Page ini, di Hoi truong Mentri Quoc phòng, Ha Noi, Nyaom roya pakat negar Kapol urang dahlau daih ngak bol lin mbang ka VII, vaktu 2022 -2027 peih pakak dalam praong prang. Brei panuac tacei pato di Nyaom biai, Tổng Bí thư Nguyễn Phú Trọng tacei lac, Kapol urang dahlau daih ngak bol lin dom pakat kham khik caga dom bruk ngak hu jak jeng di cách mạng, rik daong ngak brei tayah dom bruk kanjiak jhak, bruk “ diễn biến hòa hình”, “langiu gah chính trị ngak sraw bol lin” di dom kol kanjiak jhak; lac gah chính trị siam mekre, nao dahlau dalam bruk padang ngak  saong khik caga Đảng, khik caga Karja, Bhap bini saong che do  XHCN. Pakhang bruk pato pakai chính trị, tư tưởng, daong ka urang jakar, urang dalam kapul thau tantu jalan tacei ba di Đảng, sarak, hukum di Karja, khang hatai gah chính trị, kham ngak njauk tui bruk ba tabiak, jalan sahaneng Chủ nghĩa Mác – Lenin, jalan sahaneng Ho Chi Minh, brei ngak dahlau dalam bruk bac megru saong ngak tui jalan diukrai siam mekre di Ho Chí Minh…

Tui Mintri LĐTB&XH, yaom jien thưởng Tet Nguyen ndan 2023 tagok 11% duk saong thun dahlau, kuhria rah tapa hu 6 triệu 860 rabau đồng sa urang. Dalam nan, yaom thưởng glaong abih lac labaih 1 tỷ đồng di Đà Nẵng. Hu dom labik hu yaom jien thưởng glaong lac dom doanh nghiệp hu phun jien di negar langiu buh tame ngak mbang yau ye: Hà Nội lac 400 triệu đồng; Bà Rịa - Vũng Tàu jaik 536 triệu đồng;  TP Hồ Chí Minh jaik 760 triệu đồng... Langiu di nan, rilo doanh nghiệp daok hu alin brei yot pandap, brei jien radaih nao palei mbang tet, rami ramik tukvak padeih tết lagaih piah ka urang ngak sanang hatai mbang tet.

Piah pabak bruk hu siam jang  pasang iek radaih cơ gioi dalam tuk jaik Tet saong dalam tuk dom Pasak Pasang iek njauk padeih ngak bruk, Sở Jalan mbak pajeng ba Ban raya HCM iew dom labik đăng kiểm radaih cơ giới  brei ngak bruk tani tanat piah langyah bruk pasang iek radaih tagok rilo di bhap bini. Dalam tuk Tet D.lich  jaik tal, dom Pasak pasang iek radaih brei padeih 1 harei  adit 1/1. Kuhria mbiah tal ini, ban raya tok daok 10 dalam 17 pasak pasang iek ngak bruk, prein khang pasang iek ralo abih lac 1.830 mbang radaih sa harei.

Piah khik kajap salamat bruk nao mai dalam tuk Tết thun sak tapai, meng harei 11/1 tal harei 31/1, Cty TNHH BOT tatua Rạch Miễu oh brei taong abih dom radaih pajeng trak mangaok 16 tấn saong radaih katung dui rơ-moóc tapa tatua Rạch Miễu dalam dom mon tabung glaong, hu rilo radaih nao mai. Abih di nyu lac tuk gar jalan dui atah di labik tatua Rạch Miễu, tuk hu panuac ieu di gah cảnh sát giao thông, bilai thu phí tatua Rạch Miễu meda brei peih bilai ka radaih nao mai oh mek jien phí.    

Melam 29/12, di Inem krung Ilamu dunya Mỹ Sơn, UB bhap bini huyen  Duy Xuyên, tỉnh Quảng Nam peih ngak Danak dak daoh tamia  “Huyền thoại Apsara”. Di Quảng Nam, labik bimon kalan Mỹ Sơn - Inem krung Ilamu dunya, hu pagap dreih yau asar intan dalam bhum taneh Quảng lac labik khik piah ilamu nghe thuat Champa. Meng dom yaom ilamu siam gheih di dunya, tapa khik ramik saong patagok, Drap ar saong dom anek manuac taneh Viet daok ba takai yam tame thun bilan mbeik drei tame dunya saong patagok.

Karja Mỹ daok kuhria peih praong bruk pateok dom urang tame Mỹ suan hukum meng dom negar Haiti, Nicaragua saong Cuba njauk cap mek rah tui jalan tapen negar gah meraong taneh ia ini. Bruk salih bahrau sarak ngan saong menuac tame negar suan hukum meda hu peih ngak dalam adit ini. Min sarak bahrau meda brei adat ka dom menuac tame negar suan hukum daok kham merat mai tal Mỹ meng jalan kapal haok kayua bruk pahla hu brei tame taneh ia ini.

Dua trieu urang di Niger urak ini dang anak bruk kurang pandap mbang trak, dom urang nan meda tagok tal jaik 3 trieu urang dalm bilan tam drak di thun 2023. Ndem tal bruk kurang dinh duong, tapa pasang iek dinh duong negar peih ngak di bilan 10 thun 2022 birau ini brei mboh bruk dinh duong jeng daok njauk haduh hatai. Jaik  300.000 uranaih umo ala 5 thun lavang lavaih trak hu ba tame taong ruak, dalam nan hu 12% urang hu bien chung.

Gah kuhria mboh dahlau bruk langik tasik negar Anh brei thau, thun 2022 lac thun pandiak abih di negar Anh hadei di sa bilan hu langik pandiak glaong di abih tal mangaok 40 độ C di taneh ia ini. Langiu di tabung glaong bilan pandiak, abih 4 mùa di Anh dalam thun ini jeng daok dalam top 10 mùa pandiak abih kuhria meng di tuk yaok pataom veik di thun 1884./.