Dalam mbang nyaom ka 5 di Quốc hội bahrau ini, dom urang Quốc hội hu brei tapa Sarak di Quốc hội ka bruk ngak iek dom jalan ngak, sarak karei piah cak rok patagok TPHCM. Tui dự thảo Sarak hu brei adat ka 2 nyaom praong lac nyaom dom sarak hu brei adat di Sarak 54 saong dom sarak jalan ngak karei piah pandar dom tinh, ban karei atau daok brei adat ka dom dự thảo hukum payua tagok Quốc hội. Nyaom sarak bahrau mbang camriep hu brei adat di dự thảo sarak ngan haong 4 nyaom bruk ngak lac buh jien tame, gah jien padai- kadung jien kanja; khik ramik taneh riya, quy hoạch; dak padang kanja TPHCM saong ban Thủ Đức.

TP.HCM hu 62 danak sang daok di TP.HCM oh ginup paka piah ngak po đầu tư. Tui  Sở Kế hoạch saong Đầu tư TP.HCM, dom danak dak daok tavak tavaiy hu parabha jeng 2 kapul. Kapul ka sa hu 117 danak dak daok ngak  harak gar likau brei adat ngak. Tapa taong yaom, dom danak dak ini oh pabak hu bruk ngak po đầu tư danak dak sang daok kayua danak dak oh hu taneh daok atau oh taduan chuyển nhượng taong abih taneh daok tui adat sang daok thun 2014. Kapul ka 2 hu 55 danak dak daok hu pasang iek, langyah piah hu adat brei ngak tui hukum, tavak tavaiy gah adat hukum

Dom harei tapa, di ban Vũng Tàu, tỉnh Bà Rịa – Vũng Tàu, dom nerak di tasik tagok khang saong theik tame takai tasik. Vũng Tàu hu jak ba labaih 900 urang trun tasik piah pataom mek nerak. Yaok thun di tukvak meng bilan 6 – 7, di tasik Vũng Tàu hu yaok ratuh tấn njam baok, nerak nhựa, pa-op, kalaok… meng dom pabah kraong tui jalan ia nduac tame, ngak jeng tal tapan,  atah rilo mbaik jalan. Pachreih tui Harei alam dunya, Harei tasik dunya, Bilan ngak kayua alam saong Adit tasik, kaoh pulao thun 2023, kanja ban hu jak ba urang jakar, urang ngak, rahra pak ini tabiak puh ramik ngak hacih takai tasik saong pataom mek jaik 50 tấn nerak.

Harei ini (26/6), di labik Du lịch sinh thái Bàu Trắng, xã Hòa Thắng, huyện Bắc Bình, tỉnh Bình Thuận, hu peih bruk tamat giải “pakacah ghe gilai meng kan dang akaok taneh ia thun 2023”. Giải kayua Tổng cục Thể dục thể thao, Liên đoàn pakacah ghe gilai Việt Nam haong Sở Ilamu, Thể thao saong Du lịch Bình Thuận pambuak gauk peih tabiak. Giải pakacah ghe gilai meng kan dang akaok taneh ia thun ini hu jaik 300 vận động viên di 8 tỉnh, ban, yau ye: An Giang, Đà Nẵng, TP.HCM, Quảng Bình... Giải jeng lac sa dalam dom bruk ngak pachreih tui thun du lịch taneh ia thun 2023  “Bình Thuận – Pataom hijao”.

Tukvak tapa, yaom lac kanja palei saong gah chức năng di tỉnh Tiền Giang  kham marat peih ngak rilo jalan ngak piah khik tani tanat darak pasa mangaok kraong di Cái Bè min darak pasa mangaok kraong ini dak harei dak joa manuac saong tui kuhria meda yah klaak. Di tukvak tabung glaong, darak pasa  mangaok kraong di Cái Bè hu peih tabiak luac harei melam saong bhian tui ia praong. Darak hu peih meng maong 3 tal maong 5 dah page peih tal bier harei sap. Pandap panda biak rilo janih, meng khan bai, kaya tasik tal dom pandap panda pandar dalam sang, ia manyum, saong dom pandap panda karei karei. Rilo di abih lac baoh kayau. Jaik di ini, kayua jalan nao mai cak rok patagok siam, bruk caong blei pandap panda di mangaok jalan ia trun khang nan ye darak pasa  mangaok kraong di Cái Bè takik nao saong pandap panda oh hu thei blei.

Thủ tướng Rajaei Campuchia Hun Sen ndom lac, sarak sron mbon hòa bình di Campuchia lagaih haong sarak sron mbon hòa bình di Việt Nam, tapa nan jhul patagok bruk buh jien tame ngak mbang, pablei salih pabak brei ka gauk. Dalam thun 2022, jien mek tame meng pablei salih nao mai di Campuchia haong Việt Nam yam tapa labaih 10 tỷ đô-la.  Meng sarak sron mbon hòa bình, saong ba taneh ia cakrok patagok di yaok gah, abih di nyu lac bhum tapen negar bhian lac labik mesruh metak dahlau daih, urak ini hu jeng bhum ngak mbang kinh tế, darak pasar saong cakrok patagok. Meng jalan ngak njauk yau ini, bhum tapen negar hu cakrok, yau sang mac, xí nghiệp, labik ngak kinh tế dui tui dom urang buh jien tame ngak mbang

Akaok Mintri Jien padai Phi-lip-pin Benjamin Diokno brei thau lac, ong daok caong maong Gilang paraik kanja Phi-lip-pin meda padeih tagok mbang tagok jien padai tuk lạm phát tui kuhria meda trun. Dahlau di nan, Gilang paraik kanja Phi-lip-pin hu brei khik tani tanat jien je sarak tani tanat daok di tanut 6,25%.  Tui Akaok Mintri jien padai Benjamin Diokno, ini meda lac sa tukvak brei padeih suai lavik. Kapul hoạch định sarak jien padai di Gilang paraik kanja tui kuhria meda hu ginum biai gilac veik di harei 17/8 anak tal. Meng di bilan 5 thun blaoh, Gilang paraik kanja Phi-lip-pin hu tagok jien je 425 điểm cambaih laih piah pacang caga lạm phát.

Pasak Khí tượng negar Trung Quốc kuhria mboh dahlau lac meng harei 27-30/6, dom mbang pandiak khang meda rah tabiak di gah brak taneh ia ini, dalam nan hu dom labik daok kreh kraong Hoàng Hà haong kraong Hoài.  Tui kuhria, langik pandiak glaong abih di Bắc Kinh, Thiên Tân saong Hà Bắc trun tagok meng 38-41 độ C. Pasak Khí tượng negar Trung Quốc kakei urang ngak, takik ngak bruk dalam tuk langik pandiak glaong./.