Meng di akaok thun tal ni, kadung  jien jak ba di Metri Kaong An saong kadung jien Tani tanat raidiuk, tinh Tra Vinh hu daong padang ngak salah 3.200 baoh sang Gul pataom, saong kuhria abih tih tui jien labaih 180 ty dong. Tukvak anak tal, Uy ban MTTQ Viet Nam tinh Tra Vinh hu ngak bruk saong dom ngak pablaoh pambuak tal hu jao brei jaik 1.900 baoh sang daok veik ka mikva kathaot, bangsa Khmer, piah mikva hu sang daok di tuk Tet Nguyen dan thun Lanaih 2025, raok sa Tet biak uan tabuan.

Kuhria abih tih phun jien buh tame tagok tal 1.730 ty dong meng Danak dak jalan ngak negar patagok kinh te - xa hoi bhum mikva bangsa takik saong bhum ceik, tinh Lam Dong hu pataom tame dalam dom gah njauk sangka iek praong yau ha tang, pato megru, y te, ilamo piah paglaong raidiuk saong brei kein lagaih piah patagok ka mikva bangsa takik. Kadha njauk caik hatai sangka lac bruk ngak jalan mbak hu buh jien tame biak khang. Labaih 500 danak dak jalan mbak di dom bhum atah bayah hu padang bahrau, pasiam veik, daong brei kein lagaih ka bruk nao mai, patagok kinh te - xa hoi.

Urakni nan bilan takik urang mai rivang main yulit di huyen Con Dao, tinh Ba Ria - Vung Tau. Piah pachreih tuai damuai, dom labik pabei salih yulit hu ba tabiak yaom pah duk bilik daok trun meng 10 - 30% dut saong yaom dahlau ini. Hu dom labik ndih daok hu alin brei veik voucher dich vu ka tuai damuai. Mban khik iek Labik yulit Pakat negar Con Dao saong Bein Pakat negar Con Dao daok peh ralo tour nao takai tapa glai, ma-in iek he sinh thai glai tasik siam gheih, ngak hacih mblang tasik, dom koh palao sit saong dom jalan pasak koh palao praong, Bến Đầm, Cỏ Ống peih ngak “Daong sa Con Dao hijao”.

UB bhap bini Ban raya Ho Chi Minh bahrau alin Jai thuong Van hoc Nghe thuat Ban raya Ho Chi Minh 5 thun – mbang ka 3 ka 55 kadha gheih abih tukvak 2018 - 2022 dalam 9 gah hu: kien truc, my thuat, san khau, cuak thaot binguk, tamia, ragu ragam, van hoc nghe thuat dom bangsa takik, ndien anh saong akayat. Dom kadha mek hu jai la dom bruk rapaneh hu yaom glaong ka hatai sahaneng saong nghe thuat, ndom ka sajarah bangsa, bruk mesruh metiak cach mang saong bruk salih bahrau ka bruk padang saong Pasang iek Negar di rahra.

Pasak Ilamo – Nghe thuat tinh An Giang daok peih iek kadha  ngak iek “Bruk ngak lan am bangsa Khmer”, pak huyen Tri Ton. Kadha vak hu  khan di dom bruk ngak, ilamo ngak  meng tangin dalam bruk ngak thaok dom baoh garang, gaok lan, nding thak siam gheh; saong dom bingula hu ngak meng tangin urang ngak lan, pagam tui adat cambat bangsa Khmer. Tapa nan, rik tame khik ramik, padeng veik saong cak rok dom yaom glaong ilimo bangsa Khmer; makna lan am; padeng veik ilimo saong bruk ngak lan am dalam bhap bini.

Cuc khik caga lien bang Mỹ (Fed) pathau khan bruk brei cakak trun jien laba 0,25%. Ini lac mbang ka dua Fed brei cakak trun jien laba dalam thun ini. Dahlau di ni, bilan 9 jeng hu brei cakak trun jien laba 0,5%. Tui Fed, bruk salih sarak daong khik tani tanat prein khang di kinh te saong darak pasar bruk ngak saong patui veik jhul patagok bruk pasang iek lạm phát. Dom mbang tagok jien laba di Fed daong patakik lạm phát yaok thun di Mỹ meng tanut glaong abih lac 9,1% dalam bilan 6 thun 2022 trun daok 2,5% yau urak ini.  

Kadung jien Uranaih Lien hop quoc (UNICEF) brei thau hu labaih 420.000 anek naih daok di bhum taneh taphia kraong Amazon daok gaok rilo kanjah jhak kayua tatua riya pak Nam My. Tatua riya daok ngak tayah he sinh thai praong, ngak anek naih kurang kaya mbang, aia pandar, bruk iek glang prein yawa saong sang bac. UNICEF cati catang bruk kurang kaya mbang daok ngak anek naih lavang lavaih, dalam bruk ngak patrun prein duah aia hacih mbuan ngak patagok dom ruak kik njom mbak.

Urak ini anek ding jeng sa janih ngak metai menuac rilo abih di Brazil, ngak kan kandah tal prein yava rahra dalam negar saong ngak ka hatai caong ka jru cavao dak harei dak rilo. Dom anek athur ini, iku hu danuic ngak metai menuac, hu tagok samar drah meng bruk patagok do thi saong bruk pandiak tagok di langik. Dalam thun 2023, Brazil hu 152 urang menuac metai kayua anek dinh kaik. Dalam bruk ini, Brazil daok ngak bruk biak samar chip piah pabak jru ralai jru mek./.