Mayah hu ramik ngak siam lagaih, Kadung jien jeng jalan ngak hu siam lagaih piah cak rok patagok bruk ngak di Kapul rami ramik bhum. Ndom ka bruk ini, akaok UBND TP.HCM Phan Văn Mãi brei thau lac, meda ieu dom tinh, ban dalam bhum hu jalan ngak yau ye Ban raya lac pabak manieng kadung jien saong ginum biai veik haong dom gah buh jien tame di dunya,  kapul doanh nghiệp di dalam ban peih ngak. Atau meda likau sarak ka dom tinh, ban dalam bhum jao ka sa bhum palei dang akaok padang ngak kadung jien, hu adat peih ngak.

Kapul urang QH di tỉnh Tiền Giang bahrau peih bruk taom gaok cử tri di 20 labik dalam tỉnh. Tapa nan, mikva cử tri hu panuac dom ka dom bruk yau ye yaom kaom pandap ngak nong, khak drak, pandap mbang raong menuk ada, athur, kaya ikan tagaok glaong, dalam tuk nan bruk pablei rilo janih kaya nong gaok kan kandah, yaom biar dui atah ngak ka urang raong khat trak, bruk cuang kandah, tavak tavaiy tuk bhap bini mesraiy jien di Gilang pariak ngak nong saong patagok palei pala njauk blei bảo hiểm di Gilang pariak saong bruk kurang vaccin klauk ka uraniah dalam tukvak suai lavik, bruk tagok yaom điện…

Sở Pato magru TP.HCM hu  khan brei thau điểm chuẩn tame tal 10 dom sang bac THPT công lập. Điểm chuẩn thun ini tagok di dom sang nac dang akaok. Sang bac hu điểm chuẩn glaong abih lac sang bac THPT Nguyễn Thượng Hiền hu điểm trúng tuyển nguyện vọng 1 lac 25,5 điểm, patui veik lac THPT Gia Định nguyện vọng 1 lac 24,5 điểm…Tui kuhria, anek saih trúng tuyển meda cop harak gar di sang bac THPT hu trúng tuyển meng urak ini tal harei 1/8. Sở pato magru jeng khan lac, anek saih oh salih hu hatai caong hadei di tuk hu kết quả pilih ruah tame tal 10.

Bộ đội biên phòng Kiên Giang bahrau alin hadiah 100 hala dok taneh ia brei ka urang taong ikan saong jaik 1 rabau baoh siphau, 30 pok pandap brei ka dom anek saih sang kan kandah daok di xã Vĩnh Phú, huyện tapen negar Giang Thành. Langiu di nan, Kapul urang kumei Bộ đội biên phòng hu daong, brei jien bac ka adei Lê Tường Vân, dalam danak dak “Mẹ đỡ đầu” yaom 3 triệu đồng, alin 4 pok pandap ka dom adei sit lac anek di urang jakar, sĩ quan Bộ đội biên phòng tỉnh hu raidiuk kan kandah.

Dah page ini (7/7), di huyện Kon Plông, tỉnh Kon Tum rahtabiak 4 mbang magei baoh taneh khang meng 3.5-4.0, taeng mbang ka 4 khang 4.2. Dom mbang magei baoh taneh rahtabiak gam gam, atah di gauk dom minit, min menuac sia oh thei njauk hagait. Viện Vật lý Địa cầu kakei kanja palei njauk bhian pathau khan, pato tacei ka rahra dom jalan pacang, plaih, patrun dom khat lahik tuk rahtabiak  magei baoh taneh khang. Abih di nyu nan lac, tuk hu magei baoh taneh rahtabiak, yaok rahra njauk caga dahlau bruk panduan nao labik karei plaih di kan kandah, khik hu salamat.

Trung Quốc meda pakauk blei pandap mbang meng 10 tỉnh di Nhật Bản kayua bruk salamat. Ini lac panuac hu Hải quan Trung Quốc ba tabiak dalam tuk Nhật Bản daok kuhria tathuak ia meng sang mac điện hạt nhân hu langyah blaoh tabiak tasik. Trung Quốc lac taneh ia blei kaya ikan praong abih di Nhật Bản dalam thun blaoh, haong yaom jien 600 triệu USD, meblah 22,5% yaom pablei kaya ikan tabiak negar langiu di Nhật Bản.

Enam bilan tapa, hajan di dalam negar Thái Lan bier jang labaih 25% dut saong tanut kuhria rah tapa. Cục kuhria mboh dahlau bruk langik tasik Thái Lan brei thau lac, taneh ia Đông Nam Á ini daok hu hajan mala tanut kuhria rah tapa kayua bruk El Nino saong bruk ini meda dui atah tal bilan 11 anak tal, meda tapa tal akaok thun hadei. Hajan di dalam negar Thái Lan bier jang 25% duk saong kuhria rah tapa  dalam 6 bilan akaok thun. Jabat Tài nguyên negar Thái Lan brei thau lac, 4 binek praong di taneh ia ini daok di tanut kuhria lac 40% prein ngak.

Akaok Mintri Nội vụ karja Afghanistan bahrau ba tabiak panuac lac, karja Taliban di Afghanistan oh hu dunya công nhận kayua urang oh tui bruk di dunya. Kuhria meng di tuk mai veik pan karja di bilan 8/2021, Taliban ba tabiak rilo adat biak kan kandah, patrun patakik dom quyền di rahra Afghanistan, abih di nyu lac quyền di urang kumei saong uraniah kumei. Ini lac makna ba tal bruk dom taneh ia di dunya ngak catang dom jalan taong phạt, oh me-in haong Afghanistan./.