Akok UB bhap bini TPHCM Phan Văn Mãi brei thau, meng kaok thun mbiah tal ini, Ban raya  hu taduan raok labaih 30 kapol pakat glong negar langiu, dalam nan hu rilo urang akok negar saong hu jaik 100 mbang taom gaok  tuai damuai pambuak bruk ngan haong rilo asar kadha, pataom tame  bruk pambuak ngak mbang patagok kinh te khang kajap, pacang caga BĐKH, padang ngak do thi thong minh, peih ngak dom danak dak hu makna praong di Ban raya. Tui ong Phan Văn Mãi, TP.HCM daok dak harei dak brei mboh labik dang di drei tapa bruk tacei ba saong ngak dahlau dalam bruk peih ngak sarak pambuak bruk doi ngoai di taneh ia.

Tukvak tapa, yaom lac mek hu dom jak jeng biak lagaih dalam bruk pacang caga taong mek kaya ikan suan hukum, oh pathau khan saong oh tui njauk adat (IUU). Min, tỉnh Bà Rịa Vũng Tàu jeng daok labaih 1.000 glai ikan “3 oh” lac oh tut angan, oh đăng kiểm, oh hu harak adat taong mek kaya ikan. Piah khik ramik dom sruh gilai 3 oh ini, Bol lin Biên phòng tỉnh hu pambuak haong dom so, dom gah saong dom bhum palei hu pambuak tal peih bruk pasang iek, dak padang angan saong oh oh brei tabiak tasik ".

Tỉnh Sóc Trăng peih ngak Danak Cakrok patagok bruk raong hadang ia meteh mbak meteh taba vaktu 2023-2025, pamaong tak thun 2030. Bruk pamong tal danak dak nan lac tani tanat bruk ngak mbang pala drak, khik kajap saong paglong jien mek tame meng bruk pablei hadang raong dalam ia meteh mbak meteh taba tabiak negar langiu tui jalan ngak tabiak rilo saong hadang siam. Peih bruk raong kaya ikan dalam ia brei sangka ngak njauk. Danak dak brei padang ngak 30 labik ngak iek, bruk praong, lagaih haong yaok bhum pala drak hu pacang khik tani tanat ka alam moi truong saong jit ruak. Kham merat taong abih labik raong, baoh sang raong hu ginup piah raong kaya ikan saong hu brei ma so raong, khik kajap bruk duah thau hu asal di nyu piah duh ka bruk pablei tabiak negar langiu…

UBND tỉnh Đồng Nai bahrau brei padang Kapul durain. Ngan haong mblang taneh praong jaik 13 ribau hécta, durain lac sa dalam dom janih phun pala rilo abih di pak Đồng Nai. Ini jeng lac phun hu prein khang pablei tabiak negar langiu di tinh, ba mai kein lagaih kinh te glaong. Tinh daok caik hatai paglaong padang ngak dom bhum chuyen canh durain, peih praong ma so bhum palei, labik papaok durain pablei tabiak negar langiu. Kapul meda lac tatua pambuak dom doanh nghiep, HTX, urang ngak nong dalam dom kapul dalam talei pambuak gauk; patakik bruk meblah gauk blei, meblah gauk pablei, maraik gauk oh siam, ngak tayah tayaic darak pasa, ngak tayah talei pambuak gauk.

 Hadei di jiak 2 thun kham merat peih ngak, mbiah tal ini, daknak dak padang ngak ar pacang glut jaleih ar gah Barak  pulao Tân Long (ban Mỹ Tho, tỉnh Tiền Giang) hu ngak salah, rik daong tame pasiam bruk glut jaleih  saong ngak brei mekre labik ini. Danak dak atah labaih 700 m, kuhria tui jien angaok harak gal lac labaih 55 tỷ đồng. Ar hu ngak dang tapak gam tabung mblieng. Danak dak hu ba tame pandar piah lagaih ka bruk pacang caga glut jaleih, daong tani tanat labik daok ka bhap bini saong bruk ngak mbang pala drak di labik ini.

Gah Y tế Dunya (WHO) brei thau, meda hu harak padeih bruk mesruh gauk di Gaza piah klauk vaccine bại liệt ka yaok ratuh ribau uranaih, hadei di tuk sa uranaih njauk ruak camriep hu brei thau lac daok pak bhum taneh ini. WHO brei thau, jalan ba tabiak lac klauk jru ka labaih 640.000 uranaih mala umo 10 thun di Gaza saong danak dak ini hu pambuak haong kanja Israel. Min, meda abih rilo tukvak jang piah ngak salah bruk klauk jru. Dom gah biak chreih chrai saong caga pambuak bruk haong dom kapul nyaom dunya dalam bruk padeih mesruh piah ngak pahla.

Pasak Pasang iek saong Pacang caga jit ruak châu Phi brei thau lac hu jaik 1 trieu mbang jru vaccine pacang ruak đậu mùa khỉ ka bhum taneh ia ini, tui nan, pachreih dom hãng jru brei klah rabha ilamu kong nghe ngak tabiak jru piah pacang caga ruak nan. Akok bilan ini, WHO hu tabiak panuac samar drah ka prein yawa bhap bini di dunya kayua ruak đậu mùa khỉ, ngan haong châu Phi urak ini daok dang akok taneh ia jit ruak. Akok bilan ini, dom taneh ia hu sanya payua vaccine tal dom taneh ia châu Phi daok trak damak kan kandah. Kuhria tal harei 25/8, châu Phi hu labaih 5.281 mbang urang njom ruak.

Jabat Khik ramik pandap mbang saong jru tavao Mỹ hu patagok umo thun takik di abih hu blei dom janih pakao. Tui nan, bruki pablei yaok janih pakao hala, dalam nan hu pakao hala dien tu ka urang mala umo 30 thun njauk ngak cambaih laih angan meng thaot binguk. Tui adat klak pandar ngan haong dom urang umo mala 27 thun. Di dunya hu labaih 37 triệu ranaih njuk pakao hala. Gah Y tế dunya hu ieu kakei dom rajaei samar drah peih ngak piah khik caga ka rai hadei di taneh ia./.