Jabat Rajaei bahrau hu pathau khan panuac tamat di Phó thủ tướng Trần Hồng Hà di var ngak bruk haong Kapul ngak bruk di Thủ tướng ka bruk taoh talaih, dom kan kandah dalam bruk peih ngak danak dak taneh riya, sang danaok. Phó thủ tướng ieu kakei Kapul ngak bruk pataom prein tame ngak salah bruk pasang iek di tỉnh Đồng Nai, Bình Thuận…lac bhum palei hu rilo panuac caong di doanh nghiệp payua tal Rajaei, Thủ tướng, Kapul ngak bruk yau ye Novaland, labik đô thị sinh thái Đại Phước, labik đô thị du lịch Long Tân... bruk ini hu ngak salah dahlau di harei 20-4.

TP.HCM brei langyah dom urang jakar daok huac bruk, daok plaih njaik bruk. Nan lac panuac di ong Nguyễn Văn Nên, Bí thư Thành ủy TP.HCM di mbang ngak bruk di Thường trực Rajaei haong mBan Thường vụ Thành ủy TP.HCM mesup harei (16/4) ka lang talaih kan kandah, tavak tavaiy dalam patagok KTXH. Di nyaom biai, ong Nguyễn Văn Nên ba tabiak bruk njauk langyah ngan haong bruk patagok kinh tế di ban raya. Nan lac kol drei kuhria dahlau njauk bruk halei oh? Ban raya peih bruk kuhria dahlau min kuhria dahlau oh ka tal. Sa bruk tra lac, kayua habar ban raya trun dalam yau nan? Blaoh tuk mboh bruk laik trun ye maong mboh cambaih jang bruk suai damuai, kandaong veik, yếu kém. Bí thư Nên brei thau, anak tal, urang jakar halei suai damuai, plaih njaik, kurang trách nhiệm, huac suan nan ye oh ngak... njauk langyah trách nhiệm.

Akaok UBND tỉnh Ninh Thuận bahrau mbaoh tangin tame harak tamat pasang iek saong pato tacei taong yaom veik bruk ngak di rilo kapul, manuac urang piah rahtabiak dom bruk suan dalam khik ramik taneh riya ngak suh sah dalam manuac sia di xã Phước Dinh, huyện Thuận Nam.  Tui panuac tamat pasang iek ka 735 di UBND tỉnh Ninh Thuận ye dalam tukvak suai labik hu rahtabiak bruk lih mek taneh gilai pacang caga tapen tasik di xã Phước Dinh, huyện Thuận Nam. Hu 3 bhum ngak suan bruk lih mek taneh lac, labik 52 ha saong 22 ha jaik taphia nan, labik bãi Đá Trứng saong labik rah tui 2 gah jalan tapen tasik di huyện Thuận Nam.

Tỉnh Kiên Giang mboh hu 45 kapal ikan ngak suan dalam bruk taong cap kaya ikan, 66 kapal tabiak tasik oh hu ginup harak gar.  Tui Sở Ngak nong saong Patagok palei pala tỉnh Kiên Giang, urak ini bruk taong cap kaya ikan di bhum tapen tasik dalam tỉnh daok rah tabiak srau kadau. Urak ini daok dalam bilan kuac mek nghêu lụa, mikva urang taong ikan pandar kapal không số (janih kanduh) pandar hatai pasei piah kuac mek nghêu lụa suan adat daok hu rilo. Dalam nan hu rilo kapal ikan di tỉnh karei mai tame taong cap kaya ikan.

Dom bruk ngak di Harei Tapuk saong ilamo puac thun ini di tỉnh Bến Tre hu peih tabiak meng harei 16 tal abih harei 19-4 ngan haong dom bruk ngak, yau ye parang iek, yaih khan baoh tapuk Thư pháp blah praong Nguyễn Đình Chiểu pakacah, peih dom bruk pachreih puac saong padang kadung jien, parang iek tư liệu bản đồ ka “Hoàng Sa, Trường Sa di Việt Nam”…  Di danak dak, urang lambaok di Ủy ban MT negar Việt Nam tỉnh hu jak ba rahra pachreih tui saong cak rok patagok ilamo puac tapuk dalam rahra.

Ấn Độ tapa mbaok Trung Quốc jeng taneh ia hu rilo menuac abih di dunya. Liên hợp quốc brei thau lac meng bruk tagok menuac sia yau urak ini, Ấn Độ meda jeng baoh sang di 1 ty 700 trieu menuac di thun 2064. Bruk patagok menuac sia ini meda ba mai dom siam lagaih gah urang ngak ka taneh ia Nam Á. Min gam haong nan, rajaei Ấn Độ jeng meda dang anak rilo cuang kandah dalam bruk khik kajap pandap mbang, labik daok saong bruk y tế, pato megru ka jaik 1 ty 500 trieu menuac. Tui kuhria, jaik 800 triệu rahra di taneh ia ini daok taduan bruk daong meng rajaei.   

Lò phản ứng hạt nhân praong abih daok peih bruk phát điện daong ka châu Âu trun bruk pagam pambak tame năng lượng Nga. Hadei di rilo mbang padeih, lò phản ứng hạt nhân praong abih di châu Âu Olkiluoto 3 (OL3) hu peih bruk pabak năng lượng di harei 16/4, daong patagok bruk an ninh năng lượng dalam bhum bo Nga cakak bruk pabak khí đốt saong điện. Lò phản ứng hạt nhân ini ngak bruk daong ka Phần Lan mek hu dom bruk ba tabiak piah trung hòa carbon di drei saong paglaong bruk an ninh năng lượng di tukvak dom taneh ia châu Âu cakak trun gah pabak manyek, khí đốt saong gah năng lượng karei meng Nga.

Dom bruk duah saong  daong hu peih tabiak samar drah di Vịnh Thái Lan, langiu tasik tỉnh Nakhon Si Thammarat gah meraong Thái Lan, hadei di tuk rilo kapal ikan saong kapal du lịch tableik kayua ribuk ngak brei rilo urang taong ikan saong tuai du lịch lahik. Ong Sutthipong Julcharoen, Thư ký thường trực Bộ Nội vụ brei thau, sa ribuk praong nyu tuh tame bhum tasik di dom huyện Pak Phanang, Sichon saong Tha Sala di tỉnh Nakhon Si Thammarat tuk mesup harei kabroi (16/4). Di Pak Phanang, 7 dalam 22 kapal ikan tableik saong 2 kapal lahik. 42 urang nao kapal hu sraong tagaok, 1 urang metai saong 6 urang karei daok lahik. Dalam dom kapal tableik, hu kapal pajeng tuai ravang me-in, ngak iek bruk taong cap ikan angaok tasik./.