Ini lac mbang cameriep sa urang Tổng thống Hoa Kỳ rivang taneh ia tui panuac daa di Tổng Bí thư Đảng Cộng sản Việt Nam saong mbang rivang rah tabiak njauk tukvak pahadar 10 thun dua taneh ia padang talei pambuak bruk abih gah. Di mbang taom gaok haong báo chí hadei di mbang ginum biai di bier harei sup kabroi 10/9, Tổng Bí thư Nguyễn Phú Trọng saong Tổng thống Hoa Kỳ Joe Biden jeng ndom lac, Việt Nam saong Hoa Kỳ jeng chreih chrai bruk dua taneh ia padang veik talei pambuak bruk di pakat glaong bahrau lac pambuak gauk abih gah kayua bruk saron mbon, pambuak gauk saong cak rok patagok khang kajap.

Tỉnh Sóc Trăng cakrok hu labaih 7.800 urang đảng lac urang bangsa Khmer, meblah labaih 16% urang đảng di tỉnh. Tui Tỉnh uỷ Sóc Trăng, yaok thun, dom pakat ủy ba tabiak tanut ba urang tame đảng, sangka cakrok urang  đảng lac urang bac ta-a glaong, urang ngak dalam dom gah kinh tế, urang jakar ilamu kỹ thuật, urang đoàn, kapul nyaom di labik daok, bhum hu rilo urang bangsa takik. Tui nan, meng thun 2020 tal ini, yaok thun, tỉnh cakrok labaih 1.600 urang đảng. Dalam tukvak anak tal, tỉnh Sóc Trăng daok peih ngak siam bruk cakrok urang đảng, paglaong chất lượng urang ba tame đảng piah caga urang jakar ngak bruk ka dom pakat di anak meta saong suai lavik.

Sở Lao động, Thương binh saong Xã hội (LĐTBXH) tỉnh Trà Vinh daok peih bruk pato bruk ngak ka urang ngak salah bruk nao lin, nao ngak công an. Dalam nan Sở hu peih tal pato bruk peih radaih ka 132 urang jeng lac dom urang salah bruk nao ngak lin, nao ngak bruk công an. Dom urang bac hu daong taong abih jien bac, daong jien mbang huak saong jien nao mai dalam luac 3 bilan bac. Langiu di nan, Sở LĐTBXH tỉnh Trà Vinh daok peih rilo mbang ginum biai langyah, yaih khan bruk ngak, paglaong bruk pambuak gauk di doanh nghiệp brei ngak dahlau di abih bruk pilih ruah, ba mbuan lagaih piah nao ngak bruk di negar langiu; masaiy phun jien piah eng drei padang mbang ngui, peih bruk ngak mbang di palei.

Salam uan harei Vu lan, baha Thanh Phát pambuak haong UBMTTQVN xã Tân Thành saong kapul ngak pahla Vũ Thụy mai meng TP. Hồ Chí Minh hu alin hadiah 200 pok pandap brei ka anek saih kan kathaot, takre bac ta-a, urang taha daok sa drei di dalam xã Tân Thành, ban Đồng Xoài, tỉnh Bình Phước. Yaok pok pandap yaom 300 rabau, dalam nan hu jien mbaok saong dom pandap mbang.. Ini lac bruk ngak ndung bak hatai anit ranam pamaong tal urang kan kathaot, menuac kan kandah saong hatai caong khin raidiuk di bhap bini tuk halei jeng hu siam mekre, trei sir, haniem phul. 

Viện kiểm sát bhap bini tỉnh Đồng Nai bahrau brei tapa harak khởi tố hình sự, ba tabiak langyah tui hukum, cap kreik 22 urang dalam tukvak 4 bilan piah pasang iek, ngak cambaih laih bruk pachot pagait meblah mek drap ar. Dom urang nan, lac Nguyễn Văn An, umo 27 thun, Tổng giám đốc Công ty Lộc Phúc, dom akaok mban, akaok jabat, kế toán, akaok, diễn viên ngak ja tuai mai blei taneh riya, sang danaok. Công an jeng hu cap khik samar drah ong Huỳnh Hữu Tường, umo 32 thun, daok di ban Thủ Đức. Tường lac urang dang akaok, tacei jalan yaok bruk ngak di công ty min pah An mai dang angan. Urak ini Công an tỉnh Đồng Nai daok patui veik peih praong bruk pasang iek, ngak cambaih laih dom bruk ngak suan di yaok urang.  

Brei panuac dalam mbang họp báo hadei di tuk tamat nyaom biai pakat glaong abih G20 di Ấn Độ, Thủ tướng Japon Fumio Kishida brei thau, ong daok kuhria salih bahrau rajaei di drei samar di abih lac di harei but, 13/9 tal. Hadei di tuk salih bahrau, dom urang pan akaok di Japon jeng hu ba tabiak dom jalan ngak kinh tế “khang kadang” piah pasiam veik kinh tế taneh ia saong khik caga raidiuk bhap bini anak bruk yaom kaom tagok glaong. Dalam dom sarak nan, Rajaei Japon meda pandar sa pok jien ka bruk tagok jien bilan saong peih praong đầu tư.  

Mbang magei baoh taneh khang 6,8 rahtabiak di harei 8/9 di Maroc ngak takik di nyu labaih 2.000 urang metai saong labaih 2.000 urang njauk rambuac, dalam nan hu rilo urang njauk trak. Tây Ban Nha khan lac meda payua dom kapul piah daong duah mai tal Maroc daong taneh ia ini hadei di mbang magei baoh taneh biak trak damak nan. Ngoại trưởng Tây Ban Nha Jose Manuel Albares jeng brei thau lac bruk daong Maroc brei mboh hatai jumpataom gauk di Tây Ban Nha jang yau bruk pambuak gauk di rahra dua taneh ia. Mintri Ngoại giao France jeng halain hatain daong ka Maroc mayah hu ieu daong.

Dom urang ilamu di Trung Quốc hu cakrok thận hu tal 50-60% tế bào menuac dalam phôi pabui. Ini lac bruk ngak iek camereip abih janih nội tạng ini angaok dunya, paglaong hatai caong ka bruk patagok parilo thận ka dom menuac pagam thận. Bruk nan hu khan brei thau di mangaok tạp chí Cell Stem Cell harei jip adit blaoh, dom urang roh duah brei thau lac hu pandar jamriak ramik gen piah patrun bruk cakrok di tế bào pabui, ngak brei tế bào menuac praong tagok gah dalam phôi pabui. Urak ini bruk kurang thận alin hadiah daok ngak kan kandah ka bruk pabak nội tạng khang kadang ka menuac pagam thận./.