Harei ini (2/10), di Jabat Trung ương Đảng, mala bruk pan akaok di Tổng Bí thư Nguyễn Phú Trọng, Nyaom biai mbang ka 8 Mban chấp hành Trung ương Đảng mbang 13 hu peih tabiak dalam praong prang. Brei panuac peih mbang nyaom, Tổng Bí thư Nguyễn Phú Trọng ndem cambaih lac, Nyaom biai Trung ương mbang ini pasang iek, brei ngak rilo bruk ngak hu makna, oh mbuan, hu yaom praong ngan haong bruk ngak salah bruk ngak chính trị di Ban Chấp hành Trung ương mbang XIII meng urak ini tal puac tukvak. Caong Trung ương saong dom urang hu mbaok tame nyaom biai patagok ilamo, paglaong bruk ngak, pataom tame roh duah, ginum biai biak cambaih, brei ngak di puac mbang ginum biai. Tui kuhria, nyaom biai ngak bruk tal harei 8/10.

Page mesup harei 2/10, di mblang bein Hòa Bình (quận Gò Vấp), UBND TPHCM hu peih mbaok Adit pachreih tui bruk bac da-a luac rai thun 2023. Phaok akaok UBND TPHCM Dương Anh Đức brei thau, tapa ini, biak rilo bruk ngak gah bac ta-a, pasram megru hu jhul khang; hatai caong eng drei bac, eng drei pasram megru di rahra ban raya dak harei dak glaong tagok, dom kreih camin hadah krah dak harei dak rilo saong hu pambak praong. Thun ini, adit pachreih tui bac da-a luac rai pataom tame jhul khang bruk pandar công nghệ số piah paglaong prein ngak, hatai sahneng, thau hu ilamu bahrau, tapa nan paglaong ilamu di TPHCM, rik daong dak padang jak jeng ban raya siam mekre, bak hatai anit ranam, ban raya thông minh.

Dom harei tapa, di mangaok mạng xã hội hu ba tagok thaot binguk harak mayaom di Akaok UBND huyện Gò Công Tây, tỉnh Tiền Giang gam haong paok jien 1 triệu đồng ka 1 urang kumei manek ginup 2 anek dahlau di umo 35 thun tui Sarak 26 /2021 di HĐND tỉnh Tiền Giang. Ong Nguyễn Thanh Tuấn – Phó Akaok UBND huyện Gò Công Tây brei thau, meng di tuk peih ngak Sarak 26, thun 2022, huyện pok mayaom 273 urang manek ginup 2 anek dahlau di umo 35 thun saong dalam 6 bilan akaok thun ini, huyện jeng hu pok mayaom 163 urang. Adat ka bruk pok mayaom, tanut daong daok dalam Sarak di HĐND tỉnh piah dui pachreih dalam bruk tani tanat rahra.

Di Bến Tre, rilo sang khang hatai cakrok rilo bruk raong chồn hương, rik daong patagok bruk ngak mbang ka yaok baoh sang. Tui Chi cục Kiểm lâm tỉnh, urak ini dalam tỉnh hu 246 sang raong athur glai ngan haong labaih 6.700 drei. Bruk khik ramik raong glang, pablei salih athur glai hu ngak tui adat hukum, hu harak gar khik iek, thau hu asal di nyu, tui iek bruk trun, tagok, pajeng ba dalam tuk pablei salih, pabak brei mã số labik raong.

Harei ini, ia ndik di Cần Thơ yam tapa tanut báo động 3, tanut ia tagok 2,13m ngak brei dauk di rilo jalan dalam ban, ngak ka rahra nao mai biak kan kandah. Dahlau di nan, piah pacang caga, trun manieng dom khut khat kayua ia ndik, Mban Chỉ huy Phòng thủ dân sự - pacang caga bala langik tasik saong daong duah urang njauk bala di ban Cần Thơ hu ieu kakei ngan haong dom labik ia dauk dalam, oh salamat ka rahra saong jalan radaih nduac, brei pacang veik jalan, anak meta oh brei nao mai saong meda peih bruk, rami ramik, parabha jalan nao mai  hu siam lagaih.

Indonesia ba tame pandar jalan pasei cao tốc akaok meti di Đông Nam Á. Jalan nan hu nduac samar tal 350 km sa tuk, daong patrun biak rilo tukvak nao mai di ban ine Jakarta saong ban Bandung di tỉnh Tây Java. Dom radaih nduac jalan ini hu pabak pagam hệ thống salamat meda pacng hu haong bruk megei baoh taneh, ia dauk ia sua saong dom bruk samar drah karei karei. Jalan pasei cao tốc ini yaom 7,3 tỷ USD, lac sa binah di jalan sahneng bahrau ka bruk Vành đai saong baoh jalan, hu daong brei meng dom Cty di Karja Trung Quốc.  

Ndom ka makna di bruk apui khuah biak trak ngak ka labaih 100 urang metai di Iraq di puac bilan 9 meng blaoh, urang jakar hu klak tapa makna eng drei khin ngak apui mbang khuah hadei di tuk pasang iek bruk apui khuah. Tui Ủy ban pasang iek, pasak di labik peih ndam lakhah biak rilo manuac, dalam tuk nan tabung sang saong pandap ngak gheih hu ngak meng dom pandap  mbuan khuah. Taphia di nan, labik peih mbang lakhah oh hu jalan nduac tabiak tuk gaok bala, oh hu dom pandap panda khik kajap salamat, ba tal bruk apui khuah khang ngak ka rilo menuac metai.

Labaih 100 drei ikan “cá heo” metai angaok kraong Amazon (Brazil) dalam tuk bhum taneh nan daok dang anak sa mbang pandiak bhang toa riya biak khang saong nhiệt độ ia tagok biak glaong, hu labik yam tapa tanut 39 độ C. Tui Viện Mamiraua – sa labik roh duah hu Mintri Khoa học Brazil daong prein, brei thau lac, dom ikan nan nyu metai rilo yau nan, lac bruk oh ka bhian mboh saong ndom lac nhiệt độ danao ia biak glaong gam haong mbang pandiak bhang tua riya khang abih kuhria meng dahlau mai di Amazon, meda lac makna di bruk ikan metai. Bruk ini yau ye panuac brei thau dahlau, ngak brei patagok bruk duh hatai di dom urang ilamu gah khí hậu anak bruk ngak di anek menuac saong bruk pandiak bhang tua riya khang daok rah tabiak dalam bhum./.