Mintri jalan mbak pajeng mbak bahrau brei pabak jalan pilih ruah nhà thầu padang ngak labik Cần Thơ - Hậu Giang di danak dak padang ngak jalan cao tốc Bắc - Nam gah timun tukvak 2021-2025. Tui nan, danak dak labik tapa Cần Thơ - Hậu Giang hu parabha jeng 3 paok thầu. Dom paok thầu hu peih tabiak ngak dalam quý 4 ini, phun jien meng kadung jien kanja. Danak dak atah labaih 37km, labik akaok pambuak haong jalan Nam Kraong Hậu – Roya 1 (di quận Cái Răng, ban Cần Thơ), labik jung pambuak haong labik akaok di danak dak labik Hậu Giang - Cà Mau (di huyện Vị Thủy, tỉnh Hậu Giang).

Meng akaok thun tal ini, TPHCM hu 23 doanh nghiệp payua jalan ngak piah rami ramik veik urang ngak haong jaik 3 rabau urang ngak brei padeih bruk. Piah daong ka urang ngak duah hu bruk ngak veik, Sở LĐTB saong XH meda pambuak bruk haong gah pambuak tal, duah thau hatai caong di urang ngak dalam dom doanh nghiệp kuhria brei urang ngak padeih meneing. Hadei di nan, Pasak Dịch vụ bruk ngak ban raya saong 127 doanh nghiệp yaih khan bruk ngak meda pambuak urang ngak tal dom doanh nghiệp caong hu menuac ngak njauk bruk.

Kuhria tal urak ini, abih tih mblang taneh pala thanh long di tỉnh Long An lac labaih 10.000 ha, ngan haong sản lượng paik hu labaih 190.000 tấn, trun 55.000 tấn dut saong tukvak ini  thun blaoh. Min, kayua jit praong COVID-19, meng thun 2020 tal urak ini, bruk pablei thanh long gaok rilo kan kandah, yaom kaom rilo mbang trun bier ngak ka urang pala oh daok laba. Meng nan mikva klaak bein  oh maong iek tal, rilo sang yah klaak bein thanh long piah salih tapa pala phun karei.

Dalam dom bruk  di Harei pataom ilamu, Thể thao saong Du lịch bhap bini Khmer Nam Bộ mbang ka VIII saong harei Ok Om Bok – pakacah ghe Ngo Sóc Trăng mbang ka V bhum ĐBSCL, di dom melam 6-8/11 di mangaok kraong Maspero – labik kreih tatua C247 (cầu Quay) saong tatua 30/4 (cầu Cao) jeng hu danak dak palao gom ia saong ghe Cà Hâu. Bruk ngak ini piah khik ramik, patagok ilamu siam mekre meng kan, bak hatai anit ranam di bhap bini Khmer. Ini daok lac sa pandap du lịch dui pachreih, jeng sa kadha praong ka dom bruk ilamu – du lịch di Sóc Trăng, ngak jeng rilo janih ka ilamu Sóc Trăng.

Sang iek ruak Đa khoa tỉnh Kiên Giang bahrau taduan 14 urang ruak hu ba tagok meng Pasak Y tế huyện An Biên, dalam nan hu 3 urang trak daok njauk daong tim phổi meng mac. Dahlau di nan dom urang ruak ini jeng nao rivang saong manyum alak di sa ndam metai di sa urang likei daok dalam xã Nam Yên haong gauk. Bruk njauk ndem nan lac urang likei ini metai kayua njauk jru mek meng manyum alak. Hadei di tuk hu mbaok di ndam metai ini mai sang, harei 6-11 dom urang ini mboh havieng akaok, handoh rup pabhap, meta bhang, pandik cada, kan suak yava hu ba chip tame sang iek ruak. Hadei di 2 harei taong ruak, 14 urang trak hu ba tagok Sang iek ruak Đa khoa tỉnh Kiên Giang. Urak ini Chi cục hacih saat pandap mbang tỉnh daok peih bruk pasang iek makna bruk njauk jru mek alak ini.

Bruk pilih ruah, pok ngak kreih nhiệm kỳ di Mỹ hu peih tabiak tuk mesup harei 8/11 (tui mon pak nan, lac melam di Việt Nam). Di mbang pilih ruah, pok ngak mbang ini, dom cử tri Mỹ brei pilih ruah veik taong abih 435 hạ nghị sỹ liên bang haong tukvak ngak bruk lac 2 thun. Thư ký Báo chí Nhà Trắng brei thau, an ninh daok hu khik kajap ka bruk pilih ruah kreih nhiệm kỳ ini. Gam haong nan hu panuac khan lac, oh ka mboh bruk hagait ba tal trak damak halei di tukvak ini.

Ong Hans Kluge, Yam ndok Gah Y tế Dunya (WHO) di bhum châu Âu brei thau, dom jalan ngak piah pacang caga haong bruk biến đổi khí hậu urak ini di dunya lac “oh yau gauk saong suai damuai”. Piah patrun bruk patagok dom bruk langik tasik kan kandah, ong Hans Kluge hu panuac ieu dom taneh ia jumpataom gauk, meng di tuk ini pandar prein khang di abih gauk” piah padang dom jalan ngak lagaih saong trun khang dom bruk meda ba tal biến đổi khí hậu, paglaong prein yava di bhap bini.

Meng akaok thun tal ini hu takik di abih lac 15.000 urang di châu Âu metai kayua langik pandiak. Dalam nan, Tây Ban Nha hu jaik 4.000 urang metai, negar Anh hu labaih 3.200 urang saong Đức lac 4.500 urang. Dom urang ilamu mboh lac bruk patagok dom mbang pandiak pa-uh urak ini lac kayua biến đổi khí hậu. Bruk pandar rilo nhiên liệu hóa thạch di anek menuac nyu ngak ka langik pandiak jang, dom mbang pandiak pa-uh dui atah jang saong bhian hu rilo jang./.

Urang lang: Thu Thảo & M. Phương