Page ini, di Ninh Thuận, Tong Bi thu Tô Lâm hu ngak bruk haong BCH Đảng bộ tỉnh ka bruk peih ngak Sarak Nyaom roya 13 di Đảng saong sarak Nyaom roya Đảng bộ tỉnh mbang 14 vaktu 2020-2025; bruk tacei ba ngak, peih ngak sarak Chỉ thị  di Mentri Chinh tri saong dom sarak di Trung uong saong bruk peih ngak Danak dak dien hat nhan Ninh Thuan tukvak tapa. Di var ngak bruk, hadei tuk tacei tabiak cambaic laic dom bruk kan kandah daok tavak tavaiy di tinh, Tong Bi thu mboh lac, Ninh Thuan  hu biak ralo lagaih piah patagok. Dahlau di abih, lac bruk ngak yulit, lagaih ngak mbang patagok gah tasik, tapen tasik saong pasak jitvu logistics dalam nan njauk ndem tal bruk cakrok patagok  ndien ngak meng ia harei, ndien angin; yau nan ye, njuak brei sahaneng karei tui jalan birau, di dunya, ndung bak yawa  di jaman pok drei patagok  piah ngak pamedeih tagok dom siam lagaih di daok kandauk di bhum taneh saong manuac sia Ninh Thuan.

Kuhria meng akaok thun tal ini, tinh Ba Ria – Vung Tau hu 353 doanh nghiệp oh daok ngak, 1.470 doanh nghiệp tut angan padeih bruk ngak mbang ngak kan kandah tal bruk ngak, jien mek tame di urang ngak. Kayua nan gam haong dom bruk sangka daong urang ngak, dom pakat cong doan patagok bruk pasang iek po pandar urang ngak dalam bruk bayar jien bilan, jien thưởng dalam harei Tet. Abih di nyu nan lac sangka tal dom doanh nghiep daok tavak jien bilan, tavak jien BHXH saong oh alin jien Tet ka urang ngak.

Tiền Giang lac tỉnh ba akaok di bhum ĐBSCL ka taphon manuk ada. Birau ini, yaom manuk ada saong baoh manuk trun gam ba tal doanh nghiep, urang raong manuk ada  khat lahik trak. Bruk nan kayua “ bruk ngak tabiak ralo jang bruk caong khin blei tame”, abih di nyu nan lac baoh manuk biak ralo, takik urang blei. Yau nan ye, caong khin gah chuc nang hu jalan lang talaih yaom kaom manuk ada saong dom pandap manuk ada piah “ daong” taphon manuk ada di bhum palei ini.

Thun ini,  tinh Tra Vinh raok labaih 3,8 triệu mbang tuai damuai, glaong abih meng dahlau mai; jien mek tame labaih 2.500 ty dong. Piah mek hu jak jeng nan, langiu bruk patagok dom pandap yulit siam gheih karei dalam tinh, gah yulit daok padang rilo jalan yulit, pambuak dom labik danei angan. Abih di nyu lac dalam 3 thun tapa, Tra Vinh daok daong patagok saong bih tabiak phun jien daong ka 31 harak gar, hu abih tih jien jaik 3,2 ty dong. Gam haong nan patagok bruk yaih khan thaik thaot tapa dom danak dak parang iek, mbang nyaom biai di rilo bhum palei piah pambuak yulit.

Di mbang nyaom ka 19 di UB Pambuak Rajaei Công ước 2003 ka bruk khik drap ar ilamo oh mboh di meta di UNESCO peih tabiak di Paraguay, drap ar  Adat ngak yang kakuh Amaik negar ceik Sam di Viet Nam hu UNESCO hu tut angan tame Sarak Drap ar ilamo oh mboh di meta lambaok ka manuac sia dunya. Adat ngak yang kakuh Amaik negar ceik Sam peih ngak  meng harei 22 - 27 bilan 4 tui saka ia bulan  di labik Kalan kakuh  Amaik negar ceik Sam di phường Núi Sam, ban Châu Đốc, tỉnh An Giang. Di labik ini hu peih ngak rilo bruk piah pahadar harei padaok rup patau Amaik  meng tabung ceik Sam trun.

Mentri Quoc phong Han Quoc hu likau ma-ah di rahra ka bruk thiet quan luat hu ba tabiak dalam melam 03/12 meng blaoh. Urang brei puac ka Mentri Quoc phong Han Quoc brei thau, bol lin likau  ma-ah kayua ngak ka rahra duh hatai ka bruk thiet quan luat samar drah. Bol lin tuk halei jeng khik tani tanat bruk pacang caga khang kajap, brei pataom tame bruk praong di drei lac khik caga negar saong bruk diukrai di rahra.

Nhat Ban mboh bilan thu takik pandiak abih kuhria meng 126 thun dahlau di ini, tuk pandiak glaong jang 1,97độ C dut saong bhian harei. Langik pandiak ngak suai truh hala kayau bilan thu di Nhat Ban, tuk ralo tuai damuai jak gauk mai labik ini piah mong iek hala salih sambo mau bhong saong kanjik katam hadah  hadei. Thun ini, Nhat Ban jeng hu mboh bilan he pandiak abih kuhria mboh meng lavik mai di tabung ceik Phú Sĩ oh hu tuyet laik dalam tukvak lavik harei.

Dom mbang rabuk khang oh bhian mboh dalam thun ini ngak khat lahik rilo ka dunya, glong jang 10 thun tapa. Bruk khan brei thau meng kongti tái bảo hiểm Munich Re di Đức ba tabiak, kuhria abih tih khat lahik kayua dom rabuk di Đại Tây Dương saong Thái Bình Dương ngak tabiak dalam thun ini tagok tal 133 ty USD.