Sở Jalan mbak pajeng ba Ban raya HCM kuhria pok pathau khan tagok pakat angaok 5 danak dak jalan mbak peih ngak tui jalan BOT angaok jalan daok hu blaoh tui cơ chế đặc thù di Sarak 98. Lime danak dak paglong peih praong jalan raya 13; danak  dak paglong peih praong jalan Roya 1; danak dak brei salih birau paglong jalan Raya 22; danak dak peih praong jalan raya Bac - Nam saong danak dak padang ngak tatua jalan Bình Tiên. Sở Jalan mbak pajeng ba TPHCM saong dom gah tư vấn brei padang angan mbang ka 1 payua UBND ban raya piah pok tagok HĐ bhap bini Ban raya  patabiak dalam bilan 9 thun 2023. Hadei di nan, maong tui dom tanut roh duah, gah jalan mbak meda patui bruk pabak dom danak dak karei dalam dom mbang patui di nan. Langiu di nan, njauk brei caik hatai tal tanut taong yaom  ngak kan kandah tal KT-XH, danak dak halei takik ngak kan kandah tal bhap bini ye njauk brei ngak dahlau.

Urak ini, yaom hadang dom janih di bhum ĐBSCL bier abih kuhria dalam labaih 10 thun ini mai. Meng yaom kaom yau urak ini, meda ba tal bruk danao klaak saoh dalam tukvak anak tal. Kayua yau nan ye, Thứ trưởng Mintri ngak nong saong patagok palei pala Phùng Đức Tiến ieu kakei dom tinh, ban pasang iek bruk pajaih, njauk pasang iek veik biak catang saong paglaong hu prein ngak tabiak pajaih kayua pajaih  ba tal chất lượng; duah dom jalan ngak ka dom pandap panda blei tame brei yaom pandap mbang trun; gam haong nan brei hu quan trắc piah langyah ruak kik hu siam lagaih jang.

Piah pacang caga ruak meruai di asaw, xã Phước An, huyện Nhơn Trạch, Đồng Nai hu pataom prein yava tame bruk klauk jru pacang ruak ka labah 1.300 drei asaw dalam xã. Tui xã ini brei thau, hadei di rilo thun oh hu ruak meruai halei di asaw meyao ye tal puac thun 2022 hu 1 urang metai. Saong mbiah tal ini daok tui iek 5 sruh jit ruak  meruai  di asaw saong 3 sruh jit ruak di manuac. Tapa pasang iek brei mboh: ralo mbang ruak meruai di asraw di Đồng Nai dalam dom bilan akaok thun ini lac ruak meruai kandauk, oh mboh ruak, takik mbang ruak  meruai kaik. Mbiah tal ini, ruak daok kandauk di taphon asaw, meyao pambak praong. Yau nan ye, dom jabat đơn vị daok kham merat peih ngak dom jalan pacang caga, janih ruak njom mbak mbuan ba tal metai nan.

Dom harei tapa, tỉnh Vĩnh Long hu hajan khang dui atah ngak ka rilo taneh pala padai Thu Đông bahrau drak metai pajaih brei drak gilac veik. Dom mblang padai metai pajaih meng labaih 30% tal 70%. Tui yaok pataom ka oh ginup, meng akaok thun tal urak ini, hajan khang ngak jaleih, ngak khut jaik 2.000 ha padai. Mban pato tacei jalan Pacang caga bala langik tasik – daong duah urang njauk bala tinh daok yaok pataom dom khat lahik piah daong manieng dom khat lahik, daong ka urang nong hu jien pasiam veik bruk ngak mbang, pala drak.

Hadei di rilo harei hajan praong ba tal ia tagok glong, piah khik ia pacang ia sua, pambuak haong ia ndik di gah ala kraong daok trun, harei ini Công ty Thủy điện Trị An brei peih tathuak ia tapa ar ia sre peih kareih binek ia mbang ka 1. Kong ty jeng khan brei mban tacei ba jalan pacang caga  bala meng langik tasik saong duah daong urang gaok bala, dom pakat, karja bhum palei piah tacei pato, pambuak saong khan brei ka bhap bini labik gah ala binek padang ia hu jalan pacang caga, palaik dom khat lahik  meda rah tabiak. Binek Trị An praong 323 km2, padang ia ;labaih 2,7 tỷ m3. Ini lac danao ia nhan tao  angaok kraong Đồng Nai. Binek ia  lac  piah padang ia pabak ka Sang mac thủy điện Trị An peih ngak saong peih kareih ia  ka bhum gah ala.

Giải xổ số Mega Million di Mỹ hu yaom tal 1 tỉ 580 triệu USD puac abih jeng hu urang njauk hadei di rilo mbang quay kuhria meng di bilan 4. Urang njauk jai blei blah harak vé số đặc biệt di sa sieu thi di tiểu bang Florida. Urang ini hu pilih ruah taduan taong abih jien thuong parabha samu gauk dalam 30 thun atau taduan jien mbaok labaih 783 triệu đô la dahlau meng kak je. Tỷ lệ njauk jai mbang ini lac sa dalam 302,6 triệu. Giai xổ số hu yaom glaong abih di Mỹ lac jai Powerball, yaom 2 tỉ 40 triệu đô la di bilan 11 thun blaoh.

Apui khuah khang di sa labik padeih padei di urang jaoh jo di tỉnh Haut-Rhin gah miền Đông negar Pháp ngak brei 11 urang daok pak ini metai. Labaih 80 urang linh padam apui hu mbaok chip di labik nan saong lahik jaik 2 mon meng padam hu apui. Urang jakar  bhum palei ini khan lac tuk apui khuah, hu labaih 30 urang jaoh jo daok padeih hè saong jaik abih lac umo meng 27 - 50 thun. Gah daong urang gaok bala tok panduan ba hu 17 urang daok tal ala saong oh tame daong hu tal kreh kayua apui khuah me-om bak baoh sang.

Bilan 7 hu mboh lac bilan pandiak abih kuhria meng kan mai di baoh taneh tuk nhiệt độ di mbaok taneh tagok 1,5°C dut saong atah di ini labaih 275 thun. Tui jabat tui iek bruk biến đổi khí hậu di Liên minh châu Âu, nhiệt độ glaong ka oh bhian mboh dalam bilan 7/2023 yam tapa mbang pandiak glaong abih di dom bhum taneh, jang yau bruk pandiak tagok ka oh bhian mboh di dom tasik praong. Tanut 1,5°C lac hu makna biak praong kayua tui dom urang ilamo, bruk yam tapa tanut nhiet ini meda rahtabiak dom bruk oh thau dahlau saong ngak jhak biak khang ka baoh taneh, yau bruk ia tasik tagok, ia sua, pandiak bhang tua riya, khuah glai, kurang pandap mbang saong kurang ia./.