So Pato megru TPHCM ba tabiak bruk oh mek jien bac ka taong abih pakat bac meng thun 2025 - 2026. Urak ini, anek saih Tieu hoc saong uranaih Mam non umo 5 thun bac oh abih jien tui bruk ba tabiak. Ban raya Ho Chi Minh daok peih ngak sarak daong jien bac ka anek saih THCS. Yau nan, tok daok uranaih Mam non umo 5 thun saong anek saih THPT brei kak jien bac tui bruk ba tabiak. Sarak oh mek jien bac nan lac pandap hu makna, njauk lagaih ka taong abih anek saih Ban raya, piah pahadar 50 thun Peih paha Gah merong negar, yasa taneh ia.

Urak ini hu labaih 1.770 gah pablei salih di Binh Duong hu ba tabiak bruk thuong Tet saka Ia Harei saong Tet Nguyen Dan 2025. Thun ini tanut thuong Tet Nguyen dan glaong abih hu kuhria lac 375 trieu dong, di sa gah pablei salih hu phun jien buh tame di negar langiu. Njauk caik hatai sangka, tanut thuong Tet saka Ia Harei jeng glaong, haong yaom abih tagok tal 368 trieu dong. Piah khik kajap bruk pambuak di gah ngak mbang pablei salih haong urang ngak hu tani tanat saong siam mekre, So Lao dong - Thuong binh saong Xa hoi tinh Binh Duong pandar dom gah, dom karja palei langyah samu dom bruk meraik gauk ka bruk ngak, urang ngak meda rah tabiak, khik kajap ka labik ngak bruk hu tani tanat.

HĐND tinh Dong Nai birau khan tapa Sarak brei daong jien ka Urang hu angan je dalam bhap bini tỉnh. Tui nan, Urang hu angan je dalam bhap bini bangsa takik  hu daong pandap panda, pachreih ba urang uan raok tet yaom 500 ribau ndong. Urang hu ngan je meyah ruak tame taong ruak, hu harak gal di labik iek ruak ye karja hu rivang, daong meng 5 rituh tal 3 trieu dong.

HĐ Bhap bini tinh Binh Phuoc bahrau hu adat ka sarak daong mikva bangsa takik hu mbaok bac akhar huroh. Tui nan rahra bhum mikva bangsa takik hu mbaok tame tal bac akhar huroh hu taduan hu rilo bruk daong piah pachreih bruk bac megru saong patagok kinh te - xa hoi. Urang bac brei khik kajap dom kein lagaih yau: Hu mbaok tame ginup danak dak bac megru: Urang bac megru brei hu mbaoh tangin meng labik pato megru ka bruk hu mbaok tame saong salah blaoh danak dak bac megru akhar huroh tui tanut chuan tamat blaoh di Mentri Pato Megru…

Mbiah tal ini, dalam tinh Kien Giang hu 19 dalam 116 xa palei pala birau paglong; taong abih xa dalam  bhum urang bangsa Khmer hu jalan mbak nao mai tal pasak xa, hu balai y te; dom baoh sang  hu padar ndien negar hu jaik taong abih; 40 xa bhum urang bangsa Khmer hu taduan angan xa palei pala birau…Ngak hu bruk nan lac hu bruk rik daong di urang hu ngan je di bhap bini bangsa takik. Urang hu ngan je brei nao dahlau  dalam  bruk pambak praong dom bruk ngak mbang kinh te, daong rilo baoh sang kathaot yam tapa kan kandah. Meng thun 2018 -2023, Akok UB Bhap bini tinh Kien Giang  hu alin brei Harak meyaom ka 72 urang hu Angan je.  

Dom urang ngak hukum negar Mỹ urak ini daok gaok kan kandah rilo dalam bruk ginum biai ka sarak daong di anak meta piah khik tani tanat bruk di rajaei hadei harei 20/12. Harak gar ka sarak hu kuhria ba tabiak di puac adit tapa hu brei padeih, haong bruk daong jien padai ka urang ngak nong jeng sa bruk kan kandah ka Ndang Cong Hoa saong Dan Chu. Bruk oh samu gauk meda ngak ka rajaei brei padeih bruk di drei, ngak kan kandah tal dom danak dak yitvu karja saong kinh te gah ngak nong di Mỹ.

Ia sua patui bruk rah tabiak di 5 tinh gah Barak Thai Lan dalam harei akaok adit, ngak jhak tal takik di nyu lac 128.000 baoh sang saong 8 urang metai. Dalam bilan hajan  thun ini, ia ribuk sua  tuh tame 11 tinh gah Meraong Thai Lan, ngak ka abih tih 35 urang metai saong ngak labaih 737 ribau baoh sang gaok kan kandah.

Meng harei 1/1/2025, ban phố Milan di Italia brei pakauk bruk njuk pakao hala, dalam nan oh hu pakao ndien tu, di taong abih labik hu rahra. Dom urang njuk pakao njauk mek hu bruk ngak suan hukum meng meda hu taong bhat meng 40 tal 240 Euro. Bruk ini lac sa bruk dalam jalan ngak siam mekre ka langik di ban Milan piah hu trun meteh tathuak nerak CO2 dalam thun 2050. Adat bahrau piah trun bruk njom nerak langik tasik, pacang khik prein yava di rahra saong ngak tabiak sa labik daok siam mekre jang.