Tuai nao  rivang  hu tacei pato biak cambaih laih

Tổng cục Du lịch peih bruk mek panuac tangi sua ka bruk taduan tuai dunya dalam tuk siam mekre bahrau. Tui nan, meng ni tal harei 14/3, Việt Nam taduan tuai dunya ngak iek tuk vak ka   2, hadei di nan, hu peih pabah mbang abih ka bruk du lịch. Meng harei  15/3, tui panuac ba tabiak, tuai oh cang nao rivang tui  tour tra, bo brei pabak dom tanut  y tế yau klauk jru, dut iek. Langiu di nan, tuai brei  pandar  ứng dụng pacang caga  COVID-19 tui hukum  song blei  bảo hiểm hu bayar jien iek ruak  COVID-19 ngan song tanut takik di abih lac 10.000 USD.

Tui adat bahrau di Mintri Y tế, F1 mayah klauk ginup mbang vaccine COVID-19 tok brei daok karei di sang 5 harei. Dalam tuk brei daok karei, bhap bini eng drei pasang iek prein yava, tuk mboh dalam rup pandiak, pandik tarekaong, patuk, kan suak yava, pandik rup, sru laar... njauk pathau khan chip ka jabat y tế. Pato tacei bahrau di mintri Y tế jeng hu brei adat ka dom urang lac F1 ka oh klauk ginup vacxin atau ka oh klauk vaccine ye brei daok karei 7 harei. Di harei brei daok karei ka 7 njauk dut iek, mayah âm tính ye patui iek prein yava dalam 3 harei, ngak catang tui 5 paka di Mintri y te saong pathau khan haong jabat y tế mayah mboh dalam rup njauk hagait.

Di dom sang bac di ban raya  HCM, hadei di 2 adit nao bac tapak hadei di Tết nguyên đán, dom urang njom Covid-19 tagok jang adit dahlau . Ong Trịnh Duy Trọng, Akaok Jabat  Chính trị tư tưởng, Sở pato megru  ban raya .HCM brei thau, meyah dalam tal bac hu F0, ye dahlau daih taong abih anek saih jeng lac F1, min urak ni hu parabha veik. Ngan song anek saih hu klauk ginup  vaccine brei padeih piah tui iek pren yava 5 harei di sang, hadei di nan meyah dut iek mboh  âm tính ye nao bac gilac veik. Ngan song anek saih oh ka klauk ginup vaccine brei padeih di sang  7 harei. Meng harei ni,  Sở pato megru song à Sở Y tế hu ginum biai yaok harei piah hu tacei pato chip dom jalan pacang caga jit dalam dom labik pato pakai.

Dalam mbang rami ramik yaom di bier harei kabroi (21/2) 2 Mintri Công Thương-Tài chính brei tagok yaom xăng RON 95, tagok 26.280 đồng sa lít; Manyek diesel 0.05S lac 20.801 đồng/lít. Yaom xăng manyek tagok samar ngak kan kandah biak praong tal doanh nghiệp saong dom bruk pajeng ba. Ong Phạm Văn Xô, Akaok Hiệp hội Xuất khẩu tỉnh Bình Dương brei thau, tukvak tapa, doanh nghiệp njauk kan kandah trak damak kayua jit ruak COVID-19 ka oh pasiam veik hu ye urak ini xăng tagok yaom, ngak kan kandah trak ka gah pajeng ba dalam hệ thống logistics. 

Di nyaom biai ka bruk  pala song pablei  thanh long rah tabiak harei kabroi (21/2), ong Lê Tuấn Phong, Akaok  UBND tỉnh Bình Thuận hu panuac ieu dom mintri  , dom gah di Trung ương brei dong ka Bình Thuận dalam bruk pablei tabiak negar langiu  boh thanh long tapa dom drak pasa meng jalan chính ngạch, abih di nyu nan lac drak pasa Trung Quốc; dong ieu daa dom kapul nyaom prong  buh jien tame ngak mbang, ngak tabiak pandap meng  boh thanh long that piah ngak labik akaok ba jalan song patagok drak pasa pablei salih kaya nong di bhum… 

Dah page harei 22/2 tui maong di Hà Nội, Nga tabiak panuac công nhận độc lập, saong mbaoh tangin tame dom hiệp ước hữu nghị, pambuak gauk saong daong ba gauk di 2 taneh ia cộng hòa tự xưng Donest và Luhansk ở gah timur Ukraine. Anak bruk ngak di Nga, Nhà Trắng brei thau lac Tổng thống Mỹ Joe Biden meda mbaoh tangin tame sa sắc lệnh hành pháp “pakau urang Mỹ peih bruk buh jien tame ngak, pablei salih saong jien padai bahrau nao mai meng 2 gah bhum taneh ini.” Dom taneh ia yau ye Đức, Anh, Gruzia, Romania, Áo, Moldova jeng samar drah cagar viek bruk ngak di Nga. Tổng thư ký Liên hợp quốc hu panuac ieu langyah dalam sron mbon bruk meriak gauk di gah timur Ukraine njauk haong dom sanya Minsk hu Sarak 2202 di Hội đồng Bảo an Liên hợp quốc pachrieh tui.

Kayua huac bruk njom mbak di biến thể Omicron, Thủ tướng gam lac akaok mintri  Quốc phòng Thái Lan hu tabiak adat ka dom gah tapol nyaom bol pan phao kraong sa mbang tra caga peih veik sang iek ruak  dã chiến. Adat di  Thủ tướng Thái Lan hu batabiak tuk dom urang ruak  COVID-19 yaok harei di taneh ia ni tagok di tanut labaih  18.000 urang dalam 3 harei gam. Mintri Nội vụ Thái Lan jeng tabiak adat ka tong abih  dom tỉnh trưởng pakhang dom jalan ngakhadei di bruk njom mbak tagok rilo.

Jaik 60 urang metai dalam mbang patuh rahtabiak di sa labik kruac ameh thủ công di labik Gbomblora, dalam tỉnh Poni, Burkina Faso. Urak ini ka oh thau cambaih ka bala ini, min dom urang hu mbaok di pak nan brei thau mbang patuh meda mai meng sa labik khuah dalam labik kho khik piah jru patuh hu dom urang kruac mek ameh pandar dalam tuk ngak bruk. Dom urang ngak praong di pak ini hu peih mbang pasang iek piah duah thau makna ba tal patuh ini./.

Urang lang: Hanipha- Thu Thảo -22/2