Ph co Hoi An labik pachreih hu rilo urang mai rivang 

Tui khaw tin meng mbang ginum biai tacei pato jalan pablei pandap ngak meng kayau tabiak negar langiu saong pandap ngak brei mekre sang danaok tapa darak pasar Canada, kayua Cục Pachreih pablei salih, Mentri Công Thương saong Thương vụ Việt Nam di Canada pambuak gauk peih ngak harei 7/6, bruk pablei pandap ngak meng kayau saong pandap ngak mekre sang danaok tabiak negar langiu di Viet Nam tapa darak pasar Canada mboh lac biak lagaih. Di var nan, dom urang ilamu ndom lac, thun ini, langiu bruk pablei hu siam di darak pasar  Canada, pandap kayau saong pandap ngak mekre sang danaok di Viet Nam daok hu jalan lagaih piah jhul khang tapa dom darak pasar karei di bhum Bắc Mỹ.

Tổng cục Du lịch Việt Nam brei thau, du lịch Việt Nam hu ba tabiak pilih ruah piah ba tame pakacah di 10 hạng mục di giải thưởng Du lịch World Travel Awards 2022 - giải thưởng hu angan je di abih dalam gah du lịch. World Travel Awards (ieu katut lac WTA) lac  giải thưởng hu peih ngak yaok thun  meng di thun 1993, urak ni hu jeng angan je dang akaok dunya ka bruk pok angan dom jak jeng di gah  du lịch dalam yaok gah.

Cong an ban Thủ Dầu Một, tỉnh Bình Dương birau tabiak mbaok  Kapol Cơ động langyah bruk gar jalan, bala angaok jalan di ban Thủ Dầu Một. Kapol hu 17 urang, kayua gah cong an ban khik iek, tacei ba ngak bruk. Ini lac dom urang halan hatian tut angan tame ngak saong hu palih ruah biak tani tanat. Dom urang nan hu mbaok khik brei salamat dom jalan mbak dalam Ban Thủ Dầu Một. Tukvak tapa, bruk nao mai angaok jalan mbak di ban Thủ Dầu Một  rah tabiak sraw kadau, bala angaok jalan mbak rilo, rah tabiak dom bala trak angak jalan mbak, ngak khat lahik drap ar praong saong metai manuac.

Melam blaoh 7/6, parang iek “Danh nhân Ilamu  Nguyễn Đình Chiểu – Rai duik song bruk ngak” hu peih tabiak di muinyim  ban raya HCM. Ni lac bruk ngak dok dalam danak dak  “Jalan nao tui takai yam ong Đồ Chiểu” kayua UBND TP.HCM pambuak song  UBND tỉnh Bến Tre dang tabiak peih ngak tuk pahadar  200 thun harei menek ong  Nguyễn Đình Chiểu – urang gru pato – urang cuak ariya – gru hu gah pato pakai  , Khoa học song ilamu  Liên Hợp Quốc (UNESCO) pok angan lac Danh nhân Ilamu  di mbang nyaom Đại hội đồng  mbang ka  41 dalam bilan  11/2021.  Parang iek  hu peih  tabiak meng ni tal harei  17/6 ngan song  95 blah thaot song harak gar, tư liệu. Dalam nan, hu dom thaot binguk ka palei negar, boh sang, rai duik di Danh nhân Nguyễn Đình Chiểu gam song dom tác phẩm praong di ong.

Tỉnh Lâm Đồng urak ini hu labaih 10.000 ha taneh pala phun durien  saong ini lac sa dalam dom janih pandap kaya nong yaom glong di tỉnh. Darak pasar saong bruk pablei baoh durien tabiak negar langiu urak ini biak tani tanat, min yaom baoh kayau ini dak harei dak glong saong tani tanat tuk labik pala hu tut angan mã số định danh, cambaic laic jalan pala, iek glang, paiak baoh, sơ chế saong papaok. Abih di nyu nan lac, ngan haong bruk brei mã số labik pala, D.N meda pablei tabiak negar langiu tui jalan praong saong ba mai kien laba ka urang pala saong D.N.

Harei ni (8/6) dom urang ngoại giao pakat glong di Hàn Quốc, Mỹ song Japon hu taom gauk ginum biai piah pambuak gauk ka dom bruk dalam bhum song dunya, dalam tuk dok suh sah ka bruk  Triều Tiên cuh iek hạt nhân. Mbang ginum biai rah tabiak  2 adit hadei di mbang tapa ravang piah jhul patagok talei pambuak bruk di  Tổng thống Joe Biden tal Seoul song  Tokyo song lac mbang taom gaok 3 gah mbang ka 2, hadei di mbang taom gaok camereip  di  Washington di bilan 11/2021.

Rajaei Philippines harei kabroi brei klaak dom pacang pakauk ngan haong dom bruk dalam sang saong langiu langik di dom bhum hu brei thau pakat 1. Tui nan, taong abih dom labik dalam bhum hu tanut pakat 1 ngak bruk abih prein khang, min dom urang hu mbaok njauk brei hu harak lac hu klauk bloh jru pacang Covid-19, abih di nyu lac dom labik dalam sang atau dom labik pataom ralo manuac. Yaom lac, urang njom Covid -19 biar min rajaei Philippines brei thau njauk taong yaom tani tanat bruk brei klaak dom pacang pakauk dalam negar, iew bhap bini brei ngak tui njauk dom tanut chuẩn y tế piah khik caga rup drei klak njom mbak Covid-19.

Anak dom panuac ndom cagar gauk, Indonesia brei padeih bruk tagok yaom harak vé tame rivang sirah bimon Borobudur – inem krung  Phật giáo prong abih di dunya  di gah kreih pulao Java. Dahlau di nan, karja  Indonesia kuhria tagok yaom vé tame pabah mbang rivang iek bimaong  Borobudur piah patrun patakik tuai damuai. Tui nan, harak vé brei ka tuai negar langiu  khin tagok tal  labik bảo tháp tagok yaom tal 100 USD / sa urang (lac labaih  2.300.000 VND) song  vé brei ka tuai dalam taneh ia  lac labaih 1.200.000 VND. Dok atah di cố đô Yogyakarta di Indonesia labaih  41 km nao gah Tây Bắc, bimon Borobudur hu padang ngak meng thun  778 hadei Công nguyên song hu ngak salah 50 thun hadei di nan. Hu thau, bimaong Borobudur hu  UNESCO pok brei angan lac  inem krung dunya di thun 1991. Dahlau di jit  Covid-19, tui kuhria yaok harei  hu labaih 10.000 tuai mai rivang bimaong Borobudur./.

Urang lang: Ái Nghiêm- Hanipha- 8/6