga hu buh ginup harak tui panuac ieu kakei.

Dom uranaih di Somali dang anak  bruk lavang lavaih bika trak tagok tal labaih 500 ribau uranaih, glong jang bruk eik lipa di thun 2011 ba tal labaih 100 ribau uranaih metai kayua lavang lavaih. LHQ brei thau lac, rilo labik di Somali meda eik lipa  dalam dom bilan anak tal kayua bhum Sừng châu Phi daik thu lagu dui atah. Dalam dom adit jaik di ini bruk daong ka Somali hu tagok min dom kapol daong mboh lac, dom uraniah metai meda  tagok khnag di puac thun ini meyah oh hu bruk ngak samar chip./.

Urang lang: Thu Thảo -Ái Nghiêm -14/9