Tinh Trà Vinh birau mek hu angan palei pala birau thun 2024. Ini lac tinh hu 32% lac bhap bini  bangsa takik, ralo lac urang bangsa Khmer. Hadei labaih 12 thun padang ngak palei pala birau, jien mek tame kuhria yaok urang di bhum palei tagok labaih 4 mbang dut saong thun 2010, baoh sang kathaot trun daok 0,87%. Thun ini, tinh Tra Vinh kham ngak brei hu takik abih 1 huyen saong 6 xa mek hu ngan palei pala birau paglong.

Huyen Tân Phú Đông, tỉnh Tiền Giang birau mek hu angan palei pala birau. Ini lac sa huyen kaoh pulao di tinh Tien Giang taduan hu angan ini. Urak ini, mbaok meta bhum palei huyen kaoh pulao Tân Phú Đông hu salih birau, yam tagok ngak brei cambaic laic, raidiuk mbang ngui, jalan sahaneng di bhap bini dak harei dak hu paglong. Taong abih  bhap bini rahra hu pandar ndien; 14 dalam taong abih 16 sang bac mek hu chuan pakat negar. Urak ini, sang taik tahak hu pasiam abih, daong rahra  hu labik daok tani tanat. Jien mek tame kuhria rah tapa  yaok urang tagok labaih 67 trieu dong sa thun.

Tỉnh Kiên Giang daok kham merat ngak salah danak dak ngak brei oh daok baoh sang taik tahak  dalam bilan 6 ini rik tame ngak brei paglong raidiuk ka dom baoh sang kan kandah ka sang daok. Piah danak dak ngak hu siam, tinh Kiên Giang brei jak ba abih gah manuac sia rik daong tame ngak brei oh daok baoh sang taik tahak ka bhap bini. Tui nan jhul pakhang bruk pathau khan pambak praong dalam bhap bini ka bruk pamong tal, makna di bruk jak ba nan piah paglong  jalan sahaneng, pachreih bruk hu mbaok tame di dom bhap bini rahra, gah kapol nyaom daong xa hoi, doanh nghiep saong jabat chuc nang.

Gilai kapal pajeng ba tui jalan kraong ribaong meng TP.HCM tal huyen Côn Đảo  ngak bruk meng harei 28/3 anak tal. Yau ye, gilai pajeng ba meng TPHCM nao Côn Đảo peih meng Tapen kraong Ban Gon ( Quan 4) meng mon 7 tuk saong mai veik peih meng Tapen ikan Bến Đầm atau Tapen kraong Gilai pajeng tuai Côn Đảo mon 11h30. Tui kuhria yaok harei hu sa mbang. Bruk pajeng ba nan kayua Kong ty TNHH pajeng ba tuai duai Thành Thành Phát ba tame ngak, pandar  gilai peih drah samar Phú Quý Express ngan haong prein pajeng 374 gaiy daok ka tuai.

UB bhap bini ban sit Vĩnh Châu, tỉnh Sóc Trăng birau peih ngak adat ngak yang Chrôi Rum Chếk (Le hoi Phước Biển) di urang bangsa Khmer pak ini. Adat ngak yang peih tabiak di bilan 2 saka ia bulan yaok thun ngan haong makna piah likau chrong daong ka urang nao tasik hu lagaih, mek hu rilo ikan hadang kaya ia tasik saong thau dhar phol po tasik ba mai rilo ikan hadang. Di var nan, Mentri Ilamo, The thao saong Yulit taduan hu angan drap ar ilamo phi vat the pakat negar ka adat ngak yang Chrôi Rum Chếk di urang bangsa Khmer ban sit Vĩnh Châu.

Mentri Ngoai giao An Do hu ba gilac mai veik negar dalam salamat labaih 500 urang njauk pachot pagat nao ngak bruk di Myanmar saong Thái Lan. Dom urang nan njauk kateik greik ngak dom bruk suan hukum di dom labik daok jaik tapen negar  dua taneh ia ini. Mentri Ngoai giao An Do hu iew bhap bini brei sahaneng tantu cambaic laic tuk taduan panuac ngak bruk pak negar langiu.

Jalan tasik Kenh ndao Panama daok ba tabiak jalan padang ngak brong ba menyek cuh ia tapa jalan ini piah pablei salih, piah parilo bruk ngak mbang. Peih pambak praong bruk ngak ini pamong tal dom tuai damuai di bhum chau A, dalam nan hu Nhật Bản iek yau taneh ia blei ralo abih. Bruk rah tabiak angaok nan dalam tuk My saong Panama  daok kandah gauk catang kayua Tong thong My khin mek veik jalan tasik praong di ini.  

Tong thu ky LHQ caong khin padeih taong mesruh 30 harei di Ukraine hu jeng biak saong peih tabiak jalan salamat sumu yau gauk. Dahlau di nan, My khan lac brei pambuak veik bruk bol lin saong klak rabha khaw tin haong Ukraine hadei tuk rajakar ngak praong di dua taneh njauk gauk brei padeih patuh phao dalam 30 harei tame Nga dalam mbang ginum biai di Saudi Arabia./