Tui kuhria mboh dahlau So Pato megru TPHCM brei palih ruah patagok rilo anek saih tame tal bac 10 chuyen di dua sang bac THPT chuyen Le Hong Phong saong THPT chuyen Trần Đại Nghĩa, takik di abih lac 100 anek saih. Yau nan min, mong tame duk bilik pandap panda, sang bac, dom gru pato…piah ba tabiak brei palih ruah tame hadom, tui kuhria mboh dahlau anek saih mek tame rilo jang bruk kuhria ba tabiak. Dahlau di nan, So Pato megru TPHCM hu brei pasang iek bruk lagaih di yaok sang bac piah brei palih ruah anek saih tame tal bac 10 di karja thun bac 2025 -2026.   

Yaom brah pablei le di dom tinh gah Meraong negar meng 1.000 - 5.000 dong sa kilo. Ini lac yaom brah trun biar abih dalam 2 thun jaik ini. Yaom brah trun biar kayua yaom pablei brah tabiak negar langiu trun, urang takik blei. Hu dom bhum palei yau ye Đồng Tháp, Bến Tre, Tiền Giang... bhap bini daok pajeng brah meng radaih tai nao pablei rah tui jalan palei yaom meng 11.800 tal 15.000 dong sa kilo. Langiu di nan, kayua dahlau Tet Nguyen dan 2025, dom urang blei biak ralo brah piah kayua huac brah tagok yaom, yau nan min drak pasar hadei Tet trun nan ye urang blei tame yaom biar saong cang pablei abih brah daok labaih meng blei brah birau tame veik.

Gah bol pan phao karong tinh Soc Trang daok kham merat hu mbaok tame danak dak ngak brei abih baoh sang oh daok taik tahak, hu labik daok tani tanat ka rilo urang kathaot. Ban sit Vĩnh Châu hu ralo urang bangsa Khmer, lac sa dalam dom bhum palei  hu rilo baoh sang taik tahak. Urak ini yaok ribau urang jakar, urang lin saong bhap bini rik tame labaih 12 ribau harei ngak bruk, daong rilo urang hu sang daok birau, samar padaok raidiuk mbang ngui tani tanat.  

Tinh Dak Lak lac labik pala rilo caphe abih di Viet Nam, daok pataom tame ngak brei asar caphe hu siam saong paglong pablei pandap caphe hu tagok. Tinh kham merat tal thun 2030, taong abih taneh pala caphe mek hu asar siam. Urak ini, meng 70 - 80% taneh pala caphe mek hu tanut chuan dalam negar saong dunya, piah ngak brei khang kajap ka bruk ngak tabiak asar caphe pahe bingi meng tuk pala. Dalam mbang pataom caphe mbang ka 9 ini, Dak Lak caong khin harei pataom nan pacheih  hu rilo urang buh jien tame ngak, rik tame ba caphe hu jeng bruk ngak mbang kinh te khang kajap di tỉnh.

Kong an tinh Hau Giang birau ngak bruk haong po tai khoan mang XH ba khaw tin radaih chap mek manuac oh hu biak. Dahlau di nan, kong an tinh Hau Giang duah mboh sa tai khoan mang xa hoi  Facebook hu ba thaok binguk  radaih tai  peih angaok jalan  hu tauk akhar “radaih chap manuac” gam haong kadha “dom sruh radaih nao mbuan kan mai sang” Kong an  duah mboh po tai khoan Facebook nan saong da-a mai  ngak bruk, urang nan taduan lac, mboh mang xa hoi hu ba clip  ndem tal radaih tai chap manuac thaok veik binguk blaoh oh pasang iek tani tanat. Urang ini taduan bruk drei ngak suan, ba kadha vak drei trun blaoh sanya ngak veik oh.

Tui yaok kuhria di gah kinh te brei mboh, kinh te An Do daok jaik sumu Nhat Ban dalam sarak angan bruk ngak kinh te dunya. Patagok kuhria abih pandap ngak tabiak dalam negar An Do kuhria rah tapa hu jaik 6,5%  dalam thun jien padai 2024 – 2025 dut  saong thu dahlau lac 9,2%. Bruk ngak kinh te An Do kuhria rah tapa hu 331 ribau ti rupee sumu 3 ribau 900 ty dola. Yau nan min, dom urang ilamo  mboh lac, kinh te An Do daok dang anak kan kandah ka jien mek tame. 

Harak pathau khan di  Mentri Y te Campuchia khan lac hu rilo urang ruak oh yau bhian ka ruak me-ik saradang, tagok drah saong ung thu. Langiu di  3 nyaom ruak kan kandah nan, Mentri Y te Campuchia hu urang ruak tam than  jeng tagok rilo dalam thun 2024. Thu tuong Campuchia Hun Manet khan lac brei pabak veik 18 trieu USD kadung jien gah y te thun 2024 piah blei jru taong ruak tagok darah saong ruak me-ik saradang.

Jabat Ngak bruk pambak tal dom bruk ngak pahala di LHQ khan lac, di dai Gaza, yaom tapung brei saong njam patam baoih karaoh tagok glong jaik 100 mbang hadei  Isarael kareik pabah mbang negar di bhum taneh ia. Urang jakar ngak bruk daong chip di LHQ  mboh lac brei padeih daong labik Gaza di Israel lac “bruk njauk khan brei pambak praong” saong tui Hukum ngak pahala  dunya hu ndem cambaic laic  brei tame daong lac  bruk praong./.