Dalam mbang rivang pakat Karja tal Viet Nam, Tổng thống Joe Biden hu mbaok dalam rilo bruk ngak, dalam nan hu bruk taduan raok saong ginum meyai haong TBT Nguyễn Phú Trọng, taom gaok akaok negar Võ Văn Thưởng, taom mbaok Thủ tướng Phạm Minh Chính saong  Akok  Quốc hội Vương Đình Huệ. Di var ginum biai di TBT Nguyễn Phú Trọng hadei di tuk taduan raok, Viet Nam saong Mỹ brei paglong talei pambuak bruk di 2 taneh ia tagok jeng pambuak gauk praong abih gah kayua hòa bình, pambuak bruk, patagok khang kajap.

Sở Kế hoạch saong đầu tư TPHCM daok padang ngak sarak daong cak rok patagok kinh te kapul nyaom, hợp tác xã di dalam ban tukvak 2023-2026 ngan haong phun jien jaik 520 tỷ đồng. paok jien ini piah daong jien bilan ka urang ngak bac tamat bac cao đẳng, đại học, hadei đại học mai ngak bruk di HTX, liên hiệp HTX. Adat ini njauk pandar haong HTX, liên hiệp HTX pilih ruah urang jakar ilamo bahrau. Dalam nan, brei pilih ruah dahlau urang jakar kỹ thuật, urang jakar kế toán piah daong khik ramik, pandar ilamo, kỹ thuật tame bruk ngak, pablei salih lagaih haong hatai caong saong dom gah ngak praong di gah kinh te kapul nyaom. 

Tapa danak dak pato bruk ngak ka urang bangsa Khmer saong Danak dak daong pato bruk ngak thun 2023, di Danak dak  pakat negar padang ngak palei pala birau, vaktu 2021-2025, huyen Cầu Kè, tỉnh Trà Vinh peih hu 19 dalam 20 tal bac bruk ngak palei pala, ngan haong 561 urang tame bac. Tapa dom tal bac bruk ngak katut panak daong ka urang bac hu thau dom ilamu ky thuat dalam  yaok bruk tui bac piah duh ka bruk ngak mbang patagok raidiuk baoh sang; thau ilamu ky thuat saong ba tame pandar dalam raidiuk.

Hadei di sa tukvak suai lavik laik yaom biak khang, urak ini baoh li-u thu di dom tỉnh Tiền Giang saong Bến Tre tagok yaom di tanut glaong. Di tỉnh Bến Tre, urak ini li-u thu hu pablei yaom meng 70-80 ribau đồng sa pluh (12 baoh), tagok labaih 50.000 đồng sa pluh dut saong akaok thun ini. Tui yaom ini, po bein pala li-u hu laba labaih 30 ribau đồng sa pluh. Dalam tỉnh Tiền Giang hu labaih 21.000 ha li-u; tỉnh Bến Tre hu labaih 78.300 ha li-u. Jaik di ini, mblang taneh pala li-u dak harei dak tagok kayua dom po bein kaoh klaak dom janih phun pala karei oh hu  laba atau oh daok lagaih salih tapa pala li-u.

UBND tỉnh Trà Vinh birau khan brei thau drah samar bruk glut jaleih takai kraong Cổ Chiên di bhum kaoh pulao Long Trị, xã Long Đức, TP Trà Vinh. Labik taneh glut jaleih  atah labaih 2km, rilo labik lih tame dalam mbaok taneh meng 20 tal 30m, ngak kan kandah tal raidiuk di labaih 100 baoh sang bhap bini , dom danak dak sang bac, darak jeng yau  jalan nao mai ngaok ar. UBND ban Trà Vinh brei padang biển báo, brei thau dom labik glut jaleih, tui nan brei manuac urang tui iek bruk glut jaleih; caga pandap panda, menuac urang, radaih, mac moc piah caga tuk glut jaleih meda pambak tal lahik drap ar, manuac urang  di bhum taneh ini.

Thủ tướng Thái Lan Srettha Thavisin bahrau pathau khan anak Quốc hội negar ini dom sarak piah pasiam kinh te taneh ia. Dalam harak pathau khan, Thủ tướng hu ndem tagok dom sarak brei ngak dahlau bo rajaei di ong meda hu peih ngak dalam 4 thun anak tal, ngan haong bruk praong di anak mata lac pasiam veik kinh tế. Dalam dom jalan ngak meda hu peih ngak samar drah piah ka  kinh tế hu pasiam veik saong cak rok patagok, Rajaei Thái Lan meda ba tabiak sa paok jien pachreih ba kinh te hu yaom 560 tỷ baht (lac labaih 15,7 tỷ USD) saong alin 10.000 baht (280 USD) ka yaok rahra. Bruk ini meda daong pabak veik jien tame hệ thống, jhul tagok bruk pandar cai, buh jien tame, peih praong bruk pablei salih saong ba bruk hit ngak mbang.

Rajaei Mỹ  brei tapa harak sanya salih urang guk haong Iran. Tui nan, Mỹ brei peih palao 5 urang Iran daok njauk guk saong Iran jeng brei palao 5 urang Mỹ njauk taneh ia ini chap mek dalam dom rilo thun tapa. Langiu di nan, Mỹ  jeng brei adat  ka dom gilang pariak dunya payua 6 tỷ đôla  njuak khik di Iran  meng Hàn Quốc tapa Qatar. Angan je di dom urang guk di dua taneh ia oh ka khan saong dom urang nan  meda hu peih palao di adit anak tal.

Urang dang akaok kanja gah Timun negar Liby brei thau lac hu 2.000 urang metai di ban Derna, atah di ban ine Tripoli 900km saong yaok ribau urang karei lahik kayua ribuk Daniel tuh tame negar ini di harei kabroi 11/9. Hajan ia sua ba theik abih labik bhap bini daok di Derna, ngak khat lahik biak trak damak. Di dom bhum palei ini, karja tabiak bruk giới nghiêm, saong brei kreik pambang dom sang bac hadom harei. Urang lambaok di Liên hợp quốc di Liby brei thau lac daok tui iek catang  bruk ribuk saong meda daong samar drah, jang yau daong ka dom bruk kham marat pacang caga di pakat negar saong bhum palei./.